كىتاپتىڭ يەسى جازۋشى جايىق بەكتۇروۆ ەكەن. ءوزى ايداۋدا بولىپ كەلسە دە, قورىقپاي, «حالىق جاۋى» دەپ اتالىپ كەتكەن الاش قايراتكەرلەرىنىڭ ەڭبەكتەرىن جاسىرىپ ساقتاۋعا تىرىسقان. ودان كەيىن ماعجان اعاسىن اقتاۋعا قوسقان ۇلەسى تۋرالى جۋرناليست جاراسباي سۇلەيمەنوۆتىڭ «زىليحا» دەگەن «ەگەمەن قازاقستان» (2012 جىلى) گازەتىندە باسىلعان كولەمدى ماقالاسىنان وقۋعا بولادى. ماعجان جۇماباي ۇلىنىڭ زايىبى زىليحا اپاي كۇيەۋىنىڭ جازىقسىز ۇستالىپ كەتكەنىن دالەلدەۋ ءۇشىن قول قۋسىرىپ قاراپ وتىرمايدى. وسى كەزدە ماعجان اعاسىن اقتاۋ ارەكەتىنە جايىق بەكتۇروۆ تا قوزعاۋ سالادى. زىليحا جەڭگەسىنە ايتىپ, سول كەزدە كسرو ۇكىمەتىن باسقارىپ وتىرعان ن.س.حرۋششەۆكە حات جازعىزادى. وسى حاتقا بايلانىستى ماسكەۋدەن ناقتى نۇسقاۋ العان رەسپۋبليكامىزدىڭ قاۋىپسىزدىك كوميتەتى ماعجان ءىسىن قايتا قاراۋعا ءماجبۇر بولادى. اقىرى, ماعجان كەلەسى 1960 جىلى اقتالادى. مەملەكەتتىك قاۋىپسىزدىك كوميتەتى 1938 جىلعى ايىپتاۋدى جوققا شىعارعانىمەن, اقىن بۇل جولى تولىق اقتالمايدى. قازان رەۆوليۋتسياسىنا دەيىنگى شىعارمالارىنىڭ يدەيالىق باعىتى تۋرالى قورىتىندى جاساۋ ماقساتىندا قازاقستان جازۋشىلار وداعى عالىمدارى مەن تاعى باسقا مەكەمەلەردەن قۇرىلعان توپقا تاپسىرادى. توپتى قازاقتىڭ بەلگىلى, تالانتتى اقىنى باسقارادى. بۇل توپ مىناداي قورىتىندى شىعارادى: ارتىندا قالعان جىرلارىنا كەلەتىن بولساق, تۇتاس العاندا ءوزىنىڭ يدەيالىق نەگىزىندە بۋرجۋازيالىق-ۇلتتىق, دەمەك كونتررەۆوليۋتسيالىق سيپاتتا بولعان. وسى توپقا تورەلىك جاساعان اقىن اعامىز ءوزىنىڭ قاتەلىگىن ءتۇسىنىپ, مويىنداپ ماعجاننىڭ 1989 جىلى شىققان جيناعىنا العىسوز جازىپتى. بۇل دا قازاقتىڭ بەلگىلى اقىنىنىڭ ارىلۋىنىڭ ءبىر جولى بولعان شىعار. جۋرناليست جاراسباي سۇلەيمەنوۆتىڭ ايتۋى بويىنشا جايىق اعامىزدىڭ ماعجانعا, ارتىندا قالعان جەسىرى زىليحاعا جاساعان جاقسىلىقتارى از ەمەس ەكەن. 1989 جىلى ماعجان جۇماباەۆ تولىق اقتالىپ, جاقاڭ اعامىز ءوزى كوپ قامقورلىق جاساعان جەڭگەسى زىليحامەن ەكەۋى ارمانداعان ماقساتتارىنا جەتىپ, ماعجان شىعارمالارىنىڭ جيناعىن كورىپ, ەكەۋى دە ماڭگىلىككە جول تارتتى. جايىق بەكتۇروۆ سىندى الاش قايراتكەرلەرىنىڭ قامقورشىسى بولعان تۇلعانىڭ تاعىلىمىنان كەيىنگى ۇرپاق حاباردار بولسىن, دەگەن نيەت بىزدىكى. وتكەننىڭ ونەگەسىن بويىنا ءتۇيىپ وسكەندەر ۇلتتىق بولمىسىن بيىك ۇستايتىنى انىق.
ەركىن داۋەش ۇلى, قازاقستان جۋرناليستەر وداعىنىڭ مۇشەسى, جايىقتانۋشى
استانا