وسىنداي شاعىن ەلدىڭ ەكسپو كورمەسىندە تىككەن پاۆيلونى دا شاعىن – بار-جوعى 18 شارشى مەتردى قۇرايدى. كەشە وسى ەلدىڭ ۇلتتىق كۇنى ءوتىپ, وعان پرەمەر-ءمينيسترى دجوسايا ۆورەكە باينيماراما جانە قازاقستاننىڭ سىرتقى ىستەر ءمينيسترى قايرات ءابدىراحمانوۆ قاتىستى.
– ەكسپو اياسىندا وتكىزىلىپ جاتقان ۇلتتىق كۇندەر حالىقارالىق مادەني بايلانىستاردىڭ دانەكەرى عانا ەمەس, ەلدەردىڭ ءوزارا سەنىمىن نىعايتاتىن ماڭىزدى تەتىك. وسىنداي كۇندەرى ءبىز بەلگىلى ءبىر ەلدىڭ سالت-داستۇرىمەن ەتەنە تانىسىپ, ولاردىڭ رۋحاني-مادەني الەمىنە دە تەرەڭ بويلاي تۇسەمىز, – دەدى سىرتقى ىستەر ءمينيسترى.
قازاقستان مەن فيدجي اراسىنداعى ديپلوماتيالىق بايلانىس 2012 جىلدىڭ 6 ماۋسىمىندا ورناعان. قىسقا مەرزىمگە قاراماستان ەكىجاقتى قارىم-قاتىناس جوعارى دەڭگەيگە جەتىپ, الىس-بەرىس كوبەيگەن.
ال ءفيدجيدىڭ پرەمەر-ءمينيسترى: «مەن قازاقستانمەن جاراسىمدى بايلانىس ورناتقانىمىزدى, ءوزارا قارىم-قاتىناسىمىز نىعايىپ كەلە جاتقانىن كورسەتكىم كەلىپ, اراداعى الىس جولعا قاراماستان عالامشاردىڭ سوناۋ شەتىندە جاتقان الىس مۇحيتتان ۇشىپ كەلدىم», دەي كەلە, جۇرتشىلىققا ءوز ەلى جونىندە باياندادى.
فيدجي – بالامالى ەنەرگيانى ءتيىمدى پايدالاناتىن مەملەكەت. مۇنداعى الەۋمەتتىك نىسانداردىڭ بارلىعى كۇن ەنەرگياسىنان قۋات الادى ەكەن. تىنىق مۇحيت پلازاسىندا ورنالاسقان ەلدىڭ سۇلۋلىعىنا ءتانتى بولۋ ءۇشىن جىلىنا ميلليونداعان تۋريست وسىندا اعىلادى.
ء«بىز تابيعاتتى قورعاۋدى ەڭ باستى ماقساتىمىز سانايمىز. ەلىمىزگە اكەلىنەتىن جوبالاردىڭ الدىمەن ەكولوگيالىق قاۋىپسىزدىگىنە كوز جەتكىزىپ الامىز. سىرتقى ورتاعا زيانىن تيگىزبەيتىن شارالاردى عانا بەكىتەمىز. وسى ارقىلى ءبىز الەمگە تابيعاتتىڭ ادامزات ءۇشىن قانشالىقتى قۇندى ەكەنىن دالەلدىك», دەيدى فيدجي پرەمەر-ءمينيسترى.
فيدجي جاڭعىرمالى ەنەرگيا كوزدەرىنە ەرەكشە قىزىعۋشىلىق تانىتادى. سەبەبى, بۇگىندە فيدجي يمپورتتالعان قازبا وتىنعا جىلىنا ميللياردتاعان دوللار جۇمساپ وتىر. ەندى ولار 2030 جىلعا قاراي سۋ, جەل جانە بيووتىنعا ءبىرجولا كوشۋدى وزدەرىنە ماقسات ەتىپ, كومىرتەك شىعىندارىن 30 پايىزعا قىسقارتپاق.
بۇدان كەيىن فيدجيلىكتەر قۇرمەتتى قوناقتارعا كورسەتەتىن «تاما» سالەم سالۋ ءراسىمىن جاسادى. بايقاعانىمىز, فيدجي – وتە ىرىمشىل ءارى داستۇرگە بەرىك حالىق. مىنەزدەرى اشىق-جارقىن, ءان مەن بيگە بەيىم بولعانىمەن, ءار نارسەنى باپتاپ, بيپازداپ جەتكىزگەندى ءجون كورەدى ەكەن. ءبىر سالەم سالعانىنىڭ ءوزى ءبىر ساعاتقا سوزىلدى. ودان كەيىن ەرەكشە قوناقتار مەن قولباسشىلارعا ارنالعان «كاۆا» ءراسىمىن وتكىزدى. بۇل دەگەنىڭىز, سول قوناقتىڭ ەندى «بوتەن ەمەس, ءوز ادامى بولعانىن» بىلدىرەتىن قاسيەتتى ءراسىم. وسى ارقىلى فيدجيلىكتەر قازاقتاردى وزدەرىنە دوس تۇتاتىنىن ءبىلدىرىپ, قوشەمەت كورسەتتى.
ۇلتتىق كۇن ادەمى ءان مەن بيلەرگە ۇلاسىپ, فيدجيلىكتەر تەك وزدەرىنە عانا ءتان ەرەكشە اۋەندەرىمەن اينالانى مەيىرىم شۋاعىنا بولەدى.
قىمبات توقتامۇرات,
«ەگەمەن قازاقستان»
سۋرەتتەردى تۇسىرگەن
ورىنباي بالمۇرات,
«ەگەمەن قازاقستان»