فۋتبول «استانا» فۋتبول كلۋبى 17 تامىزعا قاراعان ءتۇنى استانا ۋاقىتىمەن ساعات 00:45-تە چەمپيوندار ليگاسىنىڭ پلەي-وفف كەزەڭىندە گلازگودا شوتلانديانىڭ 48 دۇركىن چەمپيونى «سەلتيككە» قارسى وينايدى. «استانا» كومانداسىنىڭ باسشىلىعى, «استانا» پرەزيدەنتتىك كلۋبى جانە استانا قالاسىنىڭ اكىمدىگى «قازمەديا» ورتالىعىمەن بىرلەسكەن كەلىسىمگە كەلىپ, اتالعان ماتچتى «قازمەديانىڭ» «نۇرجول» بۋلۆارى جاعىنداعى ۇلكەن ەكراننان تىكەلەي ەفيردە كورسەتپەك.
دزيۋدو ءچيليدىڭ سانتياگو قالاسىندا دزيۋدودان كادەتتەر اراسىندا الەم چەمپيوناتى اياقتالدى. قازاقستاندىق بالعىن بالۋاندار بۇل بىرىنشىلىكتە ءبىر كۇمىس جانە ءبىر قولا مەدال يەلەندى. الەم چەمپيوناتىنا 64 ەلدەن 428 جاس سپورتشى قاتىسقان بولاتىن. 60 كيلودا بەلدەسكەن بالۋانىمىز نۇرزات سالىمباەۆ جارىستىڭ ەكىنشى كۇنىندە ەل قورجىنىنا العاشقى جۇلدەنى سالدى. ول فينالدىق باسەكەدە رەسەيلىك كازبەك ناگۋشەۆكە ەسە جىبەرىپ, كۇمىس مەدالعا يە بولدى. ال 81 كيلودا تاتاميگە شىققان قازاقستاندىق دزيۋدوشى سەرىكبولسىن شىنتاس قولا مەدال يەگەرى اتاندى. ءۇشىنشى ورىن ءۇشىن وتكەن بەلدەسۋدە وتانداسىمىز تاجىكستاندىق بالۋان, كادەتتەر اراسىندا ازيا چەمپيونى مادجيدوۆ دجوحونگيردى تازا جەڭدى.
تەننيس تەننيستەن قازاقستاننىڭ ءبىرىنشى ءنومىرلى, الەمنىڭ 52-ءشى راكەتكاسى يۋليا پۋتينتسەۆا الەمنىڭ مىقتى تەننيسشىلەرى باس قوسقان تسينتسينناتي (اقش) ءتۋرنيرىن جەڭىسپەن باستادى. وتانداسىمىز العاشقى كەزدەسۋىندە دۇنيەجۇزىلىك رەيتينگتە 75-ورىندا تۇرعان پاراگۆايلىق ۆەرونيكا سەپەدە-رويگتى 6:4, 3:6, 6:3 ەسەبىمەن ۇتتى. ەندى يۋ.پۋتينتسەۆا ءتۋرنيردىڭ ەكىنشى كەزەڭىندە الەمنىڭ 8-راكەتكاسى رەسەيلىك سۆەتلانا كۋزنەتسوۆامەن كورتقا شىعادى. ايتا كەتەيىك, ءتۋرنيردىڭ جۇلدە قورى 2,5 ملن اقش دوللارىنان اسادى.
ازىرلەگەن الي بيتورە, «ەگەمەن قازاقستان»