بەرگەر كەستەسى نە بەرەر ەكەن؟

بۇرىن ەكىنشى اينالىم اياقتالعان كەزدە 12 كلۋب ەكىگە ءبو­لىنىپ, 1-6 ورىن ارالى­عىنداعى كوماندالار جۇلدەگە تالاسسا, 7-12 ورىندارداعى ۇجىم­دار ءوزارا كىم مىقتىنى انىق­تايتىن. ال قازىر كوماندالار قوس التىلىققا جىكتەلمەيتىن بولدى. ويىندار كۇنتىزبەسى بەرگەر كەستەسى بويىنشا ءتۇزىلدى. ياعني, 12 كوماندا وزدەرىنىڭ ورىندارىنا سايكەس ساندارمەن تاڭبالانعان. سوعان سايكەس, كوشباسشى مەن اۋتسايدەر, ەكىنشى كەلە جاتقان كوماندا مەن 11-ءشى ورىنداعى كلۋب ءوزارا ويناپ, قالعاندارى دا وسى رەتپەن ءبىر رەتتەن كۇش سىناساتىن بولادى.

شەشۋشى اينالىمنىڭ ءبىرىنشى تۋرىندا توپ باسىنداعى «استانا» مەن «قايرات» كەزەكتى جەڭىستەرىنە قول جەتكىزدى. «تەمىرجولشىلار» سىرت الاڭدا «اقتوبە» كلۋبىن 3:0 ەسەبىمەن ويسىراتا جەڭسە, ال­ما­تىلىقتار «وقجەتپەستەن» كوپ كۇش جۇمساماي, ءبىر دوپ ايىر­ماشىلىعىمەن باسىم ءتۇستى. ءسويتىپ, كوش باستاعان قوس كو­ماندا وزگەلەرگە شاڭىن دا كور­سەتپەي, قارا ءۇزىپ كەتتى. ماسەلەن, ەكىنشى ورىندا كەلە جاتقان «قاي­رات» پەن ءۇشىنشى ساتىدا تۇرعان «ورداباسى» كلۋبىنىڭ ارا­سىن باقانداي توعىز ۇپاي ءبولىپ تۇر. سوعان قاراعاندا, الەكسەي پەترۋشيننىڭ شاكىرتتەرى الداعى ۋاقىتتا «كۇمىس» ەمەس, قولا جۇلدە ءۇشىن كۇرەسەتىن سىڭايلى. بۇل تۋردا «ورداباسى» قاراعاندىدا «شاحتەردەن» تەگەۋرىندى قارسى­لىق كورىپ, 1:2 ەسەبىمەن جەڭى­لۋگە ءماجبۇر بولدى. جالپى, باسشىسى مەن باپكەرى تۇگەل اۋىسقان «كەن­شىلەردىڭ» سوڭعى ويىن­دار­داعى سەرپىلىسى كوماندانىڭ جان­­كۇيەر­لەرىن قۋانىشقا بولەپ ءجۇر. قازىر قايتا تۇلەگەن «شاحتەردىڭ» چەم­پيوناتتاعى ۇزدىك التىلىقتىڭ ىشىنە ەنگەن جايى بار. 

«استانا» مەن «قايراتتىڭ» اراسى دا الشاق تۇر: جەتى ۇپاي دەگەنىڭىز چەمپيوناتتىڭ سوڭعى بولىگىندە ستانيمير ستويلوۆ ۇجى­مى ءۇشىن سەنىمدى قور. ەڭ باس­تىسى, مۇنداي باسىمدىق ەلور­دا كلۋبىنا چەمپيوندار ليگاسىنىڭ پلەي-وفف كەزەڭىندە الاڭداماي ويناۋعا مۇمكىندىك بەرەدى. تۋرنير كەستەسىنىڭ تومەنگى جاعىندا دا بىتىسپەس كۇرەس ءجۇرىپ جاتىر. ەشكىمنىڭ دە جوعارى توپ­تان «جەر اۋىپ» كەتكىسى جوق. كوش سوڭىنداعى «اقجايىق» تا­راز­عا بارىپ, كۇتپەگەن جەردەن جەر­گىلىكتى كلۋبتى 0:1 ەسەبىمەن جەڭدى دە, وزىنەن ءبىر ساتى جوعارى تۇرعان «اقتوبەنى» ىعىستىردى. ال ازۋلى «اقتوبەنىڭ» اۋتسايدەردىڭ كۇيىن كەشۋى كلۋب فاناتتارىنا دا وڭاي ءتيىپ جاتقان جوق.

سۇرمەرگەندەر اراسىنداعى تارتىس تا قىزىپ تۇر. «قايراتتىڭ» شابۋىلشىسى جەرار گوۋ مەن استانالىق جۋنيور كابانانگا ۇزەڭگى قاعىستىرىپ كەلەدى. ەكەۋى دە وسى تۋردا گول سوعىپ, دوپ سانىن, تيىسىنشە 16 جانە 15-كە جەت­كىزدى. ال ءۇشىنشى ورىندا كەلە جاتقان پاتريك ءتۆۋماسيدىڭ «اس­تانا» ەنشىسىندە ازىرگە 9 گول بار.

سونىمەن, ەل چەمپيوناتى كىم­نىڭ كىم ەكەنىن انىقتايتىن سوڭعى اينالىمعا دا جەتتى. وتار­بادان وزىپ كەتۋگە بولماس, دەسە دە كىمنىڭ قانداي سىباعا الارى قازىردىڭ وزىندە ايقىندالىپ قالعان سياقتى. دەگەنمەن, فۋتبولدان ءبارىن كۇتۋگە بولادى. ونىڭ ۇستىنە بەر­گەر كەستەسىنىڭ ىشىنە بۇككەن سىرى مەن توسىنسىيى دا مول بولۋى ابدەن مۇمكىن...

وتكەن 23-تۋرداعى ناتيجەلەر: «اقتوبە» – «استانا» – 0:3 (0:1), زەن­كوۆيچ, 33 – ءوز قاقپا­سىنا (0:1). كا­بانانگا, 51 (0:2). گرا­حوۆاتس, 79 (0:3). «قايسار» – «توبىل» – 1:0 (0:0), دجا دجەدجە, 55 (1:0). «شاحتەر» – «ورداباسى» - 2:1 (0:0), نۇرعاليەۆ, 60 (0:1). گا­بىشەۆ, 62 (1:1). سوكە, 80 (2:1). «وقجەتپەس» – «قايرات» – 0:1 (0:1), گوۋ, 33 (0:1). «اتىراۋ» – «ەر­تىس» – 0:0 (0:0). «تاراز» – «اق­جايىق» – 0:1 (0:0), شميدت, 72 (0:1). 24-تۋردىڭ ويىندارى 19-20 تامىز كۇندەرى وتەدى. 19 تا­مىز: «استانا» – «وقجەتپەس», «اق­جايىق» – «اقتوبە», «وردا­باسى» – «اتىراۋ». 20 تا­مىز: «قايرات» – «شاحتەر», «ە­ر­­تىس» – «قايسار», «تو­بىل» – «تاراز».

سۇرمەرگەندەر سايىسى: 1. جەرار گوۋ («قايرات», 1) – 16 دوپ;  2. جۋنيور كابانانگا («استانا», 1) – 15;  3. پاتريك تۆۋماسي («استانا») – 9.

قايرات ءابىلدا, «ەگەمەن قازاقستان»