دالالىق, اۋە جانە تەڭىز ماشىعى بويىنشا سايىس قورىتىندىسى ناتيجەسىندە رەسەي فەدەراتسياسىنىڭ كومانداسى ءبىرىنشى ورىندى, قىتاي حالىق رەسپۋبليكاسىنىڭ قۇراما كومانداسى ەكىنشى ورىندى يەلەندى.
قازاقستاندىق ارميانىڭ ابىرويى مەن بەدەلى ءۇشىن حالىقارالىق ارەنادا 350-دەن اسا اسكەري قىزمەتشى باق سىناستى. قازاقستاننىڭ كومانداسى ۇيىمداستىرۋشىلاردىڭ باعاسى بويىنشا كورنەكىلەردىڭ ءبىرى بولىپ تانىلدى. ويىن تورەشىلەرى القاسىنىڭ مۇشەلەرى قازاقستان قارۋلى كۇشتەرى اسكەري قىزمەتشىلەرىنىڭ جوعارى دايىندىق دەڭگەيلەرىن, كاسىپقويلىقتارى مەن جاۋىنگەرلىك داعدىلارىن اتاپ ءوتتى. قۇرامامىزدىڭ قورجىنىندا 3 التىن, 7 كۇمىس جانە 5 قولا مەدال بار.
ويىنداردىڭ سالتاناتتى جابىلۋ راسىمىنە قازاقستاننىڭ قورعانىس ءمينيسترى گەنەرال-پولكوۆنيك ساكەن جاسۇزاقوۆ قاتىستى. اسكەري ۆەدومستۆو باسشىسى بۇگىنگى تاڭداعى حالىقارالىق ويىندار دوستىقتىڭ, حالىقارالىق ىنتىماقتاستىقتىڭ, بەيبىتشىلىك پەن نيەتتەستىكتىڭ جاڭا نىشانىنا اينالىپ, ايرىقشا مازمۇنى جانە عالامات اۋقىمىمەن ەرەكشەلەندى دەپ اتاپ ءوتتى.
ارحو-2017 سايىسىندا قازاقستاندىق قۇرامانىڭ ونەر كورسەتۋىنىڭ شارىقتاۋ شەگى «تانك بياتلونى» بايقاۋى بولدى. وندا تانكىشىلەرىمىز 1 ساعات 45 مينۋت 41 سەكۋند ناتيجەسىمەن ت-72 تانكىسىنىڭ بازالىق مودەلىندە جوعارى كاسىبيلىك پەن باسقارۋ شەبەرلىگىن پاش ەتىپ, ەكىنشى ورىندى يەلەندى. «دوستاستىق جاۋىنگەرى» بايقاۋىنىڭ باس اتالىمنىڭ ەكى دۇركىن چەمپيونى اتانعان 97616 اسكەري ءبولىمىنىڭ باتارەيا سەرجانتى اعا سەرجانت ورىنبەك ساندىبەكوۆتىڭ جەڭىسىن ايرىقشا اتاپ وتكەن ءجون.
قازىرگى ۋاقىتتا ارميا حالىقارالىق ويىندارى حالىقارالىق اسكەري قوعامداستىقتا جوعارى مارتەبەگە يە بولىپ وتىر. 2017 جىلى ويىن باعدارلاماسىنا «ۇۇا سايىسى», «دوستاستىق جاۋىنگەرى», «جول ءپاترۋلى», «كۇزەت ساقشىسى» جانە «اسكەري راللي» اتتى بەس جاڭا بايقاۋ ەنگىزىلدى. جىل سايىن ەلدەر اراسىنداعى دوستاستىق ءوزارا قارىم-قاتىناستى نىعايتۋ مەن دامىتۋدىڭ ماڭىزدى فاكتورى بولا وتىرىپ, سايىستاردىڭ ءپىشىمى جەتىلدىرىلىپ, قاتىسۋشىلاردىڭ اۋقىمى كەڭەيە تۇسۋدە.
«ەگەمەن-اقپارات»