تەڭىز ورتاسىنداعى پروۆينتسيانىڭ اق مارجان قۇمدارى تالايدى ءتانتى ەتكەن. تروپيكالىق جەمىستەرى ءتىل ۇيىرەدى. تۇنىپ تۇرعان ەكزوتيكالىق ايماق قىتايدىڭ وڭتۇستىگىندە ورنالاسقان. حاينان شيپاجايلاردىڭ ارقاسىندا بىلتىر ەل ەكونوميكاسىنا 2 ملرد اقش دوللارىنان استام ينۆەستيتسيا تارتىپتى. ەندى ولار استانادا قازاقستاندىقتارمەن ءارتۇرلى باعىت بويىنشا جۇمىس ىستەۋگە ۋاعدالاستى. «بۇل قۇجات اياسىندا قىتايمەن ءوزارا ىنتىماقتاستىقتى دامىتۋ ءۇشىن ەكونوميكانىڭ ءتۇرلى سالالارىندا ناقتى ءىس-شارالار جوسپارىن قۇرۋدى ۇسىنباقپىز. الدا ءالى تالاي كەزدەسۋلەر وتەدى. اسپاناستى ەلىنىڭ ءتۋريزمى قارقىندى دامىعان. كورشىلەردىڭ بۇل تاجىريبەسىن زەرتتەپ, زەردەلەپ, ونى قازاقستانعا ەنگىزۋ كەرەك», دەيدى قازاقستان-قىتاي ساۋدا ىنتىماقتاستىعى قاۋىمداستىعىنىڭ باسقارۋشى ديرەكتورى باتىربەك اۋباكىروۆ.
حاينان تۋريزم سالاسى بويىنشا جىل باسىنان بەرى 320 ملن دوللار كولەمىندە پايدا تاپقان. قىتاي مادەنيەتىمەن 300 مىڭنان استام تۋريست تانىسسا, ولاردىڭ دەنى ورىس ءتىلدى دەمالۋشىلار ەكەن. جىل سوڭىنا دەيىن بۇل ايماققا 20 مىڭداي قازاقستاندىق بارادى دەپ كۇتىلۋدە.
پروۆينتسياعا ۆيزا رەسىمدەمەي-اق, تىكەلەي اۋە رەيسى ارقىلى ۇشىپ بارۋعا بولادى. حاينان پروۆينتسياسى حالىقتىق ساياسي كونسۋلتاتيۆتىك كەڭەسىنىڭ باسشىسى يۋي ءسيۋننىڭ ايتۋىنشا, دامۋ قارقىنى جوعارى ءوڭىردىڭ ارنايى ەكونوميكالىق ايماعى دا بار. ەندى ەكى ەلدىڭ قارىم-قاتىناسىن ودان ءارى نىعايتا تۇسۋگە بەتبۇرىس جاسالادى. حالىقارالىق كورمە اياسىنداعى حاينان پروۆينتسياسىنىڭ كۇندەرىنە وراي قىتايدان جيىرمادان اسا كاسىپكەر كەلدى. ولار مەديتسينا, اۋىل شارۋاشىلىعى, تۋريزم سالالارى بويىنشا جاڭا بايلانىستار ورناتۋعا نيەتتى.