جيىندى اشقان قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورىنىڭ اتقارۋشى ديرەكتورى قانات جۇماباەۆ فورۋمنىڭ ماقساتى ەكى ەلدىڭ ارىپتەستىك بايلانىسىن نىعايتىپ, ترانسشەكارالىق ماسەلەلەردى شەشۋگە ءۇن قوسۋ ەكەنىن جەتكىزدى. «پرەزيدەنت نۇرسۇلتان نازارباەۆ اتاپ وتكەندەي, ءبىز مەملەكەتتەر شەكاراسىندا ۇزاق مەرزىمدى ەكونوميكالىق ءوسۋ ورتالىقتارىن دامىتۋعا ءتيىسپىز. شەكارالاس ەلدەردىڭ اراسىندا تىعىز بايلانىس بولماسا, قانداي سالانىڭ دا وركەندەۋى قيىن. جالپى, ساياسي, ەكونوميكالىق, مادەني جانە گۋمانيتارلىق ۋاعدالاستىقتار ناقتى جوبالار ارقىلى جۇزەگە اسىرىلۋى كەرەك. وسى ورايدا قازىرگى زامان تەحنولوگياسىنىڭ ءتىلىن مەڭگەرگەن, جاڭاشا كوزقاراسى بار جاس عالىمداردىڭ پىكىرى مەن وي-ۇسىنىستارى ءبىز ءۇشىن ماڭىزدى», دەدى قانات نەسىپباي ۇلى.
ونىڭ ايتۋىنشا, ەلباسى قورىندا جاس عالىمدار كەڭەسى جۇمىس ىستەيدى. ولار رەسەي عىلىم اكادەمياسىنداعى جاستار كەڭەسىمەن بىرلەسىپ, جاھاندىق ترەندتەرگە قاتىستى ويلارىن ورتاعا سالىپ, ەكى ەل ۇكىمەتىنە, باسقا دا ۇيىمدارعا ۇسىنىمدار ازىرلەمەك. سونىمەن قاتار, اۋىل شارۋاشىلىعى, ماشينا جاساۋ, IT-تەحنولوگيا, بيوتەحنولوگيا سەكىلدى سالالاردا كوپتەگەن زەرتتەۋ جۇرگىزىپ, مەملەكەتتەردىڭ دامۋىنا پايداسى مول بىرلەسكەن جوبالار جاساماق.
بۇدان كەيىن ءسوز العان رەسەي عىلىم اكادەمياسىنىڭ جاس عالىمدار كەڭەسىنىڭ توراعاسى اندرەي كوتەلنيكوۆ بىلتىر جاس عالىمداردىڭ ءىى ەۋرازيالىق فورۋمىن وتكىزۋ مارتەبەسىن قازاقستان يەلەنگەنىن, وسىناۋ القالى جيىندا الەمدىك احۋالداردى شەشۋگە بايلانىستى ماڭىزدى ماسەلەلەر كوتەرىلگەنىن اتاپ ءوتتى. «قازىرگى تاڭدا الەم قۇبىلمالى جاعدايدى باستان كەشىپ وتىر. دۇنيە ءجۇزىنىڭ كوپتەگەن ەلىندەگى شيەلەنىستى جاعدايلاردان ءبىزدىڭ مەملەكەتتەر دە تىس قالا المايدى. سوندىقتان عالامشارداعى وقيعالاردى قالت جىبەرمەي, وزىندىك كوزقاراسىمدى ءبىلدىرىپ, بەلسەندى بولۋىمىز كەرەك. ءبىزدىڭ كۇش-جىگەرىمىز بىرىككەندە عانا كەدەرگىلەر مەن قيىندىقتاردى ەڭسەرە الامىز», دەدى ول.
ال س.كۋتاتەلادزە اتىنداعى جىلۋ فيزيكاسى ينستيتۋتىنىڭ عالىمى سەرگەي دۆوينيشنيكوۆ بيىل قازاقستان ەكسپو حالىقارالىق كورمەسىن وتكىزۋ ارقىلى كۇللى الەمنىڭ نازارىن وزىنە اۋدارىپ وتىرعانىن ايتا كەلە, بولاشاق ەنەرگياسى بۇگىندە عالامشاردى الاڭداتىپ وتىرعان وزەكتى تاقىرىپ ەكەنىن العا تارتتى. بالامالى ەنەرگيا كوزدەرىن دامىتۋدىڭ پايدالى تۇسىن ايتقان ول ەنەرگەتيكا تەحنولوگياسىنىڭ تيىمدىلىگىن ارتتىراتىن وپتيكالىق جۇيە تۋرالى جوباسىن جۇرتشىلىققا تانىستىردى. ونىڭ ايتۋىنشا, مۇنداي جاڭا جۇيە وندىرىستىك جانە تەحنيكالىق قىزمەت كورسەتۋ شىعىندارىن ازايتىپ, قاۋىپسىزدىكتى ارتتىراتىن كورىنەدى. سونداي-اق, ەنەرگەتيكالىق تەحنولوگيانىڭ قۋاتىن جوعارىلاتىپ, قولدانىستاعى ەنەرگواگرەگاتتاردى زاماناۋي دياگنوستيكالىق جۇيەمەن قامتاماسىز ەتەدى.
حالىقارالىق فورۋم بۇگىن بۋراباي كۋرورتتىق ايماعىنىڭ «وقجەتپەس» ەمدەۋ-ساۋىقتىرۋ كەشەنىندە جالعاسادى. وندا فورۋمعا كەلگەن بەلگىلى عالىم-ساراپشىلاردىڭ شەبەرلىك دارىستەرى ءوتىپ, قازاقستان مەن رەسەيدىڭ شەكارالاس اۋدانداردىڭ الەۋمەتتىك-ەكونوميكالىق جاعدايى مەن تۋريستىك كلاستەرىن دامىتۋ ماسەلەلەرى كەڭىنەن تالقىلانادى.
جالپى, القالى جيىنعا بارلىعى 100-دەن اسا عالىم قاتىسىپ وتىر. فورۋمدا بيوتەحنولوگيا, نانوتەحنولوگيا, ءداستۇرلى جانە بالامالى ەنەرگيانىڭ دامۋ بولاشاعىنا قاتىستى باس-اياعى 40-تان اسا بايانداما وقىلاتىن بولادى.
قىمبات توقتامۇرات, «ەگەمەن قازاقستان»