وتكەن جىلى شارۋاشىلىق گەكتارىنا 20 تسەنتنەردەن استىق جيناعان بولاتىن, بيىل قىركۇيەكتىڭ كۇنى اشىق بولسا مەجەلەگەن 24-28 تسەنتنەر دە بولىپ قالاتىنىن ايتتى شارۋاشىلىق جەتەكشىسى يۋري چەحوۆسكي. استىق جيناۋعا شارۋاشىلىق ساقاداي ساي وتىر. مەملەكەت تاراپىنان بەرىلگەن سۋبسيديا ديقاندار قولىن ۇزارتتى. وتكەن جىلى شارۋاشىلىق مال ونىمدەرى مەن استىق ءوندىرۋ ءۇشىن 85 ميلليون تەڭگە سۋبسيديا العان ەدى, بيىل جىل باسىنان بەرى 87 ميلليون تەڭگە كومەك الدى. بىراق شارۋاشىلىق جەتەكشىسى مينيسترگە تەحنيكا الۋعا سۋبسيديا بەرۋ جەڭىلدەتىلسە دەگەن تىلەگىن, سونىمەن قاتار الداعى ۋاقىتتا استىقتىڭ جەرگىلىكتى ەليتالى تۇقىمىنا كوشۋ كەرەكتىگىن ايتتى. «شەمينوۆكا» شارۋاشىلىعى استىق القابىندا بولعان كەزدەسۋگە وبلىسقا بەلگىلى ديقان ىبىراش ەستاەۆ تا كەلدى. وبلىستا استىق القابىن ءارتاراپتاندىرۋدى العاشقىلاردىڭ ءبىرى بولىپ قولعا العان دا ىبىراش ەستاي ۇلى بولاتىن. بۇگىندە 13 مىڭ گەكتاردىڭ 4 مىڭ گەكتارىنا قاتتى جانە جۇمساق بيداي سەپتى, قالعانىنىڭ بارلىعى مايلى جانە بۇرشاق داقىلدارى.
اسقار مىرزاحمەتوۆ اقمولا, سولتۇستىك قازاقستان جانە قوستاناي وبلىستارى اكىمدەرىنىڭ ورىنباسارلارىن, شارۋاشىلىق ماماندارىن جيناپ, استىق جيناۋ ناۋقانى مەن اۋىل شارۋاشىلىعىنىڭ شاعىن مەحانيزاتسياسىن دامىتۋ ماسەلەسى جونىندە جيىن وتكىزدى. بيىل ەلىمىز بويىنشا ەگىس القابى 22,1 ميلليون گەكتاردى قۇراپ وتىر. بۇل وتكەن جىلمەن سالىستىرعاندا 6 051 مىڭ گەكتارعا كوپ. ا.مىرزاحمەتوۆ جيىندا الدىمەن وبلىستارداعى استىق جيناۋ ناۋقانىنا دايىندىق بارىسىن تىڭدادى.
سوڭعى جىلدارى استىق ساپاسى تومەندەپ كەتكەن بولاتىن, سوعان وراي بيىل تۇقىم ءوسىرۋ شارۋاشىلىعىنا بولىنگەن بيۋدجەتتىك قارجىنىڭ كولەمى بىلتىرعى جىلمەن سالىستىرعاندا 2 ەسە كوبەيدى. وبلىستارداعى بيدايدىڭ ەليتالى تۇقىمىن وندىرەتىن عىلىمي-تاجىريبە ورتالىقتارىنىڭ باسشىلارىن تىڭداعان ۆيتسە-پرەمەر استىق ساپاسىن كوتەرۋ جۇمىستارىن شيراتۋ كەرەكتىگىن ايتتى.
– ءارتاراپتاندىرۋ ساياساتى سۋبسيديالاۋ مەحانيزمىن وزگەرتۋگە وڭ ىقپال ەتتى. اتاپ ايتقاندا, گەكتارلىق سۋبسيديادان شەكتەلىپ, ديقاندارعا مەملەكەتتىك قولداۋدى ونىمگە جانە وڭدەۋگە بەرۋ ارقىلى قولداۋ كورسەتىلدى. بيداي – ءبىزدىڭ برەندىمىز. الايدا نارىق سۇرانىمىن دا ەسكەرۋ كەرەك. ەكسپورتتىق جوعارى سۇرانىمعا يە مايلى, بۇرشاق داقىلداردىڭ القابىن كەڭەيتىپ, ولاردى ءوسىرۋدىڭ تەحنولوگياسىن بارىنشا مەڭگەرۋىمىز كەرەك. اگروونەركاسىپ كەشەنىن دامىتۋداعى مەملەكەتتىك باعدارلامادا ايتىلعان ءار اقپارات ديقاندارعا جەتۋى ءتيىس, – دەدى اسقار يسابەك ۇلى.
بيىل ەلىمىزدەگى استىق القاپتارىنىڭ گەكتار اينالىمى 12,6 تسەنتنەردەن كەلەدى دەپ بولجانىپ وتىر. سولتۇستىك وڭىردەگى اقمولا, قوستاناي, سولتۇستىك قازاقستان وبلىستارىندا استىق ءۇشىن اتتانىسقا دايىندىق جاقسى ەكەنى ايتىلدى. رەسپۋبليكا بويىنشا قاجەتتى ديزەل وتىنى 393,9 مىڭ توننا دەپ انىقتالدى, ونىڭ ىشىندە اقمولا وبلىسى 70 مىڭ توننا, قوستاناي وبلىسى 70 مىڭ توننا, سولتۇستىك قازاقستان وبلىسى 75 مىڭ توننا جانار-جاعارماي الاتىن بولادى.
پرەمەر-ءمينيستردىڭ ورىنباسارى − اۋىل شارۋاشىلىعى ءمينيسترى اسقار مىرزاحمەتوۆ ساپار بارىسىندا «ميلح» ءسۇت زاۋىتىندا بولىپ, اۋىلشارۋاشىلىق كووپەراتيۆتەرى جۇمىسىنىڭ ناتيجەسىنە كۋا بولدى. اۋىل شارۋاشىلىعىن مەحانيكالاندىرۋ جانە ەلەكترلەندىرۋ عىلىمي-زەرتتەۋ ينستيتۋتىنىڭ قوستاناي فيليالىنداعى تەحنيكانىڭ جاڭا تۇرلەرىمەن تانىستى.
ءنازيرا جارىمبەت, «ەگەمەن قازاقستان» قوستاناي وبلىسى