اتاپ ايتقاندا, 2015 جىلدان بۇگىنگى كۇنگە دەيىن پالاتا تاراپىنان 13 مىڭنان اسا شاعىن جانە ورتا بيزنەس وكىلدەرى تەگىن قىزمەت تۇرلەرىن العان. ال, بيىلعى جىلدىڭ باسىنان 3 مىڭنان اسا كاسىپكەرگە 5491 قىزمەت ءتۇرى كورسەتىلدى. بۇل تۋرالى بۇگىن وڭىرلىك پالاتانىڭ ديرەكتورى اسقار ابۋباكىروۆ وقو وڭىرلىك كوممۋنيكاتسيالار قىزمەتىندە وتكەن ءباسپاسوز ءماسليحاتىندا مالىمدەدى.
ونىڭ سوزىنشە, كاسىبىن دوڭگەلەتىپ جۇرگەندەر كوبىندە جەر تەلىمىن الۋ مەن سالىق تولەمدەرىنە قاتىستى جانە كەدەندىك راسىمدەر جۇرگىزۋ بويىنشا كومەك سۇراپ جاتادى ەكەن. سونداي-اق ءتۇرلى تەكسەرۋلەر مەن ورىنسىز ايىپپۇل سالۋ جاعدايلارى دا كاسىپكەرلەردى شارشاتىپ وتىر. وسىنداي كەلەڭسىزدىكتەردى بولدىرماس ءۇشىن ەندى كاسىپكەرلىك پالاتاسى ارنايى «call-ورتالىعىنىڭ» قىزمەتى مەن watshap جەلىسى ارقىلى بايلانىس نومەرىن ۇسىنىپ وتىر. ياعني كەز-كەلگەن بيزنەس وكىلى ءوزىن مازالاعان سۇراقتار مەن ۇسىنىس پىكىرلەرىن حابارلاسىپ, ايتا الادى.
«بيزنەس-جوسپاردى تەگىن جاساپ بەرەمىز. سونىمەن قاتار, قانداي قاراجات قۇجاتتارىن جيناۋ كەرەك, ونى دا تولىقتاي ءتۇسىندىرىپ, كاسىپكەرمەن بىرگە جينايمىز. سەبەبى, قازىرگى تاڭدا شارۋالار ول تۋرالى بىلە بەرمەيدى. سول سەبەپتەن, ءبىزدىڭ ماقساتىمىز اۋداندارعا تىكەلەي كومەكتەسۋ, وسى جوبالاردى جۇرگىزىپ, قارجىسىن الىپ بەرۋ», - دەدى وقو كاسىپكەرلىك پالاتاسىنىڭ ديرەكتورى اسقار ابۋباكىروۆ.
بۇدان بولەك, اسقار ابۋباكىروۆ پالاتا ىشىنەن قىتاي ەلىمەن كاسىپكەرلىك بايلانىستى نىعايتۋعا كومەكتەسەتىن مامان بارىن حابارلادى. كۇنشىعىس ەلىندە 20 جىل بويى تۇرعان ازامات ەندى كۇنگەيلىك كاسىپكەرلەرگە ساۋدا جاساۋ مەن قۇجاتتار راسىمدەۋگە دە قولعابىس ەتەتىنىن ايتىپ وتىر.