«الماتى سۋ حولدينگى» مقك-ءنىڭ حابارلاۋىنشا, شىنىپلاستيكالىق قولعاپپەن ساناتسيا ءادىسى ارقىلى قۇبىرلاردى قايتا قالپىنا كەلتىرۋ ءتاسىلى قولدانىستاعى سۋ قۇبىرلارى مەن كارىزدەردى قايتا جاساۋدىڭ زاماناۋي تەحنولوگياسى سانالادى. جوندەۋ جۇمىستارىن جەردى قازىپ اۋرەگە تۇسپەستەن جاڭا تەحنولوگيا ارقىلى جۇزەگە اسىرىپ, قۇبىرلاردىڭ قىزمەتىن 50 جىلعا ۇزارتۋعا بولاتىن بۇل ءادىس جەردى قازۋ, قايتا جابۋ سياقتى جۇمىس بارىسىن ەكى ەسەگە قىسقارتااتىن بولادى.
«الماتى سۋ حولدينگى» وكىلدەرىمەن الماتىدا وتكەن كەزدەسۋدە ماسكەۋ قالاسىنىڭ «موسۆودستوك» مبك باس ديرەكتورىنىڭ ورىنباسارى ۆلاديمير ياۆورسكي سوڭعى ەكى جىل ىشىندە اتالعان ءادىس بويىنشا 45 شاقىرىمعا سوزىلاتىن ءتۇرلى ديامەترلى سۋ قۇبىرىنىڭ قالپىنا كەلتىرىلگەنىن ايتتى. «جاڭا تەحنولوگيا بويىنشا جۇمىس ىستەۋ ءتيىمدى ءارى ارزانعا ءتۇسىپ تۇر, ونىڭ ۇستىنە, ماسكەۋدە جەر استى كوممۋنيكاتسيالارىنىڭ كوپتىگىنەن قازۋ جۇمىستارىن جۇرگىزۋ مۇمكىن ەمەس. سوندىقتان جاڭا تەحنولوگيا جەردى قازباي-اق, تۇرعىندارعا ەش كەدەرگى كەلتىرمەي-اق جۇمىس ىستەۋگە مۇمكىندىك بەرەدى. ونداي جۇمىستاردى ءبىر ءتۇننىڭ ىشىندە اتقارۋعا بولادى», – دەي كەلە, ۆ.ياۆورسكي قازىرگى كەزدە ماسكەۋدەگى 70 پايىزدان استام سۋ قۇبىرىنىڭ ەسكىرگەنىن, بۇرىن «موسۆودوستوك» جۇيەسى جىل سايىن الىپ مەگاپوليستەگى سۋ قۇبىرىنىڭ 10 پايىزىن عانا رەتكە كەلتىرسە, بيىل جاڭا تەحنولوگيا ارقىلى قۇبىرلاردىڭ 25-30 پايىزىنىڭ جاڭارتىلعانىن اتاپ ءوتتى.
«الماتى سۋ حولدينگىنىڭ» حابارلاۋىنشا, الماتىدا سۋ قۇبىرىن جاڭارتۋدىڭ بۇل ءادىسى سۋدان اجىراتۋ جەلىلەرىندە قولدانىلعان ەكەن. سۋ قۇبىرلارىن لاينەر ارقىلى قايتا جاڭارتۋعا مۇمكىندىك بەرەتىن جاڭا تەحنولوگيادا اۋىز سۋمەن قامتاماسىز ەتۋدە زياندى دەپ تانىلعان «ستيرول» (C₈H₈) قولدانىلمايتىنىن دا ايتا كەتۋ كەرەك.
اتاپ وتەرلىك جايت, بيىل الماتى شاھارىندا 57 كم ارىق جەلىلەرى, 146 كم جول جوندەلىپ, 97 مىڭ شارشى م تروتۋار اباتتاندىرىلسا, 32 كم جىلۋ جۇيەسى جاڭارتىلعان. بۇل وتكەن جىلمەن سالىستىرعاندا 2,7 ەسە كوپ كورسەتكىش. سونىمەن قاتار, بيىل قالا اۋماعىنداعى «ايگەرىم», «ۇلجان – 1, 2», «قاراسۋ», «اقبۇلاق», «دارحان», «قۇرىلىسشى», «وجەت», «ترۋدوۆيك», «شاڭىراق – 1, 2», «التىن بەسىك», «دوستىق» سياقتى بىرقاتار ىقشام اۋدانداردا 20 مىڭنان استام ۇيگە 380 كم سۋ جانە كارىز قۇبىرلارى تارتىلۋدا.
ميرا بايبەك,
«ەگەمەن قازاقستان»
الماتى