ا.ەسىموۆ نۇرسۇلتان نازارباەۆقا كورمە مەن پاۆيلوندارعا كەلۋشىلەر سانى تۋرالى مالىمدەدى.
– كورمەگە ءۇش ايدا 2 ميلليون ادامنىڭ كەلۋى جوسپارلانعان بولاتىن. بۇگىندە كەلۋشىلەر سانى 2,5 ميلليوننان استى. حالىقارالىق پاۆيلوندارعا 5 ميلليوننان استام ادامنىڭ كەلۋى كوزدەلگەن بولسا, قازىر ولاردى 20 ميلليونعا جۋىق ادام ارالاپ كورگەن. كەلۋشىلەر ءۇشىن ەڭ تانىمال پاۆيلون – «نۇر الەم» سفەراسى. وعان 831 مىڭ تۋريست كەلگەن. كورمە سوڭىنا دەيىن بۇل كورسەتكىش 1 ميلليوننان اسادى دەپ جوسپارلانىپ وتىر. «ەكسپو-2017» كورمەسى اشىلعاننان بەرى 68 ەلدىڭ ۇلتتىق كۇندەرى ءوتتى. سونداي-اق, كورمەگە 106 مارتەبەلى مەيمان كەلدى, اتاپ ايتقاندا, 19 مەملەكەت باسشىسى, 16 پرەمەر-مينيستر جانە ولاردىڭ ورىنباسارلارى, 11 پارلامەنت جەتەكشىسى جانە ولاردىڭ ورىنباسارلارى, 60 مينيستر جانە ولاردىڭ ورىنباسارلارى بار. شەت مەملەكەتتەر وزدەرىنىڭ پاۆيلوندارىن ازىرلەۋگە 100 ميلليون دوللارعا جۋىق قاراجات جۇمسادى, – دەدى استانا ەكسپو-2017» ۇلتتىق كومپانياسى» اق باسقارماسىنىڭ توراعاسى.
سونىمەن بىرگە, ەلباسىعا تۋريزم سالاسىنداعى كورسەتكىشتەردىڭ ايتارلىقتاي ءوسىپ كەلە جاتقانى جونىندە باياندالدى. ا.ەسىموۆتىڭ مالىمەتىنە سايكەس, استانا قالاسىنداعى قوناق ۇيلەر مەن حوستەلدەر سانى 27%-عا وسكەن. ولارعا قوناقتاردى ورنالاستىرۋ كورسەتكىشى 60%-دى قۇراپ وتىر.
مەملەكەت باسشىسى حالىقارالىق كورمەنى وتكىزۋ ەلوردانى جانە جالپى ەل ەكونوميكاسىن دامىتۋعا مۋلتيپليكاتيۆتىك وڭ اسەر بەرەتىنىن ەرەكشە اتاپ ءوتتى.
– «ەكسپو» كورمەسى ەكونوميكانىڭ بارلىق سەكتورىنىڭ دامۋىنا سەرپىن بەرۋدە. قوناق ۇيلەر مەن كوپشىلىك تاماقتاناتىن ورىنداردا تۋريستەر سانى ارتتى. سول سەبەپتى ەلوردا بيۋدجەتىنە قوسىمشا قاراجات ءتۇسىپ وتىر. جاڭا جۇمىس ورىندارى اشىلدى. قازاقستاننىڭ 196 كومپانياسى كورمە كەشەنىنىڭ قۇرىلىسىنا قاتىستى. بۇل 200 مىڭعا جۋىق ادامدى قامتىدى. قازىر كورمە قىزمەتىن قامتاماسىز ەتەتىن 21 مىڭداي ادام جۇمىس ىستەۋدە, – دەدى قازاقستان پرەزيدەنتى.
كەزدەسۋ بارىسىندا «استانا ەكسپو-2017» ۇلتتىق كومپانياسى» اق باسقارماسىنىڭ توراعاسى كورمەنى دايىنداۋعا جانە وتكىزۋگە بولىنگەن قاراجاتتىڭ ۇنەمدەلۋى جونىندە مالىمەت بەردى. ا.ەسىموۆتىڭ اقپاراتى بويىنشا, تەحنيكالىق-ەكونوميكالىق نەگىزدەمەگە سايكەس قۇرىلىسقا 816 ملرد تەڭگە قاراستىرىلعان. كەيىننەن بۇل قاراجات وڭتايلاندىرۋ ەسەبىنەن 452 ملرد تەڭگەگە ازايتىلدى.
بۇدان بولەك, نۇرسۇلتان نازارباەۆقا كورمە جۇمىسى اياقتالعاننان كەيىن ونىڭ نىساندارىن پايدالانۋ جونىندە ۇسىنىستار ايتىلدى. كورمە اۋماعىنا «استانا» حالىقارالىق قارجى ورتالىعىن, IT-ستارتاپتار پاركىن ورنالاستىرىپ, بىرقاتار ورتالىق پەن پاۆيلونداردى ەكسپو مۇراسى رەتىندە ساقتاپ قالۋ كوزدەلىپ وتىر.
كەزدەسۋ سوڭىندا ەلباسى «استانا ەكسپو-2017» ۇلتتىق كومپانياسى» اق باسقارما توراعاسىنىڭ جۇمىسىن لايىقتى باعالاپ, بىرقاتار ناقتى تاپسىرما بەردى.