اتاپ ايتقاندا, اۋدان ونەركاسىبىنىڭ 84 پايىزىن وڭدەۋ ونەركاسىبى قۇرايتىندىقتان جاڭا كاسىپورىندار اشۋ ەسەبىنەن ءونىم كولەمى ارتتى. جانە بار رەزەرۆتەردى پايدالانۋ ەسەبىنەن اۋدان ەكونوميكاسى كوتەرىلىپ, بەلسەندى كاسىپكەرلىك سۋبەكتىلەردىڭ سانى 13977 بىرلىككە جەتسە, شاعىن جانە ورتا كاسىپكەرلىك سۋبەكتىلەرى وندىرگەن ءونىم كولەمى 25 ملرد تەڭگەگە جەتتى.
مىسالى, ونەركاسىپتى دامىتۋدىڭ ءبىرىنشى باعىتى بويىنشا سايرام اۋدانىنا قاراستى قارامۇرت اۋىلىندا جەكە كاسىپكەر يپتيحار كوچكاروۆتىڭ 2016 جىلدىڭ جەلتوقسان ايىندا ىسكە قوسىلعان وسىمدىك مايىن وندىرەتىن تسەحى بۇگىندە قارقىندى جۇمىس ىستەۋدە. جوبا قۇنى 350 ملن تەڭگە.
قازىرگى تاڭدا وندىرىستە كۇنباعىس, ماقسارى مايلارى «التىن ماي» ماركالى اتاۋىن قولدانىپ كەلەدى. بۇل شيكىزاتتار ماقتاارال اۋدانى مەن وسكەمەننەن جەتكىزىلەدى. سونداي-اق, دايىن ءونىمدى وتكىزۋ جاعى دا شەشىمىن تاپقان. ولار وبلىس اۋداندارى مەن شىمكەنت قالاسىنىڭ سۋپەرماركەتتەرىنە ساتىلۋدا. اۋداننان وندىرىلگەن وسىمدىك مايى قىرعىزستان رەسپۋبليكاسىنا دا جىبەرىلۋدە. سونىمەن بىرگە, قازىرگى كەزدە يران رەسپۋبليكاسىنا دايىن ءونىمدى جىبەرۋ جۇمىستارى جۇرگىزىلۋدە.
ايتا كەتەرلىگى, سايرام اۋدانى «بيزنەستىڭ جول كارتاسى 2020» بيزنەستى دامىتۋ مەن قولداۋدىڭ بىرىڭعاي باعدارلاماسى اياسىندا 2016 جىلى اۋداندا قۇنى 5 ملرد تەڭگە بولاتىن 17 جوبا قولداۋ تاپتى. سونىڭ ءبىرى رەتىندە, وسى وسىمدىك مايىن ءوندىرۋ تسەحى باعدارلامانىڭ سۋبسيديالاۋ باعىتى اياسىندا قولداۋ العان.
كاسىپورىنداردىڭ اۋداندا كوپتەپ اشىلۋى جەرگىلىكتى تۇرعىنداردى تۇراقتى جۇمىسپەن قامتۋعا زور ۇلەس قوسۋدا. ياعني, جوعارىدا كورسەتىلگەن وسىمدىك مايى شيكىزاتىن وندىرەتىن كاسىپورىن جەرگىلىكتى 25 ادامدى تۇراقتى جۇمىس ورنىمەن قامتىپ وتىر. سونىمەن قاتار, كاسىپكەر سىيىمدىلىعى 10 مىڭ توننالىق قويما قۇرىلىسىن ىسكە قوسقان.