ج. قاسىمبەك ۇلتتىق ينۆەستيتسيالىق ستراتەگيا قىزمەتىنىڭ ماڭىزدى باعىتتارىنىڭ ءبىرى وڭىرلىك جانە ورتالىق دەڭگەيلەردە بارلىق ماسەلەلەردى شەشۋ ءۇشىن ينۆەستورلارعا ارنالعان «بىرىڭعاي تەرەزە» جۇمىسى ەكەندىگىنە توقتالدى. قازىرگى تاڭدا وسىنداي «تەرەزە» قىزمەتىن Kazakh Invest اتقارادى.
«بۇل ۇلتتىق كومپانيا ينۆەستورلارمەن جۇمىستىڭ باسىنان سوڭىنا دەيىن بىرگە جۇمىس ىستەيتىن بولادى. ياعني, ول ينۆەستوردى قارسى الادى جانە ونى قاجەتتى نورماتيۆتىك, زاڭدىق نەمەسە وزگە جاعىنان قولداۋ كورسەتەدى, وسى جوبانى ىسكە اسىرۋ كەزىندە دە ءارى قاراي سۇيەمەلدەيتىن بولادى», - دەدى جەڭىس قاسىمبەك.
مينيستر ينۆەستورلار نەگىزىنەن رۇقسات قۇجاتتارىن الۋ كەزىندە, تەكسەرىستەن ءوتۋ بارىسىندا جانە جەرگىلىكتى وڭىرلىك ورگاندارمەن جۇمىس ىستەۋ كەزىندە ماسەلەلەرگە تاپ بولاتىنىن اتاپ ءوتتى.
«سوندىقتان دا بىزدە Kazakh Invest-تەن وزگە, ينۆەستيتسيالىق ومبۋدسمەن سەكىلدى ينستيتۋت بار, ول – ينۆەستيتسيالار جانە دامۋ ءمينيسترى. ءبىز تۇراقتى تۇردە ۇشجاقتى كەزدەسۋلەر وتكىزىپ تۇرامىز, ياعني, ينۆەستوردىڭ اتىنان قانداي دا ءبىر شاعىم نەمەسە ءوتىنىش كەلىپ تۇسسە, ءبىز مينيسترلىككە ينۆەستور مەن ماسەلە باعىتتالعان تاراپتى شاقىرامىز. ۇشجاقتى فورماتتا ماسەلەنى شەشۋگە تىرىسامىز», - دەپ ءتۇسىندىرىپ ءوتتى ج. قاسىمبەك.
جالپى, ءمينيستردىڭ ايتۋىنشا, بۇگىنگى كۇنى Kazakh Invest 147 جوبا بويىنشا جۇمىس جاسايدى جانە وسى نەگىزدەگى ءتۇرلى ماسەلەلەردى شەشۋ تۇرعىسىنان كومەك كورسەتۋمەن اينالىسادى.