اكادەميانىڭ وقۋ جۇمىسى جانە اقپاراتتىق تەحنولوگيالار جونىندەگى ۆيتسە-رەكتورى ءالتاير احمەتوۆتىڭ پىكىرىنشە, ۇمىتكەرگە قويىلاتىن تالاپتار قازىرگى زامان اعىمىنا لايىق جەتىلدىرىلگەن. ول مۇنداي جۇيەنى «نازارباەۆ ۋنيۆەرسيتەتىنەن» كەيىن ەكىنشى بولىپ قابىلداپ وتىرعان مەملەكەتتىك باسقارۋ اكادەمياسى ەكەنىن ايتادى.
«جاڭا جۇيە ارقىلى ءبىلىم الۋعا ىنتالى مەملەكەتتىك قىزمەتكەردى تاڭداۋعا مۇمكىندىك مول. قازىرگى قابىلداۋ ەمتيحانى تىكەلەي ۇمىتكەرمەن جۇمىس ىستەۋگە, ونىڭ قارىم-قابىلەتىن باعامداۋعا وتە قولايدى», – دەيدى ءالتاير احمەتوۆ.
مەملەكەتتىك باسقارۋ اكادەمياسىنداعى ءبىلىم جۇيەسى دە, باعالاۋ دا ايتارلىقتاي وزگەرتىلگەن. وقۋ جىلى بارىسىندا ستۋدەنتتەر شەتەلگە بارىپ, ونداعى مەملەكەتتىك قىزمەتكەرلەردىڭ تاجىريبەسىن ۇيرەنىپ قايتادى. سونداي-اق, ولاردىڭ ەڭبەكتەرىن باعالاۋ ءتۇرلى دەڭگەيلەرمەن جۇرگىزىلەدى. ءالتاير احمەتوۆ ايتۋىنشا, جاڭا جۇيە ەلباسى نۇرسۇلتان نازارباەۆتىڭ «100 ناقتى قادام» باعدارلاماسىنىڭ 15-قادامىن جۇزەگە اسىرۋ بويىنشا جاسالىپ جاتىر.
اكادەمياعا وقۋعا ءتۇسۋ ءۇشىن ۇمىتكەر ءۇش كەزەڭنەن وتەدى. ەڭ اۋەلى قاجەتتى قۇجاتتارىمەن بىرگە ەكى شىعارما قوسىپ تاپسىرادى. بىرىندە ىنتالاندىرۋ جونىندە ەسسە جازسا, كەلەسى شىعارمانىڭ تاقىرىبى ماماندىققا بايلانىستى. وسى ارقىلى ۇمىتكەردىڭ تالدامالىق جانە سىني ويلاۋ قابىلەتى انىقتالادى. شىعارمالاردى ەكى ساراپشى باعالايدى ەكەن. ولارعا تەكسەرىلەتىن شىعارمانىڭ اۆتورى جانە ءبىر-ءبىرى تۋرالى اقپارات بەرىلمەيدى. الدا-جالدا ەكى ساراپشىنىڭ باعالاۋىنداعى ايىرماشىلىق وتە ۇلكەن بولسا, شىعارمانى ءۇشىنشى ساراپشى تەكسەرەتىن كورىنەدى. قورىتىندى ناتيجە سودان كەيىن شىعادى. ال شىعارما جازۋعا كەرەكتى اقپاراتتىڭ ءبارى اكادەميا سايتىندا تۇر.
ەكىنشى كەزەڭدە ۇمىتكەردىڭ اعىلشىن ءتىلىن ءبىلۋ دەڭگەيى انىقتالادى. ءالتاير احمەتوۆ قازاق ءتىلى مەن ورىس ءتىلى كۇندەلىكتى قولدانىستا ەكەنىن, سوندىقتان الەمدىك ءتىل – اعىلشىن ءتىلى تاڭدالعانىن ايتادى. بۇل كەزەڭدە APTIS ءتىل باعالاۋ جۇيەسى تاڭدالعان. تەستى وتكىزۋ قۇزىرەتى تولىقتاي British Council-عا سەنىپ تاپسىرىلىپتى. كومپيۋتەر ارقىلى جۇرگىزىلەتىن بۇل ەمتيحاننىڭ قورىتىندىسى لوندونعا جىبەرىلىپ, ناتيجە 72 ساعاتتان كەيىن بەلگىلى بولادى. ايتسە دە, بۇل كەزەڭنىڭ ەرەكشەلىگى بار. ەگەر ۇمىتكەر بۇعان دەيىن IELTS, TOEFL نە APTIS تاپسىرىپ, ونىڭ ناتيجەسى قويىلعان تالاپقا ساي بولسا, ولار بىردەن كەلەسى كەزەڭگە وتەدى. سونىمەن قاتار, «نازارباەۆ ۋنيۆەرسيتەتى» سەكىلدى ءبىلىم بەرۋ جۇيەسى اعىلشىن تىلىنە نەگىزدەلگەن جوعارعى وقۋ ورىندارىنىڭ تۇلەكتەرى دە ەكىنشى ەمتيحاندى تاپسىرۋى مىندەتتى ەمەس.
ءۇشىنشى كەزەڭدە ارنايى كوميسسيا مۇشەلەرى ۇمىتكەرمەن بەتپە-بەت اڭگىمەلەسەدى. وندا تالاپكەردىڭ كاسىبي, تالدامالىق, كوممۋنيكاتيۆتىك جانە تۇلعالىق قاسيەتتەرى باعالانادى. سۇحبات ەركىن فورماتتا, ۇمىتكەر قالاعان تىلدە وتەدى ەكەن. الايدا ول قالعان ەكى تىلدەگى سۇراقتارعا دا جاۋاپ بەرۋگە مىندەتتى. ءالتاير احمەتوۆتىڭ ايتۋىنشا, كوميسسيا قۇرامىنا پرەزيدەنت اكىمشىلىگى, قاۋىپسىزدىك كەڭەسى, قالا اكىمدەرى سەكىلدى قۇزىرەتتى مەكەمە وكىلدەرى كىرەدى.
«تالاپكەرلەر سۇحباتتاسۋدىڭ قالاي وتەتىنىنەن حاباردار بولسا دا, ءدال بۇگىنگىدەي ەمەن-جارقىن اڭگىمەلەسەتىنىمىزدى كۇتكەن جوق. وسىنداي ەركىندىك ارقىلى ۇمىتكەردىڭ بۇكىل قابىلەتىنەن حاباردار بولۋعا مۇمكىندىك مول», – دەيدى قاۋىپسىزدىك كەڭەسى حاتشىلىعىنىڭ سەكتور مەڭگەرۋشىسى سەرگەي كونوۆالوۆ.
باسقارۋ اكادەمياسىنا وقۋعا قابىلداۋ 10 ماماندىق بويىنشا جۇرگىزىلدى. بيىل ماگيستراتۋراعا 120, دوكتورلىققا 12 گرانت ءبولىنىپتى. بۇدان بولەك, وقۋ ورنىندا اقىلى تۇردە دە ءبىلىم الۋعا مۇمكىندىك جاسالعان. بۇگىندە قىرعىزستان, تاجىكستان جانە موڭعوليا سەكىلدى ەلدەردىڭ مەملەكەتتىك قىزمەتكەرلەرى اكادەميادا تاجىريبەسىن جەتىلدىرۋگە نيەت ءبىلدىرىپ وتىر. مەملەكەتتىك باسقارۋ اكادەمياسىنا بيىل وقۋعا تۇسكەندەر الداعى اپتادا بەلگىلى بولادى.