تولە بي بابامىزدىڭ اتىنداعى كوشەدە تۇراتىن ءبىزدىڭ سۇلتانباي اتتى كورشىمىز بار. سەكسەننىڭ سەڭگىرىنەن اسقان قاريانى اۋىل-ايماعى سىيلاپ, قۇرمەت تۇتادى. بالكىم, جاستايىنان كوپ قيىندىق كورىپ وسكەندىكتەن دە بولار, اتامىز بالالارى مەن نەمەرەلەرىنە ۇنەمى اقىل-كەڭەسىن ايتىپ, ەڭبەكتى سۇيۋگە, قولىنان كەلسە ادامدارعا جاقسىلىق جاساپ, ۇلكەندى سىيلاۋعا باۋلىپ وتىرادى. تاياۋدا سول سۇلتەكەڭ بىزگە وي سالارلىق مىنا ءبىر جايدى ايتىپ بەردى.
قارت ادام, ونىڭ ۇستىنە توسەك تارتىپ جاتقان اۋرۋ كەمپىرى بولعاسىن, ول كىسى كوپشىلىك ورىنعا ونشا شىعا بەرمەيدى. بىردە ورتالىقتا ءبىر جۇمىسى بولىپ, ۇيىنەن شىقپاي ما. كوشەنىڭ باسىندا جەكە جەڭىل كولىگىمەن بوس كەتىپ بارا جاتقان كورشىسىن كورىپ, «الا كەتسەيشى» دەپ قولىن كوتەرەدى. دەگەنمەن, كورشى بالا مۇنى كورسە دە كورمەگەن بولىپ, جانىنان توقتاماي زۋ ەتىپ وتە شىعادى. كۇندە كورىپ جۇرگەن كورشىسى, ونىڭ بەر جاعىندا كولىگى بوس كەتىپ بارا جاتىر, الا كەتسە قايتەدى ەكەن دەپ بۇل كىسى رەنجىپ-اق قالادى. «جارايدى, ءبىر جاققا اسىعىپ بارا جاتقان شىعار. توقتاپ, جاعدايىن ايتسا رەنجىمەس ەدىم عوي. بىراق سول بالانىڭ دۇنيەگە ءبىرتابان جاقىن ەكەنىن اركىم-اركىمنەن ەستىپ قالامىن. دۇنيەنى كىم جەك كورۋشى ەدى؟ ءبىر مەزگىل ۇلكەندەردى دە سىيلاپ, كوڭىلىن اۋلاپ تۇرعانعا نە جەتسىن», دەيدى سۇلتەكەڭ بىزگە.
ءۋاجدى سوزگە نە ايتارسىڭ؟ ويلانىپ قالدىق. شىنىندا, قاي-قايسىمىزدىڭ باسىمىزدان كوپ بولماسا دا, اندا-ساندا كەزدەسىپ قالىپ جۇرگەن جاي ەكەن-اۋ. كوپكە توپىراق شاشۋعا بولماس. الايدا كەيبىر جاستارىمىزدىڭ اراسىندا دۇنيەقوڭىزدىق پەيىل تانىتىپ, ۇلكەندى سىيلاۋدى ۇمىتىپ كەتىپ جاتاتىن جايلاردىڭ ارا-تۇرا بولسا دا كەزدەسىپ قالاتىنىن نەسىنە جاسىرايىق.
سوڭعى كەزدەرى ماعان ادامدار اراسىندا مەيىرىم, شاپاعات ازايىپ بارا جاتقان سياقتى كورىنەدى دە تۇرادى. بالكىم, مەنىڭ بۇل پىكىرىم دۇرىس ەمەس تە شىعار. قالاي بولعاندا دا, زاماندى تۇرمىس بيلەگەن مىنا كۇيبەڭ تىرشىلىكتە ۇلكەندى سىيلاپ, قاريالارىمىزدى قۇرمەتتەپ, تيىندى كوبىرەك ويلاعاننان گورى, ازاماتتىق اردىڭ ودان دا قىمبات, قۇندى ەكەندىگىن ەستەن شىعارماي جۇرگەنگە نە جەتسىن, شىركىن.
ءبىر مەزگىل پايدا ويلاعانىمىز دا دۇرىس شىعار. الايدا, دۇنيەنىڭ ق ۇلى بولماي, قازاقىلىق قالپىمىزدى ساقتاپ, ۇلكەنگە ىزەت, كىشىگە جول كورسەتىپ, اردى دا ويلاي بىلسەك, كانەكي...
كارىباي امزە ۇلى, زەينەتكەر وڭتۇستىك قازاقستان وبلىسى, سوزاق اۋدانى