ەرمەك اعامىزدى اۋىزعا الساق, مارقۇمنىڭ ءوزىن عانا ەسكە الماي, سەركەباەۆتار اۋلەتىن تۇگەندەپ كەتەتىن ادەتىمىز بار. الماس سەركەباەۆ, بايعالي سەركەباەۆ سىندى ءبىرى كومپوزيتور, ءبىرى مۋزىكانت ۇلدارى مەن جازۋشى قىزى يرينا سەركەباەۆا, ءىنىسى مۇرات سەركەباەۆ, ونىڭ سكريپكاشى قىزى ءجاميلا سەركەباەۆا وسى ۇلكەن اۋلەتتىڭ ماقتانىشىنا اينالعان جاندار. اكەسىن ەسكە الۋ كەشىنە ماسكەۋدە تۇراتىن ۇلى, اتاقتى «ا’ستۋديو» توبىنىڭ پروديۋسەرى بايعالي سەركەباەۆ قاتىستى.
كونتسەرتتىڭ اشىلۋ سالتاناتىندا ساحناعا كوتەرىلگەن بايعالي سەركەباەۆ ءوز سوزىندە كونتسەرتكە مەتروپوليتەن, لا سكالا, ماريا تەاترلارىنىڭ كورەرمەندەرىن ءتانتى ەتكەن ايگىلى ارتىستەردىڭ قاتىسىپ جاتقانىن, بۇل اكەسىنە كورسەتىلگەن ۇلكەن قۇرمەت ەكەنىن ايتسا, مادەنيەت جانە سپورت ءمينيسترى ارىستانبەك مۇحامەدي ۇلى 1967 جىلى كانادادا وتكەن دۇنيەجۇزىلىك كورمە اياسىندا ەرمەك سەركەباەۆتىڭ قازاقستان داڭقىن اسقاقتاتقانىن مالىمدەدى. ء«بىزدىڭ اتاقتى ەر اعامىز – ەرمەك سەركەباەۆ مونرەالدا ەلىمىزدىڭ ونەرىن الەمگە تانىتىپ ەدى. ەندى, مىنە, اراعا 50 جىل سالىپ ءبىز ەكسپو حالىقارالىق كورمەسى اياسىندا ەرمەك سەركەباەۆتى ەسكە الۋ كەشىن وتكىزىپ وتىرمىز», دەدى ول.
بارقىت ءۇندى باريتون داۋىستىڭ يەسى, كسرو حالىق ءارتىسى, مەملەكەتتىك سىيلىقتىڭ يەگەرى, سوتسياليستىك ەڭبەك ەرى, ۇلاعاتتى ۇستاز ەرمەك سەركەباەۆتى ەسكە الۋعا ارنالعان كەشتە الەمنىڭ ۇزدىك باس داۋىس يەسى, گرەممي سىيلىعىنىڭ ەكى دۇركىن يەگەرى, مەتروپوليتەن-وپەرا, ماريا تەاترى جانە پاريج وپەراسىنىڭ ءسوليسى يلدار ابدرازاكوۆ, ماريا تەاترىنىڭ ءسوليسى, Opera Awards سىيلىعىنىڭ لاۋرەاتى اسميك گريگوريان, ماسكەۋدەگى ۇلكەن تەاتردىڭ جەتەكشى سوليستەرى يگور گولوۆاتەنكو مەن اگۋندا كۋلاەۆا, ماريا تەاترىنىڭ ءسوليسى سەرگەي سكوروحودوۆ سىندى ساڭلاقتار ساحناعا شىقتى. سونداي-اق, ءوز ەلىمىزدەن «استانا وپەرا» تەاترىنىڭ سوليستەرى سۇندەت بايعوجين, ازامات جىلتىركوزوۆ, سالتانات احمەتوۆا سىندى تانىمال ونەرپازدار ءان شىرقادى.
بۇل كەشتە الەمدىك وپەرا كلاسسيكاسىنىڭ جاۋھارلارى دج. روسسيني, دج. ۆەردي, ج.بيزە, دج. پۋچچيني, ا.جۇبانوۆ, ل.حاميدي وپەرالارىنان اريالار ايتىلدى. رەسەيدىڭ ەڭبەك سىڭىرگەن ءارتىسى, تاتارستاننىڭ حالىق ءارتىسى رەنات سالاۆاتوۆتىڭ جەتەكشىلىگىمەن «استانا وپەرا» تەاترىنىڭ سيمفونيالىق وركەسترى انشىلەردى سۇيەمەلدەدى.
كونتسەرتكە ەرمەك سەركەباەۆپەن جەكە تانىس بولعان ايگىلى كينو, ونەر, وپەرا قايراتكەرلەرىنىڭ دە قاتىسقانىن ايتا كەتكەن ءجون. بەينەمونيتوردا لەۆ لەششەنكو, ارمەن دجيگارحانيان, بيبىگۇل تولەگەنوۆا, يوسيف كوبزون, تامارا سينياۆسكايالار اتاقتى ءانشىنىڭ سيرەك تالانتى جايىندا ءسوز ەتتى.
ايگۇل سەيىل, «ەگەمەن قازاقستان»