باقىتجان ساعىنتاەۆ ۇكىمەتارالىق كەڭەستىڭ وتىرىسى استانادا ءوتىپ جاتقان حالىقارالىق ەكسپو-2017 كورمەسىنە ورايلاستىرىلعانىن اتاپ ءوتتى, سونداي-اق قاتىسۋشىلاردىڭ قولداۋى مەن ەلدەردىڭ شاراعا بەلسەندى اتسالىسىپ جاتقاندارىنا العىسىن ءبىلدىردى.
وتىرىس اياسىندا ەۋرازيالىق ەكونوميكالىق وداقتىڭ تسيفرلىق كۇن ءتارتىبىن ىسكە اسىرۋدىڭ نەگىزگى باعىتتارىن دايىنداۋ ماسەلەلەرى, ەۋرازەق مۇشە مەملەكەتتەردىڭ ەڭبەكشىلەرىن زەينەتاقىمەن قامتاماسىز ەتۋ تۋرالى شارت جوباسى, سونىمەن قاتار ەۋرازەق پەن يران رەسپۋبليكاسى اراسىندا ەركىن ساۋدا ايماعىن قۇرۋعا باعىتتالعان ۋاقىتشا كەلىسىمگە قول قويۋ بويىنشا كەلىسسىزدەر جۇرگىزۋ بارىسى تالقىلاندى.
سونداي-اق, ەۋرازەق مۇشە مەملەكەتتەرگە اكەلىنەتىن تاۋارلاردى كەدەندىك دەكلاراتسيالاۋعا جۇرگىزىلگەن مونيتورينگ قورىتىندىسى شىعارىلدى جانە وداق اياسىندا اۆياتسيالىق وقيعالاردى زەرتتەۋ كوميسسياسىن قۇرۋ ماسەلەلەرى قارالدى.
بۇدان وزگە, وداقتىڭ وزگە ەلىنىڭ اۋماعىندا كاسىپكەرلىك قىزمەتتى جۇزەگە اسىرۋ ءۇشىن, ەۋرازيالىق ەكونوميكالىق وداققا مۇشە ءبىر مەملەكەتتە بەرىلگەن ۇلتتىق جانە حالىقارالىق جۇرگىزۋشى كۋالىگىن ءوزارا مويىنداۋ ماسەلەسى قوزعالدى.
ايتا كەتەيىك, ەۇاك وتىرىسى بيىلدىققا ءۇشىنشى رەت وتكىزىلىپ جاتىر. بۇعان دەيىن كەڭەس وتىرىستارى ناۋرىز ايىندا بىشكەك قالاسىندا (قىرعىزستان) جانە مامىر ايىندا قازان قالاسىندا (رەسەي فەدەراتسياسى) وتكەن بولاتىن.