بۇگىندە قازاقستاندىق مۇعالىمدەردىڭ ورتاشا ايلىعى 70 مىڭ – 90 مىڭ تەڭگە ارالىعىندا. بۇل تۋرالى ورتالىق كوممۋنيكاتسيالار ورتالىعىندا وتكەن ءباسپاسوز ءماسليحاتىندا ءبىلىم جانە عىلىم ۆيتسە-ءمينيسترى بيبىگۇل اسىلوۆا مالىمدەدى.
«مەملەكەتتىك قولداۋدىڭ ارقاسىندا مۇعالىمدەردىڭ جالاقىسى ەكى-ءۇش جىل سايىن كوبەيىپ وتىر. بۇگىندە قازاقستاندىق ۇستازداردىڭ ورتاشا جالاقىسى 70-90 مىڭ تەڭگە كولەمىندە. ونىڭ ۇستىنە قوسىمشا جۇمىستارىنا بايلانىستى 25 پايىز ۇستەماقى قوسىلادى. سوندا ورتا ەسەپپەن ءبىر مۇعالىم ايىنا 105-110 مىڭ جالاقى الادى», دەيدى ۆيتسە-مينيستر.
ول سونداي-اق, مۇعالىمدەردىڭ ايلىعىن كوبەيتۋ ماسەلەسى كۇن تارتىبىنەن تۇسپەيتىنىن, بيۋدجەتتىڭ جاعدايىنا بايلانىستى بىرتىندەپ ءوسىپ وتىراتىنىن اتاپ ءوتتى.
ال وقۋ ءبىتىرىپ, جۇمىسقا جاڭادان كىرگەن جاس مامان العاشقى كەزدەرى 70 مىڭ تەڭگە جالاقى الادى. بۇل ءىسىن ەندى باستاعان مۇعالىم ءۇشىن جەتكىلىكتى دەپ سانايدى ۆيتسە-مينيستر.
قىمبات توقتامۇرات
«ەگەمەن قازاقستان»