بۇل قاناتقاقتى جوبا اياسىندا 100 وقۋشى ريددەر اگرارلىق-تەحنيكالىق كوللەدجىندە ەڭبەك نارىعىندا سۇرانىسقا يە ماماندىقتاردى مەڭگەرىپ شىعاتىن بولادى. وبلىس اكىمىنىڭ ورىنباسارى ءا.ءنۇسىپوۆا ايماق باسشىسى د.احمەتوۆتىڭ قولداۋىمەن 2017 وقۋ جىلىندا وسى ماقساتقا بيۋدجەتتەن 200 ميلليون تەڭگەدەن استام قاراجات بولىنگەنىن ايتادى.
وقۋ بىتىرگەن جاستاردى جۇمىسپەن قامتۋعا ىقىلاس تانىتىپ وتىرعان «قازتسينك» جشس اكىمشىلىك ماسەلەلەر جونىندەگى اتقارۋشى ديرەكتورى ا.لازارەۆتىڭ سوزىنە سەنسەك, كاسىپورىنعا ەڭ الدىمەن كەن-بايىتۋ جانە مەتاللۋرگيا سالاسىنىڭ ماماندارى قاجەت.
«ريددەر قالاسىندا ەلىمىزدىڭ ەشبىر جەرىندە جوق ەرەكشە وقۋ ورتالىعى بار. وندا ارنايى جابدىقتالعان كابينادا وتىرعان وقۋشى ءوز بەتىمەن جۇرەتىن ماشينانى باسقارىپ, داعدىلانادى. قۇرال-جابدىق شاحتاداعى ءىس-قيمىلداردى تولىق قايتالايدى. بارلىق ءىس-ارەكەتتەر ەكراننان 3D كەسكىنىندە كورىنگەندىكتەن, ستۋدەنت ءوزىن شاحتادا جۇرگەندەي سەزىنەدى. سونىڭ ناتيجەسىندە ولارعا كەيىن وندىرىستە جۇمىس ىستەۋگە جەڭىل بولادى», دەيدى ول.
وبلىستىق ءبىلىم باسقارماسىنىڭ باسشىسى ن.ءابجاپاروۆتىڭ ايتۋىنشا, 2017-2018 وقۋ جىلدارىندا وڭىردە كوللەدجدەردە ءبىلىم الۋعا التى مىڭنان استام مەملەكەتتىك گرانت ءبولىنىپتى. بارلىق گرانتتاردىڭ ءتورت جارىم مىڭى جەرگىلىكتى بيۋدجەتتەن, 1,7 ورىن رەسپۋبليكالىق بيۋدجەتتەن قارجىلاندىرىلادى ەكەن. «ۇستىمىزدەگى وقۋ جىلىندا 210 بالا «سەرپىن» باعدارلاماسىمەن ماماندىق مەڭگەرىپ شىعاتىن بولادى. اتالمىش باعدارلاما بويىنشا بارلىعى 400-دەن استام جاس ءبىلىم الىپ جاتىر. ءبىتىرىپ شىققان 20 تۇلەك قازىر «قازتسينك» كاسىپورنىنىڭ ريددەردەگى ءوندىرىس ورىندارىندا جۇمىس ىستەيدى», دەيدى باسقارما باسشىسى.
مەموراندۋم اياسىندا ءبىلىم الىپ شىققان جاستار تەك «قازتسينك» كومپانياسىندا عانا ەمەس, سونىمەن قاتار «قازمينەرالس» سياقتى كاسىپورىنداردا دا جۇمىس ىستەي الادى. الداعى ۋاقىتتا بۇل جوبانى وسكەمەن قالاسىندا دا جۇزەگە اسىرۋ جوسپارلانعان.
ازامات قاسىم,
«ەگەمەن قازاقستان»
وسكەمەن