الايدا, سول جاس بۋىنعا كەلەشەكتىڭ كىلتىن قالاي تابىستايمىز, ولاردى ءوز بولاشاعىنا جاۋاپتى ەتىپ تاربيەلەۋدىڭ تەتىگى قانداي؟ جالپى, قازىرگى ءجاسوسپىرىم ەل بولاشاعىنا قانشالىقتى سەنىمدى؟ كەلەشەك كوكجيەگىنە كوز جىبەرگەندە, نەنى كورگەندەي؟ مىنە, «مەن جانە مەنىڭ قازاقستانىم 2025 جىلى» اتتى رەسپۋبليكالىق بايقاۋدى ۇيىمداستىرۋدىڭ نەگىزگى كوزدەگەنى دە وسى ساۋالداردىڭ جاۋابىن ولاردىڭ وزىمەن بىرلەسە وتىرىپ ىزدەپ كورۋ ەدى. بايقاۋ قورىتىندىسىندا ىرىكتەلگەن شىعارمالار ساپاسى مەن وي-تولعام ورەسى ەلىمىزدە كەلەشەكتىڭ ەنشىسىندەگى وزەكتى ماسەلەلەرگە بەيجاي قارامايتىن, ەلجاندى, وتانسۇيگىش, سانالى جاستاردىڭ ءوسىپ كەلە جاتقانىن العا تارتتى.
جالپى ءبىلىم بەرەتىن مەكتەپتەردىڭ 5-9 سىنىپ وقۋشىلارى اراسىندا وتكىزىلگەن «مەن جانە مەنىڭ قازاقستانىم 2025 جىلى» اتتى رەسپۋبليكالىق بايقاۋدىڭ جەڭىمپازدارىن كەشە ۇلتتىق ەكونوميكا ءمينيسترى تيمۋر سۇلەيمەنوۆ ماراپاتتادى. شارا ۇلتتىق ەكونوميكا, ءبىلىم جانە عىلىم مينيسترلىكتەرىنىڭ قولداۋىمەن ۇيىمداستىرىلعان. بايقاۋ شارتى بويىنشا, وقۋشىلار 2025 جىلى قازاقستاندى قالاي ەلەستەتىنى تۋرالى وي-تولعامدارىن جازعان. وعان قازاقستاننىڭ بارلىق ايماقتارىنان قازاق, اعىلشىن جانە ورىس تىلدەرىندە 100-دەن اسا شىعارما (ەسسە) ۇسىنىلىپ, ولاردىڭ ىشىنەن ەڭ ۇزدىك 27 جۇمىس تاڭدالىپ الىنعان. جۇلدەگە يە بولعان 10 وقۋشىعا ۇلتتىق ەكونوميكا ءمينيسترى العىس حات پەن ەكسپو-2017 حالىقارالىق كورمەسىنىڭ بيلەتىن تابىس ەتتى. ءمينيستردىڭ قولىنان ماراپات العانداردىڭ قاتارىندا الماتىدان كەلگەن ءالي حاسەن, گۇلناز مولداش, استانادان دانا وسپانوۆا مەن ءاديا باباجانوۆا, قىزىلوردا وبلىسىنان ارۋجان قونىسبەكوۆا, وسكەمەننەن زەرە ماراتوۆا, پاۆلوداردان سوفيا نۇرەكەنوۆا بار. اقتىق سايىسقا شىققان 17 وقۋشى ەستەلىك ماقتاۋ قاعازدارىن يەلەندى.
قازاقستاننىڭ بولاشاعىن جاس ۇرپاقتىڭ كوزىمەن كورۋ اعا بۋىنعا ماڭىزدى. بايقاۋدى وتكىزۋ تۋرالى يدەيا دا وسى سەبەپتەن تۋىنداعان. تيمۋر سۇلەيمەنوۆتىڭ ايتۋىنشا, شىعارمالاردا كەزدەسكەن قىزىقتى ءارى ماڭىزدى ۇسىنىستار ەلىمىزدە ازىرلەنىپ جاتقان قازاقستاننىڭ 2025 جىلعى ستراتەگيالىق دامۋ جوسپارىندا ەسكەرىلەتىن بولادى. سونىمەن قاتار, مينيستر قازىرگى ۋاقىتتا اتالعان قۇجاتتى ساراپتاما جانە بيزنەس-بىرلەستىكتەردىڭ وكىلدەرى زەرتتەپ جاتقانىن جەتكىزدى. مينيستر بايقاۋدان شەت قالماي, بەلسەندىلىك تانىتقان وقۋشىلارعا العىسىن ءبىلدىردى.
جەڭىمپازدار دا بۇل شارانىڭ قورىتىندىسى وسىلاي مينيسترلىك دەڭگەيىندە وتكىزىلىپ, استاناعا شاقىرىلىپ, وزدەرىنە بالا دەمەي, ايرىقشا كوڭىل ءبولىنىپ جاتقانىنا ريزاشىلىقتارىن جاسىرمادى. بۇل ءوز كەزەگىندە, جاستاردىڭ ەلگە دەگەن سۇيىسپەنشىلىگىن ارتتىرىپ, اعا بۋىن الدىنداعى جاۋاپكەرشىلىگىن ەسەلەي تۇسەتىنىن ايتتى.
بايقاۋعا قاتىسقان ءار وقۋشى ەلىمىزدە بولىپ جاتقان وقيعالاردى ساراپتاپ, وزدەرىنىڭ تىڭ يدەيالارىمەن بولىسكەن. «بايقاۋ بولاتىنىن ەستىگەن كەزدە بىرنەشە كۇن بويى ويىمدى جۇيەلەپ ءجۇردىم. ودان كەيىن وي-تولعاۋىمدى قاعازعا ءتۇسىرىپ كورگەنىمدە مۇعالىمىمە قاتتى ۇنادى. ەكسپو-2017 كورمەسىن تاماشالاۋعا مۇمكىندىك العانىما قۋانىشتىمىن», دەيدى وسكەمەننەن كەلگەن جامبىل گيمنازياسىنىڭ وقۋشىسى زەرە ماراتوۆا. ال قىزىلوردا وبلىسى «دارىن» مەكتەبىندە ءبىلىم الاتىن ارۋجان قونىسباەۆا ءوز شىعارماسىندا جاڭا تەحنولوگيالاردى قولدانىپ سالىنعان كيىز ءۇي تۋرالى بايانداعان. جۇلدەلى ءبىرىنشى ورىن العان الماتىلىق ءالي حاسەننىڭ قوزعاعان ماسەلەسى تىپتەن اۋقىمدى. «قازاقستاندى 2025 جىلى قالاي ەلەستەتەمىن» دەگەن تاقىرىپتا جازعان شىعارمامدا ناقتى ءتورت ماسەلەگە توقتالدىم. ءبىرىنشىسى, استانادا ءوتىپ جاتقان ەكسپو-2017 كورمەسى. ەكىنشىسى, ەلباسىنىڭ «بولاشاققا باعدار: رۋحاني جاڭعىرۋ» اتتى ماقالاسىندا ايتىپ وتكەندەي, 2025 جىلى لاتىن الىپبيىنە تولىقتاي كوشۋ. ءۇشىنشىسى, ءوز ايماعىمىزدان شىققان تاريحي تۇلعالاردى بارىنشا زەرتتەۋ, كوپشىلىككە تانىتۋ جانە مەشىتتەر سالۋ. ال ءتورتىنشىسى, ەلىمىزدەگى كەز كەلگەن مەكتەپتىڭ نازارباەۆ زياتكەرلىك مەكتەبىمەن دەڭگەيلەس بولۋى», دەيدى ءالي حاسەن.
مەكتەپ وقۋشىلارىنىڭ بايقاۋى ايماقتىق جانە رەسپۋبليكالىق كەزەڭدەرگە بولىنگەن. ەكىنشى كەزەڭنەن سۇرىنبەي وتكەن وي-تولعاۋلاردى ارنايى كوميسسيا لوگيكا جانە تالقىلاۋدىڭ اۋقىمى, باعانىڭ ناقتىلىعى مەن شەشىمى, يدەيانىڭ بىرەگەيلىگى مەن بەرە ءبىلۋى سىندى تالاپتار بويىنشا باعالادى. اقتىق سايىسقا شىققاندار تاريحي وقيعالار مەن جەكە دۇنيەتانىمىنا سۇيەنە وتىرىپ ەلدىڭ دامۋىنا قاتىستى وي-پىكىرلەرىمەن ەرەكشەلەنگەن.
دينارا بىتىك,
«ەگەمەن قازاقستان»
سۋرەتتى تۇسىرگەن
ورىنباي بالمۇرات,
«ەگەمەن قازاقستان»