مەرەكەلىك ءىس-شارادا قازاقستان مەن گۆينەيانىڭ تۋلارى كوتەرىلىپ, ءانۇراندارى شىرقالدى. جيىندا ءدىن ىستەرى جانە ازاماتتىق قوعام ۆيتسە-ءمينيسترى ابزال نۇكەنوۆ العىسوز الدى.
– الدىمەن, قازاق ەلى اتىنان, سونداي-اق, ءوز اتىمنان گۆينەيا رەسپۋبليكاسىنىڭ دەلەگاتسياسىنا جانە ەلوردامىزعا كەلگەن شەتەلدىك قوناقتارعا قوش كەلدىڭىزدەر دەگىم كەلەدى. ەكسپو-2017 – ەلىمىز ءۇشىن ماڭىزدى وقيعا. بيىل قوس مەملەكەت اراسىنداعى قارىم-قاتىناستىڭ ورناعانىنا 25 جىل تولىپ وتىر. گۆينەيا قازاقستاننىڭ باتىس افريكاداعى ماڭىزدى ارىپتەسى بولىپ ەسەپتەلەدى, – دەدى ابزال نۇكەن ۇلى.
ەكسپو كورمەسى جاسىل ەنەرگەتيكانى ناسيحاتتاۋمەن قاتار, ينۆەستورلارعا دا ىڭعايلى جاعداي تۋعىزىپ وتىر. باتىس افريكادا ورنالاسقان بۇل ەل مينەرالدى, گيدروەنەرگەتيكالىق جانە اۋىل شارۋاشىلىعى رەسۋرستارىنا وتە باي. سونىمەن قاتار, الماز, التىن, ۋران, بوكسيت سەكىلدى زاتتار بويىنشا الەمدە الدىڭعى قاتاردى يەلەنىپ تۇر. بۇل مەملەكەت بۇگىندە بالامالى قۋات كوزىنە تولىعىمەن قولداۋ ءبىلدىرىپ وتىر. وسى باعىتتى دامىتۋ ءۇشىن ەنەرگەتيكاسى دامىعان مەملەكەتتەردىڭ تاجىريبەسىن قولدانىسقا ەنگىزۋدى جوسپارعا الىپ وتىر.
مالىمەتتەر بويىنشا بۇل مەملەكەتتە قالادان تىسقارى ورنالاسقان كەيبىر ەلدى مەكەندەردە ءالى كۇنگە دەيىن جارىق جۇيەسى قويىلماعان. حالقىنىڭ 70 پايىزى اۋىل شارۋاشىلىعى سالاسىندا قىزمەت ەتەدى.
– الداعى ءۇش جىلدا, ياعني 2020 جىلعا دەيىن گۆينەيا رەسپۋبليكاسىنىڭ 65 پايىزىن ەلەكتر ەنەرگياسىمەن قامتاماسىز ەتۋدى ماقسات ەتىپ وتىرمىز. وعان جاعدايىمىز تولىق جەتەدى, قاجەتتى رەسۋرس تا بار. اسىرەسە, سۋ ەلەكتر ستانسالارىن كوبىرەك سالۋعا مۇمكىندىك بار. مىنە, قازىرگى ۋاقىتتا وسى سالانى دامىتساق دەپ جوسپارلاپ وتىرمىز. الايدا, بۇل ماقساتىمىزدى جۇزەگە اسىرۋ ءۇشىن قارجى قاجەت, ينۆەستورلاردى بارىنشا تارتۋىمىز كەرەك. قازىر ارنايى كەلىسسوزدەر جۇرگىزىپ جاتىرمىز. ەكسپو كورمەسىنىڭ بۇل رەتتە ۇلكەن سەپتىگى تيەتىنىنە سەنىمىم مول, – دەدى گۆينەيا ساۋدا مينيسترلىگىنىڭ شتاب باسشىسى بالا دوپاۆوگي.
شارا سوڭىندا ارنايى مۋزىكانتتار توبى ەكسپو اۋماعىن دۋمانداتىپ ءوتىپ, افريكا پلازا پاۆيلونىنا كىردى.
ايان ءابدۋالي,
«ەگەمەن قازاقستان»