شەتەلدىك كومپانيا باسشىلارىمەن كەزدەسىپ, وبلىستىڭ بالامالى ەنەرگيا كوزى جايىندا جان-جاقتى تاجىريبە الماسۋدى ماقسات ەتكەن جەتىسۋلىقتار ساپار بارىسىندا رەسەي, گەرمانيا, سەربيا, يسپانيا, شري-لانكا جانە نيدەرلاند مەملەكەتتەرىنىڭ پاۆيلوندارىن ارالادى. ولاردىڭ جاسىل ەنەرگياعا قوسقان ۇلەستەرىمەن تانىستى.
«الماتى وبىسىنىڭ تابيعاتى جاڭعىرمالى ەنەرگيا كوزدەرىنەن جوعارى ناتيجە شىعارۋعا مول مۇمكىندىك بەرەدى. ءبىز ءۇشىن ەنەرگيا كوزدەرىنىڭ ەڭ جاڭا ءارى ماڭىزدى مەحانيزمدەرى مەن جەتىستىكتەرىن بىلىكتى مامانداردان ۇيرەنۋ وتە ماڭىزدى», دەيدى دەلەگاتسيا جەتەكشىسى, وبلىس اكىمىنىڭ ءبىرىنشى ورىنباسارى ءلاززات تۇرلاشوۆ.
دەلەگاتسيا ەكىنشى كۇنگى ساپاردا جاپونيا, وڭتۇستىك كورەيا, فرانتسيا, اقش جانە باسقا دا الپاۋىت مەملەكەتتەردىڭ پاۆيلوندارىندا كوپشىلىك نازارىنا ۇسىنىلعان جەتىستىكتەرمەن تانىسۋدا. جۇمىس ساپارىنىڭ ناتيجەسىندە بالامالى ەنەرگەتيكالىق كومپانيالارمەن سەرىكتەستىك پەن ىنتىماقتاستىق ورناتىپ, جۇمىس ىستەيتىن ارنايى كوميسسيا قۇرامى بەكىتىلەتىن بولادى.