سونىمەن بىرگە, وبلىس ورتالىعىنىڭ شىعىسىنا, وتەناي اۋىلدىق وكرۋگىنە, وڭتۇستىك-شىعىس جانە سولتۇستىك اۋماقتارعا گاز جەلىسى تارتىلادى. بۇل جۇمىستار ويداعىداي ورىندالسا, جىل سوڭىنا قاراي جوسپارداعى 22 پايىز عانا ەمەس, قالا تۇرعىندارىنىڭ جارتىسى كوگىلدىر وتىندى پايدالانا الادى دەگەن ءسوز. تالدىقورعان قالاسىنا گاز قۇبىرلارىن تارتۋ جۇمىستارى ءتورت كەزەڭ بويىنشا ورىندالادى. العاشقى كەزەكتە «قاراتال» شاعىن اۋدانى, ابىلاي حان, جانسۇگىروۆ, گاۋھار انا كوشەلەرىنىڭ بويىنداعى, وبلىستىق اۋرۋحانا, اۆتوبەكەت جانە ورتالىق بازاردىڭ ماڭىنداعى جەكە جانە كوپ قاباتتى تۇرعىن ۇيلەر, «تالدىقورعان» يندۋستريالىق ايماعى مەن وڭتۇستىك وندىرىستىك ايماق گاز جەلىسىمەن قامتىلادى. ەكىنشى كەزەكتە «سامال», «جاستار» شاعىن اۋداندارى مەن قابانباي باتىر, چكالوۆ, بەلوۆ, شەۆچەنكو كوشەلەرىنىڭ بويىنداعى جەكە جانە كوپ قاباتتى تۇرعىن ۇيلەرگە گاز جەتكىزىلەدى. ءۇشىنشى كەزەكتە وتەناي جانە «شىعىس» شاعىن اۋدانى مەن جانسۇگىروۆ, الماتى, تىلەك ابجاليەۆ كوشەسىنىڭ تۇرعىندارى كوگىلدىر وتىنعا قول جەتكىزەدى. سوڭعى كەزەكتە ەركىن, كوكتال اۋىلدارى مەن قالا ماڭىنداعى ساياجايلار گازداندىرىلادى. بۇگىنگە دەيىن تالدىقورعان قالاسىنا گاز جەلىسىن تارتۋ جۇمىسى بەلگىلەنگەن جوسپار بويىنشا ورىندالعان. دەمەك, بيىلعى جوسپاردىڭ ۋاقتىلى ورىندالاتىنىنا سەنىم مول. ايتالىق, وتكەن جىلى قالانىڭ ورتالىق اۋماعىنىڭ – 23, شىعىس اۋماقتىڭ – 17, وتەناي سەلولىق وكرۋگىنىڭ – 7, ەركىن سەلولىق وكرۋگىنىڭ – 20, وڭتۇستىك-باتىس اۋماقتىڭ – 11, سولتۇستىك اۋماقتىڭ – 22 پايىزىنا گاز تارتىلعان. بيىلعى جوسپار بويىنشا قالانىڭ ورتالىق اۋماعىنىڭ – 22, شىعىس اۋماقتىڭ – 15, وتەناي اۋىلدىق وكرۋگىنىڭ – 13, وڭتۇستىك-شىعىس اۋماقتىڭ – 13, سولتۇستىك اۋماقتىڭ – 27 پايىزىنا گاز جەلىسى جەتكىزىلەدى. دەمەك, جىل سوڭىنا قاراي قالانىڭ 50 پايىزدان استامى كوگىلدىر وتىنمەن قامتىلادى. كەلىسىمشارتقا وراي, گازبەن قامتۋدى مىندەتىنە العان مەكەمەلەر گاز قۇبىرىن ءار ءۇيدىڭ قاقپاسىنا دەيىن جەتكىزىپ بەرۋگە مىندەتتى. ودان ارعى جۇمىستار مەن ونىڭ شىعىنى تۇرعىنداردىڭ وزىنە تيەسىلى. سىرتتاعى گاز جەلىسىن ۇيگە ەنگىزۋگە قاتىستى جۇمىستاردى ءۇي يەلەرى ءوز قارجىسىمەن اتقارادى. ىرگەدەن ءوتىپ جاتقان قولجەتىمدى گازدى قول سوزىم جەرگە تارتىپ الۋ كىم-كىمگە دە قيىندىق تۋعىزا قويمايتىنى انىق.
الماس ءنۇسىپ, «ەگەمەن قازاقستان»
الماتى وبلىسى