ەلباسى ف.-ۆ.شتاينمايەردىڭ گەرمانيا پرەزيدەنتى رەتىندە قازاقستانعا العاشقى ساپارمەن كەلىپ وتىرعانىن اتاپ ءوتىپ, وعان «ەكسپو-2017» كورمەسىن ارالاپ كورۋگە قىزىعۋشىلىق تانىتقانى ءۇشىن ريزاشىلىق ءبىلدىردى.
– مەن ءسىزدى ەلىڭىزدىڭ پرەزيدەنتى لاۋازىمىنا سايلانۋىڭىزبەن قۇتتىقتاۋدىڭ وسىنداي مۇمكىندىگى تۋىنداعانىنا قۋانىشتىمىن. ءسىز دۇنيە جۇزىنە بەلگىلى ءارى كوپشىلىك قۇرمەتتەيتىن ساياساتكەرسىز. گەرمانيا حالقى وزىڭىزدەي بەدەلدى پرەزيدەنتكە يە بولدى. ءبىز ءبىر-ءبىرىمىزدى كوپتەن بەرى بىلەمىز. سىزبەن ىنتىماقتاستىقتا بولىپ, جۇزدەسۋ ءاردايىم كوڭىل قۋانتادى. ءسىز سىرتقى ىستەر ءمينيسترى لاۋازىمىندا بولعان كەزدە ءبىز اۋقىمدى ءتۇرلى ماسەلەلەردى تالقىلاعان ەدىك, – دەدى نۇرسۇلتان نازارباەۆ.
قازاقستان پرەزيدەنتى گەرمانيا الەمدەگى ەڭ ءىرى ەكونوميكاسى بار ەل ەكەنىن ايتىپ, ەلدەرىمىز جاقسى ارىپتەس بولىپ وتىرعانىنا توقتالدى.
– قازىر ىنتىماقتاستىعىمىزدىڭ جاڭا باعدارلامالارى بار. قازاقستان وسى قارىم-قاتىناستاردى بارلىق باعىتتار بويىنشا دامىتۋعا مۇددەلى. ءسىزدىڭ ساپارىڭىز اياسىندا ىسكەرلىك كەڭەس وتۋدە. ەلدەرىمىزدىڭ بيزنەس-قۇرىلىمدارى اراسىندا 20-عا جۋىق كەلىسىمگە قول قويىلادى, – دەدى مەملەكەت باسشىسى.
گەرمانيا فەدەراتيۆتىك رەسپۋبليكاسىنىڭ پرەزيدەنتى ف.-ۆ.شتاينمايەر نۇرسۇلتان نازارباەۆقا قازاقستانعا شاقىرعانى ءۇشىن بۇكىل گەرمانيا دەلەگاتسياسى اتىنان العىس ايتتى.
– سىزگە قوناقجايلىق تانىتىپ, گەرمانياعا جانە جەكە وزىمە قاتىستى ايتقان جىلى لەبىزىڭىز ءۇشىن ريزاشىلىعىمدى بىلدىرەمىن. پرەزيدەنت رەتىندە سايلانعاننان كەيىن مەن قازاقستانعا العاش رەت كەلىپ وتىرمىن. وسى ساپارىمنىڭ وزىندىك ەرەكشەلىگى دە بار. بيىل ءبىزدىڭ مەملەكەتتەر اراسىندا ديپلوماتيالىق قارىم-قاتىناستار ورناعانىنا 25 جىل تولىپ وتىر, – دەدى ف.-ۆ.شتاينمايەر.
گەرمانيا پرەزيدەنتى ەكى ەل اراسىنداعى ىنتىماقتاستىق وڭ قارقىن الىپ وتىرعانىنا نازار اۋداردى.
– شيرەك عاسىردا ەكونوميكاداعى, مادەنيەتتەگى جانە ساياساتتاعى ءوزارا قارىم-قاتىناسىمىز نىعايىپ, تەرەڭدەي ءتۇستى. وسى ىسكەرلىك قاتىناستاردىڭ ارتقانىنىڭ بىردەن-ءبىر كورسەتكىشى رەتىندە گەرمانيا ۇيىمدارى مەن كومپانيالارىنىڭ «استانا ەكسپو-2017» كورمەسىنە بەلسەندى تۇردە اتسالىسۋىن ايتۋعا بولادى. وسى ورايدا, كورمەدەگى گەرمانيا كۇنىنىڭ مەنىڭ ساپارىممەن تۇسپا-تۇس كەلگەنىنە وتە قۋانىشتىمىن, – دەدى ف.-ۆ.شتاينمايەر.
گەرمانيا پرەزيدەنتى بولاشاقتىڭ ەنەرگەتيكالىق ماسەلەسىنە ارنالعان حالىقارالىق كورمە تاقىرىبىنىڭ وزەكتىلىگىن دە اتاپ ءوتتى.