قازاقستان ديپلوماتى پالەستينا پرەمەر-ءمينيسترى رامي حامداللامەن كەزدەسۋىندە قازاقستان پرەزيدەنتى نۇرسۇلتان نازارباەۆتىڭ پالەستينا پرەزيدەنتى ماحمۋد ابباسقا ارنالعان 2017 جىلعى 10-11 قىركۇيەكتە استانا قالاسىندا وتەتىن يسلام ىنتىماقتاستىق ۇيىمىنىڭ عىلىم جانە تەحنولوگيالار جونىندەگى العاشقى سامميتىنە قاتىسۋ جونىندەگى شاقىرۋ حاتىن تابىستادى. پالەستينا پرەمەر-ءمينيسترى ءوز كەزەگىندە م. ابباستىڭ اتىنان قر پرەزيدەنتى ن. نازارباەۆتىڭ بۇل شاقىرۋ حاتىنا العىس ءبىلدىردى.
پالەستينا تاراپى استانادا وتەتىن يىۇ سامميتىنە ەڭ جوعارى دەڭگەيدە قاتىساتىندىعىن قۋاتتادى. ا. كامالدينوۆ ءوز كەزەگىندە اتالعان سامميت يىۇ مۇشە-ەلدەر اراسىندا عىلىم جانە ينوۆاتسيا سالاسىنداعى بايلانىستاردىڭ نىعايۋىنا, سونداي-اق يسلام الەمىندەگى ەكونوميكالىق دامۋ سالاسىنداعى جوبالاردىڭ جۇزەگە اسۋىنا جانە حالىقتىڭ الەۋمەتتىك جاعدايىن جاقسارتۋ ماقساتىندا عىلىم مەن تەحنولوگيا ءرولىنىڭ كۇشەيۋىنە جاڭا سەرپىن بەرەتىنىن جەتكىزدى.
سۇحبات بارىسىندا ر.حامداللا قر مەملەكەت باسشىسىنىڭ بىتىمگەرلىك ساياساتىن جوعارى باعالادى جانە پرەزيدەنت ن.نازارباەۆتىڭ عالامدىق جانە ايماقتىق شيەلەنىستەردى, ونىڭ ىشىندە سيريا داعدارىسىن, پالەستينا ماسەلەسىن جانە ت.ب. پروبلەمالاردى شەشۋگە باعىتتالعان ۇلەسىن ايرىقشا اتاپ ءوتتى. پالەستينا تاراپى ەلىمىزدىڭ پالەستيناعا ءتۇرلى حالىقارالىق ساحنالاردا قولداۋ كورسەتكەنىنە العىسىن ءبىلدىرىپ, حالىقارالىق جانە ايماقتىق ۇيىمدار اياسىندا ىنتىماقتاستىق ودان ءارى جەمىستى جالعاساتىنىنا ء ۇمىت ارتتى.
سول كۇنى قر سىرتقى ىستەر ءمينيسترىنىڭ ورىنباسارى ەكىجاقتى قارىم-قاتىناستار تاريحىندا العاش رەت پالەستينا سىرتقى ىستەر ءمينيسترىنىڭ ورىنباسارى مازەن شاميامەن ساياسي كونسۋلتاتسيالار وتكىزدى. ءىس-شارا بارىسىندا ساياسي, ەكونوميكالىق, ينۆەستيتسيالىق جانە الەۋمەتتىك-مادەني سالالارداعى ەكىجاقتى ىنتىماقتاستىق ماسەلەلەرىن, سونداي-اق حالىقارالىق جانە ايماقتىق ۇيىمدار, ولاردىڭ ىشىندە يىۇ, ەۋرازيا ەكونوميكالىق وداعى جانە ت.ب. ۇيىمداردىڭ اياسىندا ەكى ەل اراسىنداعى ءوزارا ىقپالداستىقتىڭ كەلەشەگىن تالقىلادى. ساياسي كونسۋلتاتسيالار شەڭبەرىندە تاراپتار حالىقارالىق جانە وڭىرلىك كۇن تارتىبىندەگى وزەكتى ماسەلەلەر, سونىڭ ىشىندە ىشىندە پالەستينا-يزرايل احۋالىن بەيبىت رەتتەۋ پروتسەسى, سيريا جانە يراكتاعى جاعداي جانە وزگە تاقىرىپتار بويىنشا پىكىر الماستى.