ۇندەۋدە ەلىمىزدە انا مەن بالانى قورعاۋ باعىتىندا اتقارىلىپ جاتقان يگى شارالار ءسوز بولعان. ناقتىلاي ايتقاندا, 2017 جىلدىڭ 1 شىلدەسىنەن باستاپ بالا تۋىلۋىنا بايلانىستى بەرىلەتىن بىرجولعى جاردەماقى كولەمىنىڭ 20 پايىزعا وسكەنى, مەملەكەتتىڭ الەۋمەتتىك باعدارى دۇرىس جولعا قويىلعانى, «اليمەنت تولەمەگەندەرگە قارسى 30 قادام» اتتى اۋقىمدى قوعامدىق جوبانى جۇزەگە اسىرۋداعى باس پروكۋراتۋرانىڭ ماڭىزدى ءرولى اتاپ كورسەتىلگەن. سونداي-اق, ۇندەۋدە ۇلتتىق قۇقىق قورعاۋ مەكەمەلەرىنە اليمەنتتى ءوندىرىپ الۋ بويىنشا سوت اكتىلەرىنىڭ ورىندالماعانى جونىندەگى ارىز-شاعىمداردىڭ كوپتىگى ايتىلا كەلىپ, بۇل ماسەلەگە وراي ناقتى شارالار كورۋ قاجەتتىگى قوزعالعان. بۇعان قوسا, ومبۋدسمەن ءوز ۇندەۋىندە سوت شەشىمدەرىنىڭ دەر كەزىندە ورىندالماۋىنا قاتىستى بىرنەشە سەبەپتەردى اتاعان. ادام قۇقىقتارى جونىندەگى ۋاكىلدىڭ وسى ماسەلەگە بايلانىستى دەرەگىنە قاراعاندا, سوت ورىنداۋشىلارى اتقارۋشى قۇجاتتاردى مەرزىمىندە جەتكىزبەيدى نەمەسە جوعالتىپ الادى, بورىشكەرلەردەن زاڭناما جۇزىندە ماجبۇرلەپ ءوندىرىپ الۋ شارالارى ىسكە اسىرىلمايدى, اليمەنت تولەۋدەن جالتارعان ازاماتتارعا قارسى قوزعالعان ءىستى قاراۋ كەزىندە قۇقىق قورعاۋ ورگاندارى شۇعىل شەشىمدەر قابىلداماي, سونىڭ سالدارىنان ءىس بارىسى سەبەپسىز سوزىلىپ كەتەدى. جالپى, جوعارىدا اتالعان سەبەپتەردەن كەيبىر مەملەكەتتىك قىزمەتكەرلەردىڭ ءوز ىسىنە نەمقۇرايلى قارايتىنى, سونىڭ كەسىرىنەن ءوتىنىم بەرۋشى ازاماتتار زارداپ شەگەتىنى انىق بايقالادى. وسىلايشا, ازاماتتار اليمەنتتىك مىندەتتەمەلەر بەلگىلەنگەن ساتتەن باستاپ بۇكىل كەزەڭ ءۇشىن الاشاق سوماسىن ءوندىرىپ الۋ مۇمكىندىگىنەن ايىرىلادى. ال سوت بۇيرىعىنىڭ تۇپنۇسقاسىن قايتا قالپىنا كەلتىرىپ, ءىس جاڭادان قوزعالعان جاعدايدا, «نەكە جانە وتباسى تۋرالى» زاڭنىڭ 169-بابىنا سايكەس, اليمەنتتى ءوندىرىپ الۋ ءۇش جىل مەرزىمىندە جۇزەگە اسىرىلادى. وسى ورايدا ومبۋدسمەن ءوز ۇندەۋى ارقىلى جوعارىدا كورسەتىلگەن زاڭناما نورماسىنا سوتتىڭ اليمەنت تولەۋ مىندەتىن بەلگىلەگەن كۇننەن باستاپ, اتقارۋشى قۇجات نەگىزىندە بورىشكەردەن تولەمدەردى ءوندىرىپ الۋ مەرزىمىن ەنگىزۋدى ۇسىندى. ادام قۇقىقتارى جونىندەگى ۋاكىل وسى ماسەلەگە بايلانىستى: «سوت ورىنداۋشىلارىنىڭ جاۋاپكەرشىلىگىن ارتتىرۋ جانە تاراپتار اراسىنداعى داۋلى جاعدايلاردىڭ الدىن الۋ ءۇشىن ازاماتتىق ءىس جۇرگىزۋ كودەكسىندە سوت بۇيرىعىنىڭ باعىتىن ءوندىرىپ الۋشىدان ەمەس, بورىشكەردىڭ تۇرعىلىقتى مەكەنجايى بويىنشا ادىلەت ورگانىنان انىقتاۋ جانە «اتقارۋشىلىق ءىس-جۇرگىزۋ جانە سوت ورىنداۋشىلارىنىڭ مارتەبەسى تۋرالى» زاڭدا كورسەتىلگەن اليمەنت وندىرىستەرى بويىنشا اتقارۋشىلىق قۇجاتتى ءوندىرىپ الۋشىعا ەمەس, شەشىمدى قابىلداعان سوتقا قايتارۋ كەرەك», دەيدى. سونداي-اق, ومبۋدسمەن اليمەنت ءوندىرۋ ءىسىنىڭ وزىندىك ەرەكشەلىكتەرى مەن قولدانىلۋ تاجىريبەسىنىڭ وزگەشەلىگى تۋرالى ايتا كەلىپ, اليمەنت ءوندىرۋ ماسەلەسىن يۋۆەنالدى سوتتاردىڭ قاراۋىنا بەرۋ كەرەك» دەگەن ۇسىنىسىن دا بىلدىرگەن. ۇندەۋدە جازىلعانداي, اليمەنت تولەمەۋشىلەرگە قاتىستى قوزعالعان ءىستىڭ كوبى بورىشكەردىڭ قارجىلىق مۇمكىندىگى جوقتىعى دالەلدەنگەنەن كەيىن توقتاتىلادى. جوعارعى سوتتىڭ «سوت اكتىلەرىن ورىنداماعانى ءۇشىن جاۋاپتىلىق تۋرالى» نورماتيۆتىك قاۋلىسىنا سايكەس, اليمەنت تولەۋدەن جالتارعان ادامدى جاۋاپكەرشىلىككە تارتۋ جوققا شىعارىلادى. ال قىلمىستىق زاڭنامادا وعان جازا كەسىلەتىندىگى كورسەتىلگەن. ومبۋدسمەن وسى قايشىلىقتاردى جويۋ قاجەتتىگىن العا تارتادى. بۇعان قوسا, ۇندەۋدە اليمەنت تولەۋدەن باس تارتقان ازاماتتى قۇقىقتىق شەكتەۋ نە باس بوستاندىعىنان ايىرۋ ماسەلەنىڭ وڭتايلى شەشىمى بولا المايتىنى ايتىلعان. وسىعان وراي ومبۋدسمەن اليمەنت تولەۋگە قابىلەتسىز دەپ تانىلعان ازاماتتاردى قوعامدىق جۇمىستارعا تارتۋ, ولاردى ىنتالاندىرۋدىڭ بالاما كوزدەرىن قاراستىرۋ قاجەت دەپ ەسەپتەيدى. ۇندەۋدىڭ سوڭىندا اتا-انالاردىڭ جاۋاپكەرشىلىگىن ارتتىرۋ, قۇقىقتىق سانا-سەزىمدى كوتەرۋ, وتباسىلىق قۇندىلىقتاردى ناسيحاتتاۋ, قۇقىقتىق ءبىلىم بەرۋ, سوت ورىنداۋشىلارىن وقىتۋ ءىس-شارالارىن تۇراقتى جۇرگىزۋ, مەدياتسيا ينستيتۋتىنىڭ تاجىريبەسىن كەڭەيتۋ, وسى سالاداعى كاسىبي مەدياتورلاردى دايىنداۋ جانە باسقا دا ماڭىزدى ماسەلەلەر قوزعالعان.
جولدىباي بازار, «ەگەمەن قازاقستان»