كەشە پارلامەنت سەناتىنىڭ ەكونوميكالىق جانە ءوڭىرلىك ساياسات كوميتەتىنىڭ دەپۋتاتتارى بايلانىس جانە اقپارات ءمينيسترى اسقار جۇماعاليەۆپەن جانە «قازاقتەلەكوم» اكتسيونەرلىك قوعامى باسقارماسىنىڭ توراعاسى قۋانىشبەك ەسەكەەۆپەن كەزدەسىپ, اۋىلدىق جەرلەردى تەلەفونمەن قامتۋ جانە ۇيالى بايلانىستى دامىتۋ ماسەلەلەرىن تالقىلادى.
كەزدەسۋگە پالاتا توراعاسىنىڭ ورىنباسارى الەكساندر سۋدين قاتىستى. كوميتەت توراعاسى نۇرلىعايىم جولداسباەۆا باسقوسۋدى اشا كەلىپ, يندۋستريالىق-يننوۆاتسيالىق دامۋ باعدارلاماسىن جانە قازاقستان رەسپۋبليكاسىنىڭ 2020 جىلعا دەيىن ستراتەگيالىق دامۋ جوسپارىن ىسكە اسىرۋ اياسىندا ءوتىپ وتىرعان تالقىلاۋدىڭ ماڭىزدىلىعىن اتاپ ءوتتى.
سەناتور سونداي-اق ەكونوميكانى جاڭعىرتۋ جانە يننوۆاتسيالىق جاڭالىقتاردى يگەرۋ اقپاراتتىق تەحنولوگيالاردى پايدالانۋعا, ونى مەملەكەتتىك قىزمەت كورسەتۋ سالالارىندا, جۇرتشىلىققا قول جەتكىزۋ مۇمكىندىگىن ارتتىرۋعا تىكەلەي بايلانىستى ەكەنىن اتاپ ءوتتى. سالانى رەتتەۋ ماقساتىندا ءبىزدىڭ ەلىمىزدە قۇقىقتىق نەگىز جاسالىپ, «ەلەكتروندىق قۇجات جانە ەلەكتروندىق تسيفرلىق قولتاڭبا تۋرالى», «پوشتا تۋرالى», «بايلانىس تۋرالى», «اقپاراتتاندىرۋ تۋرالى» زاڭدار قابىلداندى.
اقپاراتتىق كوممۋنيكتسيا تەحنولوگيالارىنىڭ ۇلتتىق سەكتورىن قالىپتاستىرۋ ماسەلەلەرى اقپاراتتىق جانە كوممۋنيكتسيا تەحنولوگيالارىن دامىتۋدىڭ تاياۋ جىلدارعا ارنالعان سالالىق باعدارلاماسىندا كورسەتىلگەن. ساندىق تەلەديدار سەرىگى ۇشىرىلدى, ۇيالى تەلەفوننىڭ ءۇشىنشى 3G ستاندارتى ەنگىزىلۋدە, اۋىلدىق جەرلەردە كەڭ جولاقتى ينتەرنەت جەلىسىن دامىتۋ جوباسىن ىسكە اسىرۋعا ازىرلىك جاسالۋدا, ەلەكتروندىق ۇكىمەت پورتالى ارقىلى ەلەكتروندىق انىقتاما بەرىلە باستادى.
«سونىمەن بىرگە, سالادا كەزەك كۇتتىرمەي شەشۋدى قاجەت ەتەتىن بىرقاتار وتكىر ماسەلەلەر بار», – دەدى ن.جولداسباەۆا جانە ول تالقىلاۋ بارىسىندا «تەلەراديو حابارلارىن تاراتۋ تۋرالى» زاڭ جوباسىنىڭ تۇجىرىمداماسى بويىنشا ۇسىنىستار ايتىلاتىنىنا ءجانە اقپاراتتىق جانە كوممۋنيكاتسيالىق تەحنولوگيالاردى دامىتۋ باعدارلاماسىن جۇزەگە اسىرۋعا وراي جاۋاپ بەرىلەتىنىنە سەنىم ءبىلدىردى.
وسىعان بايلانىستى سەناتور اۋىلدىق جەرلەردى تەلەفونمەن قامتۋعا, باعا تاريفتەرىنە, ينتەرنەتكە قوسۋدى ارزانداتۋعا, اۋىلدىق جەرلەردە ساندىق تەلەراديوحابارلارىنا قول جەتكىزۋگە, ەلەكتروندىق ۇكىمەتتى ەنگىزۋ ماسەلەلەرىنە نازار اۋداردى.
تالقىلاۋ بارىسىندا ءسوز العان ەكونوميكالىق دامۋ جانە وڭىرلىك ساياسات كوميتەتىنىڭ مۇشەسى ا.كۇزەكوۆ قازاقستان رەسپۋبليكاسىنداعى اقپاراتتىق-كوممۋنيكاتسيالىق كەشەندى دامىتۋعا وراي بىرقاتار ۇسىنىستار ايتتى.
بايلانىس جانە اقپارات ءمينيسترى ا.جۇماعاليەۆ ەلىمىزدەگى تەلەكوممۋنيكاتسيا سالاسىن دامىتۋ جونىندەگى مەكەمە قىزمەتى تۋرالى كەزدەسۋگە قاتىسۋشىلاردى حاباردار ەتتى.
كەزدەسۋدە سونداي-اق «قازاقتەلەكوم» اق باسقارما باسشىسى ق.ەسەكەەۆتىڭ اۋىلدىق جەرلەردەگى بايلانىستىڭ قازىرگى جاعدايى مەن كەلەشەگى تۋرالى, قارجى مينيسترىنىڭ ورىنباسارى ب.شولپانقۇلوۆتىڭ جالپىعا بىردەي قىزمەت كورسەتۋدى سۋبسيديالاۋ تۋرالى اقپاراتتارى تىڭدالدى.
تالقىلاۋدى قورىتىندىلاي كەلىپ, كوميتەت توراعاسى ۇيالى بايلانىس رىنوگىنداعى باسەكەلەستىكتى كەڭەيتۋ, الەۋمەتتىك جوبالاردى, جاڭا بايلانىس جەلىسىنىڭ قۇرىلىسى, قازىرگى بايلانىس وپەراتورلارىنا قول جەتكىزۋدى قامتاماسىز ەتۋ تۋرالى بىرقاتار ۇسىنىستار ايتتى, دەپ حابارلادى پارلامەنت سەناتىنىڭ ءباسپاسوز قىزمەتى.
اسقار تۇراپباي ۇلى.