پەتروپاۆل تەمىر جول ستانساسىنا ادەتتەگىدەن وزگەشە پويىز كەلىپ توقتادى. ساياحات «رەسەي تەمىر جولى» اق-تىڭ باستاماسىمەن ۇيىمداستىرىلىپ, ماسكەۋدەن قيىر شىعىسقا بەت الىپتى. قازاقستاندا پەتروپاۆل ستانساسىندا ايالداپ, جۇرتشىلىق جىلجىمالى كورمە-ءدارىس كەشەنى ورناتىلعان ۆاگونداردىڭ وزگەشە جابدىقتالۋىن ءبىر كۇن بويى تاماشالادى. ونىڭ تانىستىرىلىمىنا وبلىس اكىمى سەرىك ءبىلالوۆ قاتىسىپ, ءوز سوزىندە كەدەن وداعى قۇرىلعالى ايماقتىڭ رەسەي, بەلارۋس مەملەكەتتەرىمەن سىرتقى ەكونوميكالىق بايلانىستارىنىڭ جاقسارا تۇسكەنىن اتاپ ءوتتى.
كورمە وسى زامانعى وزىق تەحنولوگيالارعا نەگىزدەلگەن يننوۆاتسيالىق جەتىستىكتەردى جان-جاقتى بەينەلەۋىمەن ەرەكشەلەنەدى. ۇيىمداستىرۋشىلاردىڭ ايتۋىنا قاراعاندا, جىلجىمالى كورمە-ءدارىس كەشەنى ءوز ساپارىن 3 تامىزدا باستاپ, 50-دەن استام قالانى باسىپ وتكەن. 16 مىڭعا جۋىق ادام يننوۆاتسيا جەتىستىكتەرىمەن تانىسۋ ءمۇمكىندىگىنە يە بولعان. «روسنانو» مەملەكەتتىك كورپوراتسياسى قۇرامىنا ەنەتىن ءىرى كومپانيالاردىڭ كورمەگە قويىلعان زامانۋي نانوتەحنولوگيالارى ايرىقشا نازار اۋدارتتى. بەينەروليكتەردى, دياگراممالاردى پايدالانا وتىرىپ «قازىرگى يادرولىق تەحنولوگيالار», «تەمىرجولدىڭ ينفراقۇرىلىمى», «ەنەرگيا ۇنەمدەۋ», تاعى باسقا تاقىرىپتار بويىنشا جان-جاقتى ماعلۇمات الۋعا بولادى.
كورمە پەتروپاۆلدىقتاردىڭ ۇلكەن قىزىعۋشىلىعىن تۋدىرىپ, ءبىر مىڭداي ادام تاماشالادى.
ءومىر ەسقالي, سولتۇستىك قازاقستان وبلىسى.