ەلىمىزدىڭ سىرتقى ىستەر مينيسترلىگى ۇستىمىزدەگى جىلدىڭ 1 قازانىندا اۆستراليانىڭ بريسبەن قالاسىندا قازا بولعان ساعىناي باتىرحانوۆانىڭ وتباسىنىڭ قايعىلارىنا ورتاق. بۇل ءجونىندە وسى ۆەدومستۆونىڭ رەسمي وكىلى اسقار ابدراحمانوۆ كەشە بۇقارالىق اقپارات قۇرالدارى وكىلدەرىنە ارنايى بريفينگ وتكىزىپ, وسى ءماسەلەنىڭ ءمان-جايىن ايتىپ بەردى.
1989 جىلى تۋعان ساعىناي باتىرحانوۆا گريففيت ۋنيۆەرسيتەتىنىڭ 1-ءشى كۋرسىندا وقىعانى بەلگىلى بولىپ وتىر. قازاقستان ازاماتشاسىن پىشاقتاپ ءولتىردى دەگەن كۇدىكتى پوليتسيا تاراپىنان تۇتقىندالىپ, ول ءوزىنىڭ كىناسىن مويىنداعانعا ۇقسايدى. ءۇستىمىزدەگى جىلدىڭ 3 قازانىندا ايىپتىعا قارسى قىلمىستىق ءىستى تىڭداۋ ورىن العان. سوت س.باتىرحانوۆامەن بىرگە تۇرىپ كەلگەن تايلاند ازاماتتىعىنداعى كۇدىكتىنى تەرگەۋ امالدارى بارىسىندا ونى كەم دەگەندە 5 جەلتوقسانعا دەيىن قاماۋعا الۋ تۋرالى ۇكىم شىعارعان. وسى ورايدا پوليتسيا بىرگە تۇرىپ جاتقاندارعا وتباسىنداعى زورلىق-زومبىلىق جاساۋ وقيعاسىنا بايلانىستى ەسكەرتۋ دە جاساعان كورىنەدى. وتباسىنداعى جانجال وسىنداي قايعىلى وقيعاعا دۋشار ەتىپ وتىر.
ساعىناي باتىرحانوۆا مەن ايىپتىنىڭ ورتاق ءۇش ايلىق ءنارەستە ۇلى بار بولسا, قازىر ول اۆستراليانىڭ الەۋمەتتىك قىزمەتىنىڭ قامقورلىعىنا الىنعان. رەسمي وكىل وسى رەتتە قازاقستاننىڭ سىرتقى ىستەر مينيسترلىگى جانە مەملەكەتىمىزگە اۆستراليادا قوسىمشا تۇردە وكىلدىك ەتەتىن سينگاپۋرداعى ەلشىلىگىمىز پوليتسيامەن ۇدايى بايلانىستا ەكەندىگىن جەتكىزدى. سونداي-اق ەلشىلىك پراكتيكالىق جانە قۇقىقتىق شارالاردى اتقارۋدا. وتانداستارىمىزدىڭ مۇددەلەرىن قورعاۋ ماقساتىندا قازاقستان كونسۋلى 3 قازاندا اۆسترالياعا بارىپ, ءبىرقاتار ماسەلەلەردى شەشۋمەن, سونىڭ ىشىندە ساعىناي باتىرحانوۆانىڭ ءمايىتىن وتانىنا جىبەرۋ, ازاماتتىق نەكەدە تۋىلعان ءسابيدىڭ قۇقىقتىق مارتەبەسىن انىقتاۋ ءماسەلەلەرىمەن اينالىسۋدا, دەدى اسقار ابدراحمانوۆ. سونداي-اق, ەلىمىزدىڭ سىرتقى ساياسات ۆەدومستۆوسى اۆستراليانىڭ قازاقستاندا قوسىمشا تىركەلگەن ءماسكەۋدەگى ەلشىلىگىنە وسى ىسكە تولىققاندى تەرگەۋ جۇرگىزۋ جانە قازا بولعان ازاماتشامىزدىڭ تۋىسقاندارىنىڭ قۇقىقتارىن قورعاۋدا قاجەتتى قولعابىس كورسەتۋ تۋرالى ديپلوماتيالىق نوتا جىبەرگەن.
«ەگەمەن-اقپارات».