ءبىز بارىمىزدى باعالاپ, جەتكەن جەتىستىگىمىزگە شىنايى قۋانا ءبىلۋىمىز كەرەك. اسىرەسە, ەل تاۋەلسىزدىگىنىڭ جيىرما التى جىلعا جەتەر-جەتپەس كەزەڭىندەگى قازاقستاننىڭ ايداي الەمگە تانىلۋى جانە سول الەمدى ءوزىنىڭ الەۋمەتتىك-ەكونوميكالىق, ودان قالدى ساياساتتاعى ىزگى قادامدارىمەن ءسۇيسىندىرىپ وتىرعاندىعى, ەڭ باستىسى ءبىزدىڭ حالقىمىزدىڭ مارتەبەسى.
ەلباسى ەل تاۋەلسىزدىگىنىڭ شيرەك عاسىرىنا جەتەر-جەتپەس كەزەڭدەردە قازاق ەلىن ءبىر عاسىردىڭ ەنشىسىنە دە سىيا قويماستاي تاريحي جولدان الىپ ءوتتى. قازاق ەلى دۇنيەنىڭ ءتورت بۇرىشىنا ەڭ اۋەلى نازارباەۆ ەسىمىمەن, نازارباەۆ كەلبەتىمەن تانىلدى. نازارباەۆ قازاق ەلى ءۇشىن الەمگە, عارىشقا, بولاشاققا جول اشىپ بەردى! ءبىزدى قازاقستاننىڭ تۇڭعىش پرەزيدەنتى, ەلباسى نۇرسۇلتان نازارباەۆ مارتەبەلى بيىككە كوتەرە ءبىلدى.
ەلباسىنىڭ باتىل دا كورەگەن ساياساتىنىڭ ارقاسىندا استانا قالاسى سالىندى. حح-شى عاسىردىڭ سوڭعى ون جىلدىعىنىڭ دۇنيەسi وزگەرiپ, ساياسي جۇيەسi ءالi قالىپتاسىپ بولماي جاتقان ءولiارا تۇستا قازاقستان سياقتى الىپ ەلدiڭ جاڭا استاناسىن جاڭا ورىنعا كوشiرiپ الىپ كەلiپ, سالعىزۋدىڭ ءوزi نۇرسۇلتان ءابiش ۇلىنىڭ ەرلiكپەن پارا-پار تiپتi, كوزسiز باتىرلىعى دەيiكشi. جەلمايامەن جەلىپ ءجۇرىپ جەر ۇيىعىن ىزدەگەن اسانقايعى باباسىنداي تاۋەلسىز ەلى ءۇشىن ەندىگى جەر ۇيىعىن ىزدەگەن نۇرسۇلتان نازارباەۆ ەسىلدىڭ بويىنا ەل قوندىرىپ, العاشقى قازىعىنان باستاپ ءوزى قاعىپ, بۇگىنگى ايدىندى دا ايبىندى اقوردالى استانانى دۇنيە اكەلگەندىگى ءبىزدىڭ, ياعني قازاق ەلىنىڭ ماڭگىلىك ەل بولا الاتىندىعىن دالەلدەپ, وسىعان ەڭ اۋەلى ءوز جۇرتىنىڭ دا, ودان قالدى دۇنيە جۇرتىنىڭ دا كوزدەرىن جەتكىزىپ, يلاندىرا بىلگەن ۇلىلىعى ەدى!
استانا – قاسيەتتى قازاق جەرىنە جۇرەگىنە سىيعان تۇتاس الەمدى ءوز ەلى مەن حالقىنا دەگەن شەكسىز سۇيىسپەنشىلىگىنىڭ بەلگىسىندەي ەتىپ ءوز دالاسىنا قوندىرىپ, ورنىقتىرا بىلگەن نۇرسۇلتان نازارباەۆتىڭ وزىندىك ءبىر الەمى! استانا- ەلتاۋەلسىزدىگىنىڭ ءلۇپ-ءلۇپ سوعىپ تۇرعان جۇرەگى ەمەس پە؟! استانا- دوڭگەلەنگەن دۇنيەنىڭ قازاق يەلەنىپ وتىرعان قاسيەتتى قازاق جەرىنە ورناتىلعان الەمنىڭ ءتورت بۇرىشىنان دا كوزگە ءتۇسىپ, كورىنەر, التىن تۇعىرلى ەڭ زاڭعار دا, ەڭ بيىك, ەڭ ابزال دا, ەڭ ءبىر ازبايتىن دا, توزبايتىن ماڭگىلىگىنىڭ ماڭگىلىگى جولىندا مىڭ ءولىپ, مىڭ تىرىلگەن قازاق ءۇشىن سوعىلعان ۇلى ەسكەرتكىش!
ەندى, مىنە سول استانا قالاسىنداعى حالىقارالىق اۋەجايعا نۇرسۇلتان نازارباەۆتىڭ ەسىمىنىڭ بەرىلۋى ەلباسىنىڭ تاۋەلسىز ەل بولۋىمىزعا ءسىڭىرىپ كەلە جاتقان ولشەۋسىز ەڭبەگىنىڭ باعاسى دەپ بىلەمىن. وتە دۇرىس, وتە ءجون شەشىم جاسالدى. بۇل كۇندەرى قازاقستان پرەزيدەنتىنىڭ ەسىمى مەن ادامزات مۇددەسى ءۇشىن جاساپ كەلە جاتقان ىزگى امالدارىن بۇكىل الەم حالقى جاقسى بىلەدى. الەم سۇيسىنەدى! ەندەشە سول الەم ءسۇيسىنىپ وتىرعان نۇرسۇلتان نازارباەۆتاي ءوز پەرزەنتىن قۇرمەتتەپ, اۋەلەتىپ جاتقاندىعىمىز دا ءبىزدىڭ ەلدىگىمىز دەپ سانايمىن. قۇتتى بولسىن!