«اتىراۋيندجدورستروي» جشس, «ەكودار» جشس, «ەمبىمۇنايگاز» اق-نا تەكسەرۋ جۇرگىزگەن وبلىستىق جەردىڭ پايدالانىلۋى مەن قورعالۋىن باقىلاۋ باسقارماسى بىرقاتار زاڭ بۇزۋشىلىقتاردى انىقتاعان. «نيەت لتد», «ۆرەميا» كومپانيالارىن تەكسەرۋ كەزىندە جىلىوي اۋدانى تەڭىز قالاشىعىنان وزدەرىنە تيەسىلى جەر تەلىمدەرىنەن ارتىق كولەمدە مەملەكەت جەرىن پايدالانىپ وتىرعاندارى بەلگىلى بولدى. جەر كودەكسىندە كوزدەلگەن جايلاردى بۇزۋ دەرەگى بويىنشا اكىمشىلىك ء ىس قوزعالىپ, ايىپپۇل سالىندى», – دەيدى وبلىستىق جەردىڭ پايدالانىلۋى مەن قورعالۋىن باقىلاۋ باسقارماسىنىڭ باسشىسى عيبرات سۇلەيمەنوۆ. باسقارما وبلىس كولەمىندە يگەرىلمەي جاتقان جەر ۋچاسكەلەرىن باقىلاۋ, قولدانىستاعى زاڭدىلىقتى بۇزا وتىرىپ پايدالانىلىپ جاتقان جەردى انىقتاۋ, جەرگىلىكتى اتقارۋشى ورگاندار تاراپىنان جەكە جانە زاڭدى تۇلعالاردىڭ جەر تەلىمىن تابىستاۋ تۋرالى وتىنىشتەرىنىڭ قاراۋ مەرزىمدەرىنىڭ ساقتالۋىن قاداعالاۋ سەكىلدى جۇمىستاردى اتقارادى. وتكەن جىلى قۇزىرلى ورگانعا 137 ءوتىنىش كەلىپ تۇسكەن. ال بيىلعى ءتورت ايدا 350 جوسپاردان تىس تەكسەرۋ جۇرگىزىلىپ, 304 زاڭ بۇزۋشىلىق انىقتالدى. ءبىر اتاپ وتەرلىگى, جەر پايدالانۋشىلارمەن مەملەكەتتiك جەر ۋچاسكەلەرiن ءىشىنارا زاڭسىز يەلەنىپ الۋ نەمەسە ۋاقىتشا يەلەنگەن مەملەكەتتiك جەردi ۋاقتىلى قايتارماۋ سىندى زاڭ بۇزۋ فاكتىلەرى ءجيى كەزدەسەدى. مىسالى, اتىراۋ وبلىسى كولىك پروكۋراتۋراسىنىڭ زاڭ بۇزۋشىلىقتى جويۋ تۋرالى ۇسىنىسىمەن «قازترانسويل» اق-نا «قيعاش» جەلىلىك وندىرىستىك ستانساسىندا جانە قۇلسارى مۇناي وتكىزۋ باسقارماسىندا كولەمى 59,72921 گا جەر ۋچاسكەسىن زاڭسىز پايدالانۋلارىنا سايكەس, اكىمشىلىك ءىس قوزعالىپ, 4 764 900 تەڭگە ايىپپۇل سالىندى, جەر زاڭدىلىعىنىڭ بۇزىلۋىن جويۋ تۋرالى نۇسقاما تابىستالعان. وسىلايشا كومپانيا ون جىلدان بەرى مەملەكەت جەرىن وندىرىستىك ماقساتتا پايدالانىپ كەلگەن. سونداي-اق, «ريتم ويل» جشس, «كونستراكشن KZ» جشس, «ەكو تەحنيكس» جشس, «اۆتوميراتىراۋ» جشس, «كونتاكت ويل» جشس, «مەركۋر اۆتو» جشس, «ۆەست موتورس» جشس, «ابىلاي حان» جشس, «تەنگيزينتەرمۇنايگازقۇرىلىس» جشس, «قىزىل بالىق» جشس-تەرى ۋاقىتشا وتەۋلى جەر پايدالانۋ قۇقىقتارىن ۋاقتىلى ۇزارتپاي, مەملەكەت جەرىن زاڭسىز پايدالانۋلارىنا سايكەس, 2 949 700 تەڭگە كولەمىندە ايىپپۇل سالىندى. تۇرعىن ءۇي قۇرىلىسى ءۇشىن ۋاقىتشا بەرىلەتىن جەرلەردىڭ ماقساتتى پايدالانىلماۋى دا پروبلەمانىڭ ءبىرى. وتكەن جىلى باسقارما اۋدان پروكۋراتۋرالارى ۇسىنىسىمەن 54 جەر تەلىمىنىڭ يەلەرىنە جازباشا ەسكەرتۋ جولدادى. الايدا, جەر كودەكسىندەگى تالاپتار بويىنشا ناقتى شارا الۋ مۇمكىن بولماي وتىر.
باقىتگۇل باباش, «ەگەمەن قازاقستان»
اتىراۋ