پرەزيدەنت جانىنداعى ادام قۇقىقتارى جونىندەگى كوميسسيانىڭ توراعاسى قۋانىش سۇلتانوۆتىڭ جەتەكشىلىگىمەن وتكەن جيىندا, تاقىرىپ بويىنشا ادىلەت ءمينيسترى مارات بەكەتاەۆ پەن ادۆوكاتتاردىڭ رەسپۋبليكالىق القاسىنىڭ توراعاسى ءانۋار تۇگەل بايانداما جاسادى. ال كوميسسيا وتىرىسىنىڭ جۇمىسىنا زاڭ شىعارۋشى, اتقارۋشى ورگاندار مەن قازاقستان رەسپۋبليكاسى سوت جۇيەسى بيلىگىنىڭ جاۋاپتى ماماندارى, حالىقارالىق ۇيىمدار مەن ۇكىمەتتىك ەمەس ۇيىمداردىڭ, ادۆوكاتتار توبىنىڭ, قاۋىمداستىقتاردىڭ وكىلدەرى قاتىسقان ەدى. ارنايى بايانداما جاساعان كوميسسيا مۇشەلەرى ادۆوكاتۋرا قىزمەتىنىڭ ەلىمىزدەگى ماڭىزدى قۇقىقتىق ينستيتۋتى بولا تۇرا نەگىزگى مىندەتى, ول – ماماندانعان زاڭدىق كومەكتى الۋ بويىنشا ازاماتتاردىڭ كونستيتۋتسيالىق قۇقىقتارىن قامتاماسىز ەتۋ بولىپ تابىلاتىندىعىن باسا ايتتى. سونىمەن قاتار, وسى ماقساتتى جۇزەگە اسىرۋدا مەملەكەتكە جاردەم ەتۋ ءارى ازاماتتاردىڭ جانە باسقا دا تۇلعالاردىڭ قۇقىعى مەن زاڭدى مۇددەلەرىن قورعاۋ ەكەندىگى ايرىقشا اتاپ ءوتىلدى. ال تالقىلاۋ بارىسىندا كوميسسيا مۇشەلەرى مەن ساراپشىلار قازاقستانداعى ادۆوكاتۋرا ينستيتۋتىن دامىتۋدى, سوت ءىسىن جۇرگىزۋدە جانە سوت شەشىمدەرى شەڭبەرىندەگى ادۆوكاتتاردىڭ ءرولىن ارتتىرۋدى, قىلمىستىق پروتسەستىڭ بەلسەندى قاتىسۋشىسى رەتىندە ادۆوكاتتاردىڭ پروتسەسسۋالدىق قۇقىقتارىن جۇزەگە اسىرۋدىڭ ءتيىمدى قۇقىقتىق مەحانيزمدەرىن بەلگىلەۋدى ۇسىندى. جالپى العاندا, كوميسسيانىڭ وتىرىسى بارىسىندا ازىرلەنگەن ۇسىنىمدارمەن مەملەكەت باسشىسى, پارلامەنت پەن ۇكىمەت تانىستىرىلادى دەپ جوسپارلانعان. ايتا كەتەيىك, بۇگىنگى تاڭدا ەلىمىزدە ادۆوكاتۋرا ينستيتۋتى ادۆوكاتتاردىڭ رەسپۋبليكالىق القاسى مەن جالپى سانى 4 مىڭنان استام ادۆوكاتتى قۇرايتىن ادۆوكاتتاردىڭ 16 وڭىرلىك القاسى قالىڭ بۇقاراعا ءوز قىزمەتىن كورسەتىپ كەلەدى. وندا بىلىكتى زاڭگەرلەردىڭ ادۆوكات ماماندىعىن الۋدى جەڭىلدەتۋ مەن ادۆوكاتتاردىڭ جاۋاپكەرشىلىگىن مىندەتتى ساقتاندىرۋ ينستيتۋتىن ەنگىزۋ, سونداي-اق حالىققا تەگىن زاڭدىق كومەك كورسەتۋدى باقىلاۋ مەحانيزمىن ازىرلەۋ سىندى جۇمىستار ۇسىنىلادى.
الەكساندر تاسبولاتوۆ, «ەگەمەن قازاقستان»