قاتىسۋشىلاردىڭ باسىم بولىگىن جاستار قۇراعان جيىندا ەكسپو-2017 مامانداندىرىلعان كورمەسىنىڭ ءمانى مەن ماڭىزى, ەلىمىزدىڭ بۇگىنى مەن كەلەشەگىنە قاتىستى اتقارار ءرولى جايلى ءسوز بولدى. ەكولوگيا ۇلكەن پروبلەماعا اينالىپ وتىرعان ءححى عاسىر – ەنەرگيا كوزىنىڭ جاڭا تەحنولوگياسىن ويلاپ تابۋىمەن تاريحتا قالۋعا ءتيىس. اۋانى لاستايتىن, تابيعاتتى زاقىمدايتىن, ادام دەنساۋلىعىن بۇزاتىن شيكىزات كوزدەرىن مەيلىنشە از تۇتىنۋ ماسەلەسى كوتەرىلىپ كەلە جاتقالى دا كوپ ۋاقىت بولدى. بۇگىنگى تاڭدا الەم عالىمدارى ويلاپ تاۋىپ جاتقان تىڭ ەنەرگيا كوزدەرىن جاپپاي قولدانىسقا ەنگىزەتىن كۇن دە الىس ەمەس. سول كەزدە وسى تاقىرىپتا كورمە وتكىزگەن ەلىمىزدىڭ ۇلەسى جايلى از ايتىلمايتىن بولادى. بۇل كورمەنى وتكىزۋدىڭ ءبىر ماڭىزى وسى. ودان وزگە, شارتاراپتان كەلىپ جاتقان سوڭعى عىلىمي-تەحنيكالىق جاڭالىقتار ەل ءوندىرىسىنىڭ جاندانۋىنا ىقپال ەتەدى. وزگەدەن ۇيرەنەم دەۋشىلەرگە دە مۇمكىندىك مول. بۇل كورمە – بولاشاق جاڭا ارىپتەس- تىكتەردىڭ باستاۋى بولۋعا ءتيىس. كورمەنىڭ ساياسي ماڭىزى جايلى دا ايتىلماي قالعان جوق. فورۋمنىڭ اشىلۋىندا ءسوز سويلەگەن «دوستىق ءۇيى – قوعامدىق كەلىسىم ورتالىعىنىڭ» ديرەكتورى تاڭىربەرگەن قاسىمبەركەباەۆ: – تمد ەلدەرى اۋماعىندا العاش رەت ءوتىپ وتىرعان ءىرى كولەمدەگى ۇلكەن كورمەگە 115 مەملەكەت پەن 22 حالىقارالىق ۇيىمنىڭ قاتىسۋى كوپ نارسەدەن حابار بەرەدى. الەمگە دەگەن دوستىق پەن ىنتىماقتاستىق ۇستانىمىمىزدىڭ كورىنىسى بۇل. ماڭىزدىلىعى جاعىنان دۇنيەجۇزىلىك ماڭىزدى ەكونوميكالىق فورۋمدار مەن تۋريزم سالاسى بويىنشا ەڭ ۇلكەن شارانىڭ قازاقستاندا ءوتۋى – ەلىمىزدىڭ حالىقارالىق دەڭگەيدەگى ىقپالىن اسىرا تۇسەتىنى انىق, – دەدى. بۇل شارا نەگىزىنەن جاستارعا ارنالدى دەۋگە دە بولادى. الاڭعا جينالعان جاستار فلەشموب ۇيىمداستىرىپ, قوسىلىپ ءان سالدى. «ەكسپو كورمەسى الدىمەن مەرەكە بولۋعا ءتيىس», دەيدى ۇيىمداستىرۋشىلار. سول سەبەپتى, وسىنداي كوڭىلدى, ەركىن پىشىمدەگى فورۋم وتكىزۋدى ماقۇل كورىپتى.
الماس ءنۇسپ, «ەگەمەن قازاقستان»
الماتى وبلىسى