بەيسەنبى كۇنى استانا ەكونوميكالىق فورۋمىندا وتكەن ءباسپاسوز ءماسليحاتىندا ەقدب قازاقستان بويىنشا ديرەكتورى اگريس پرەيمانيس: ء«بىزدىڭ سوڭعى بولجامعا سايكەس قازاقستان ەكونوميكاسى 2017 جىلى 2,4%, ال 2018 جىلى 3,5% وسەدى. الايدا وسى ءوسىم بولجامنان دا جوعارى بولىپ ىسكە اسۋى ءۇشىن رەفورمالاردى جالعاستىرۋ وتە ماڭىزدى», – دەدى.
سونىمەن قاتار بانكتىڭ ايماقتىق باسشىسى سىرتقى ەكونوميكالىق ورتانىڭ جاقسارعان جاعدايىندا مەملەكەتكە قۇرىلىمدىق رەفورمالار مەن باسەكەگە قابىلەتتى, «جاسىل» جانە ينكليۋزيۆتى ەكونوميكا قۇرۋ ءۇشىن تاعى ءبىر قادام جاساۋى كەرەك ەكەندىگىن اتاپ ءوتتى.
جانە بۇعان قوسا ەقدب پرەزيدەنتى سۋما چاكرابارتي 22 ماۋسىمدا استانادا باستالاتىن شەتەل ينۆەستورلارىنىڭ كەڭەسىندە قايتا جاڭعىراتىن ەنەرگەتيكاعا ينۆەستيتسيا ارتتىرۋ مەن ايماقتاردىڭ دامۋىنا كوڭىل ءبولۋ تۋرالى ءسوز قوعايدى دەپ كۇتىلۋدە. چاكرابارتي مىرزا شەتەل ينۆەستورلارىنىڭ كەڭەسىنىڭ وتىرىسىندا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆپەن بىرگە توراعالىق ەتەدى.
شەتەل ينۆەستورلارىنىڭ كەڭەسىنىڭ وپەراتسيالىق كوميتەتىنىڭ مۇشەسى, ەقدب قازاقستان بويىنشا ديرەكتورى اگريس پرەيمانيس: «ەقدب تەڭ توراعالىق ەتەتىن شەتەل ينۆەستورلارىنىڭ كەڭەسى تارتىمدى ينۆەستيتسيالىق احۋالدى قولداۋدا ماڭىزدى ءرول اتقارادى. مەن وسى كەڭەس قازاقستان ءۇشىن مۇنان بىلاي دا كونسترۋكتيۆتى جانە سىنشى ارىپتەس بولىپ قالا بەرەدى دەپ سەنەمىن. ەلدىڭ يننوۆاتسيالىق جانە باسەكە قابىلەتتى بولۋعا باعىتتالعان كۇردەلى قۇرىلىمدىق رەفورمالاردى جۇزەگە اسىرا باستاعانىن ەسكەرسەك, كەڭەسكە مۇشە ەلدەردىڭ جانە الەمنىڭ باسقا دا ەلدەرىنىڭ تاجىريبەسى پايدالى بولادى», – دەدى.
ەقدب جانە قازاقستان رەسپۋبليكاسىنىڭ ۇكىمەتى ءۇشىن تاعى ءبىر باسىم باعىت – ەل ايماقتارىن دامىتۋ. بانك قازاقستاننىڭ بارلىعىنا دەرلىك وبلىستارىندا ءارتۇرلى سالالارعا ينۆەستيتسيا سالىپ, جۇمىس ىستەپ كەلەدى.
«قازاقستاننىڭ تۇراقتى تۇردە دامۋىنا بارشامىز دا مۇددەلىمىز. جانە ەقدب «جاسىل» جانە ينكليۋزيۆتى دامۋعا زور ۇلەس قوسقانىنا ريزامىن. وتكەن دەمالىس كۇندەرى كەزەكتى ينۆەستيتسيالىق جوباعا قول قويدىق. ول «بۋرنوە» كۇن ەلەكتر ستانتسياسىنىڭ كولەمىن ەكى ەسە ۇلكەيتەدى. ءبىز بەرگەن 50 ملن اقش دوللارى كولەمىندەگى نەسيە تازا ەنەرگيا شىعارۋعا جانە جامبىل وبلىسىندا جاڭا جۇمىس ورنىن اشۋعا كومەكتەسەدى. بانك جاقىندا عانا كولەمى 1 ملرد اقش دوللارى بولاتىن باعدارلامانى بەكىتتى. ول ەنەرگەتيكا جانە تابيعي رەسۋرستار سەكتورىندا ايەلدەر مەن جاستاردىڭ مۇمكىندىكتەرىن كەڭەيتۋگە باعىتتالعان» دەدى ەقدب قازاقستان بويىنشا ديرەكتورى اگريس پرەيمانيس.
ەقدب ەكونوميكا, ساياسات جانە باسقارۋ بويىنشا باسقارۋشى ديرەكتورى ماتتيا روماني قازاقستان «بەلدەۋ جانە باعىت» باستاماسى بەرەتىن جاڭا مۇمكىندىكتەردى پايدالانۋ كەرەك دەپ ەسەپتەيدى. باستاما «ەكسپو-2017» بارىسىندا اشىلاتىن استانا حالىقارالىق قارجى ورتالىعىنا «جاسىل» قارجىلاندىرۋ جۇيەسىن قۇرۋعا مۇمكىندىك بەرەدى.
«ميلليونداعان كورەرمەندەر جاقىندا عانا «بي-بي-سي» ارناسىنىڭ قىتايمەن شەكارادا ورنالاسقان «حورگوس» قۇرعاق پورتىنىڭ قۇرىلىسى تۋرالى دەرەكتى ءفيلمىن تاماشالادى. مۇنداي جاڭا جوبالار بۇكىل الەمنىڭ نازارىن اۋدارادى. ءبىز بۇل قىزىعۋشىلىق جاڭا مۇمكىندىكتەردىڭ اشىلۋىنا اكەلەدى دەپ سەنەمىز», – دەيدى ەقدب قازاقستان بويىنشا ديرەكتورى اگريس پرەيمانيس.
ايناش ەسالي,
«ەگەمەن قازاقستان».
الماتى