كونفەرەنتسيانىڭ اشىلۋ سالتاناتىندا ۋنيۆەرسيتەت رەكتورى, پروفەسسور, قازاقستاننىڭ حالىق ءارتىسى ايمان مۇساقوجاەۆا عىلىمي شارانىڭ ءمان-ماڭىزىنا توقتالا كەلىپ: – ءبىز بولات شامعالي ۇلىنىڭ ءوز عۇمىرىندا عاسىرعا تاتيتىن ەڭبەك اتقارىپ كەتكەنىن بىلەمىز. ول ەجەلگى كونە مۋزىكالىق اسپاپتاردى تاۋىپ, جۇيەلەپ, قالپىنا كەلتىرۋمەن قاتار, بۇلاردى حالىقتىڭ رۋحاني ومىرىنە ەنگىزە الدى. وسىلايشا ءبىز زامانا كەرۋەنى كوشكەن سايىن قولدانىستان تىس قالعان, ۇمىت بولعان مۋزىكالىق اسپاپتارمەن جانە ولاردىڭ ەرەكشە ۇنىمەن بۇگىندە قايتا قاۋىشىپ وتىرمىز, – دەدى. بەلگىلى ديپلومات قايرات سارىباەۆ بولات سارىباەۆپەن تۋىستىعىن ماقتان تۇتاتىنىن, اتالارى شامعالي تاشكەنتتىڭ كوممۋنيستىك ۋنيۆەرسيتەتىندە, ودان كەيىن اباي اتىنداعى مەملەكەتتىك پەداگوگيكالىق ينستيتۋتىندا ۇزاق جىلدار ساباق بەرگەنىن, ال ونىڭ اكەسى حارەس تە جاڭگىر حاننىڭ تۇسىندا وردادا مەكتەپتە مۇعالىم بولعانىن, ۇلكەن انالارى ءناسيما (بولات سارىباەۆتىڭ اناسى) «قازاق ادەبيەتى» باسىلىمىندا كوپ جىلدار جۇمىس ىستەگەنىن تىلگە تيەك ەتتى. قايرات شورا ۇلى: – ەلباسى «بولاشاققا باعدار: رۋحاني جاڭعىرۋ» ماقالاسىندا ءبىلىم, تاريح, مادەنيەت, ءتىل مەملەكەتىمىزدىڭ تەمىرقازىعى بولىپ سانالادى دەگەن بولاتىن. ۇلتتىق بىرەگەيلىكتى ساقتاۋ, ءبىلىمنىڭ سالتانات قۇرۋى, مىنە, وسىدان كەلىپ شىعادى. بولات سارىباەۆتىڭ سارقىلماس مول مۇراسى – وسىنىڭ جارقىن دالەلى. ول حالقىمىزدىڭ مۋزىكالىق اسپاپتارىن باعا جەتپەس قۇندىلىق دەپ تانىدى. عالىم بۇلاردى زەرتتەپ قانا قويماي, ونى ۋاعىزداي ءبىلدى. ۇلتتىق اسپاپتاردان قۇرىلعان «شەرتەر», «فارابي سازى», «وتىرار سازى» ۇجىمدارىن بوكەڭنىڭ باستاپ بەرگەنى ءوز الدىنا بولەك اڭگىمە. پراگماتيزم, يننوۆاتسيالىق جاڭالىق دەگەن وسى, – دەي كەلىپ, دينا نۇرپەيىسوۆا بوكەڭە ءوز قولىمەن بالا كۇنىندە دومبىراسىن ۇستاتقانىن, باتا بەرگەنىن ايتتى. پلەنارلىق ماجىلىستە العاشقى بولىپ ءسوز العان ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ پروفەسسورى ءاسيا مۇحامبەتوۆا ب.سارىباەۆ تاعدىرىنىڭ جۇمباعىنا ءۇڭىلدى, ونىڭ جازبالارى, ماقالالارى, ديسسەرتاتسيالارى قوعام ساناسىندا سىلكىنىس تۋعىزسا, عىلىمي ىزدەنىستەرىنىڭ ناتيجەسى قايتا قالپىنا كەلتىرىلگەن كونە مۋزىكالىق اسپاپتارى قازاق مادەنيەتىنە قۇبىلىس رەتىندە قابىلداندى. ب.سارىباەۆ زەرتتەۋلەرىنە دەيىن قازاقتا تەك دومبىرا, قوبىز, سىبىزعى اسپاپتارى عانا بولعان دەگەن جاڭساق پىكىر قالىپتاسىپ قالعان ەدى, دەدى. ونەرتانۋ عىلىمىنىڭ دوكتورى, رەسەي ونەر تاريحى ينستيتۋتىنىڭ پروفەسسورى يگور ماتسيەۆسكي اسپاپتىق مۋزىكا مادەنيەتىنىڭ جيناقتاۋشىسى ءارى زەرتتەۋشىسى بولات سارىباەۆتىڭ وتانسۇيگىشتىگى, عىلىمعا, ءوز حالقىنا دەگەن ادالدىعى تۋرالى وي تولعاپ, شىعارماشىلىق قىزمەتىنە جان-جاقتى توقتالدى. – ونىڭ تولاسسىز عىلىمي ىزدەنىستەرى قازاق ۇلتتىق مۋزىكا اسپاپتارى تۋرالى تۇسىنىگىمىزدى بارىنشا كەڭەيتتى. ورتالىق ازيا ەلدەرىندە عانا ەمەس, بۇرىنعى كەڭەس وداعى كەڭىستىگىندەگى ەلدەردە دە ەتنوورگانولوگيا عىلىمىنىڭ دامۋىنا ۇلكەن اسەر ەتتى, – دەدى عالىم. ونەرتانۋشى عالىمدار ر.مالدىباەۆا, گ.ابدراحمان, گ.الپەيىسوۆا, گ.تاسقارين, ل.حالتاەۆا, ۇلتتىق مۋزەيدىڭ عىلىمي قىزمەتكەرى ر.نۇركەنوۆ, جۋرناليست ب.وسپان, باكۋدەگى ۋ.گادجيبەكوۆ اتىنداعى مۋزىكا اكادەمياسىنىڭ وقىتۋشىسى ف.سافاراليەۆا, ونەرتانۋ عىلىمىنىڭ كانديداتى, رەسەي ونەر تاريحى ينستيتۋتىنىڭ اعا عىلىمي قىزمەتكەرى گ.تاۆلاي جانە باسقالار مۋزىكاتانۋ سالاسىنداعى زاماناۋي باعىتتار مەن ەتنوورگانولوگيا ماسەلەلەرىن قوزعادى. كونفەرەنتسيادا ءسوز سويلەگەن بوكەڭنىڭ قىزى مايرا مەن كەلىنى گۇلنار اكەسىنىڭ قاراپايىمدىلىعى, ەڭبەكقورلىعى تۋرالى باياندادى. ونەر زەرتتەۋشىسى باسىنان ەشقاشان تاقياسىن تاستاماعانىن, ىسساپارعا شىققاندا قولىنداعى بار اقشاسىنا بارعان جەرىنەن مۋزىكالىق اسپاپتار عانا ساتىپ اكەلەتىنىن ايتىپ, ب.سارىباەۆتىڭ 90 جىلدىعىنا ارناپ ۇرپاقتارى شىعارعان «بولات سارىباەۆ. قازاقتىڭ مۋزىكالىق اسپاپتارى» كىتابىن سىيعا تارتتى. كونفەرەنتسيا اياسىندا قازۇوۋ ازىرلەگەن «سارىباەۆ ب.ش. ماقالالار مەن ماتەريالدار» جيناعىنىڭ (قۇراستىرۋشى س.بورانباەۆا) تانىستىرىلىمى ءوتتى. جيناققا ب.سارىباەۆتىڭ ماقالالارى, قازاق زيالىلارىنىڭ قازاق اسپاپتانۋ عىلىمى تۋرالى وي-تولعامدارى, ب.سارىباەۆقا ارنالعان ماقالالار, قوسىمشا فوتوسۋرەتتەر مەن ەستەلىكتەر توپتاستىرىلعان. سونداي-اق, كونفەرەنتسيا قوناقتارى ۋنيۆەرسيتەتتىڭ اقپاراتتىق-كىتاپحانا قىزمەتى ازىرلەگەن «بولات سارىباەۆ كورنەكتى عالىم-ەتنوورگانولوگ» قۇجاتتىق كىتاپ كورمەسى مەن ۇلتتىق مۋزەي قورىنداعى بولات سارىباەۆ كوللەكتسياسىنان ۇيىمداستىرىلعان مۋزىكالىق اسپاپتار كورمەسىن تاماشالادى. وسى شارا بارىسىندا تاعى ءبىر قىزىق دەرەككە كەزىكتىك. عالىمنىڭ ءومىر بويى تىرنەكتەپ جيناعان الەم حالىقتارى مۋزىكالىق اسپاپتارىنىڭ 309 داناسىن ۇرپاقتارى ۇلتتىق مۋزەيگە تابىستاعان ەكەن. ەسكە سالا كەتەيىك, حالىقارالىق كونفەرەنتسياعا قازاقستاندىق عالىمدارمەن بىرگە رەسەي, ازەربايجاننان بەلگىلى عالىمدار قاتىستى.
عازيزا يساحان, اقپاراتتىق كىتاپحانا قىزمەتىنىڭ باسشىسى