وبلىستىق توتەنشە جاعدايلار دەپارتامەنتىنىڭ باسشىسى الەكسەي سوۆەتوۆتىڭ مالىمەتىنە قاراعاندا, جىل باسىنان بەرى ماماندار تاراپىنان جابىق سۋ قويمالارىندا 467 بالا ءجۇزۋ ماشىعىنا ۇيرەتىلگەن. بۇل رەتتە 66 جاعاجايدىڭ شومىلۋشىلارعا دايار تۇرعاندىعىن دا ايتا كەتكەن ورىندى. اسىرەسە, دەمالىس ايماقتارىنىڭ كوپ بولىگى بۋراباي جانە زەرەندى شيپاجاي-كۋرورتتى ماسسيۆتەرىندە ورنالاسقان. مىنە, وسى دەمالىس ايماقتارىندا قايعىلى وقيعالاردىڭ تابان استىندا ورىن الىپ جاتۋى وكىنىشتى. مىسال دا جەتەرلىك. اقمولا تجد اقپاراتتارىنا جۇگىنسەك, وتكەن جىلى 22 ادام سۋعا كەتىپتى. سونىڭ بىرەۋى بالا كورىنەدى. سونداي قايعىلى جاعدايلاردىڭ كوپشىلىگى ىشىمدىك ءىشىپ, سۋعا تۇسۋدەن تۋىندايدى ەكەن. بۇدان باسقا, شومىلۋشىلار سۋعا تۇسكەندە قاۋىپسىزدىك ەرەجەلەرىن ساقتاي بەرمەيتىندىگى تاعى بار. ەڭ سوراقىسى سول, اتا-انالارى بالالارىن قاراۋسىز قالدىراتىندىعى. قاراۋسىز قالعان بالا وزگەلەرگە ەلىكتەيتىنىن ەسكەرسەك, ولاردى دەر كەزىندە قۇتقارىپ قالۋ دا مۇمكىن ەمەستىگى بەلگىلى. سوندىقتان دا توتەنشە جاعدايلار دەپارتامەنتى تۇراقتى نەگىزدە بالالارعا شومىلۋدى ۇيرەتۋدى قولعا العان. قىس مەزگىلى شومىلۋ ماشىعى جابىق سۋ قويمالارىندا (باسسەيندەردە) جۇرگىزىلسە, ال جاز مەزگىلدەرىندە مۇنداي جاتتىعۋلار اشىق سۋ قويمالارىندا جۇزەگە اسىرىلىپ كەلەدى. وبلىس ورتالىعىندا جازعى جاتتىعۋلار قوپا كولىندە جۇرگىزىلۋدە.
اسقار تۇراپباي ۇلى, «ەگەمەن قازاقستان»
اقمولا وبلىسى