ادەبي كەش شىمىلدىعىن وزبەكستان جازۋشىلار وداعى باسقارماسىنىڭ توراعاسى, اسا كورنەكتى پروزاشى مۇحامەد الي كىرىسپە سوزبەن اشىپ, كەش يەسىنىڭ وزبەك ادەبيەتىن دامىتۋعا قوسقان ەلەۋلى ۇلەسى مەن قازاق ادەبيەتىن ناسيحاتتاۋ باعىتىندا تىنىمسىز, جەمىستى جۇمىس ىستەپ جۇرگەن ەڭبەگىن جوعارى باعالادى. وزبەكستاننىڭ حالىق جازۋشىسى, مەملەكەتتىك سىيلىقتىڭ ەكى مارتە لاۋرەاتى, قازاقستان رەسپۋبليكاسى پرەزيدەنتىنىڭ رۋحانيات سىيلىعىنىڭ لاۋرەاتى, 88 جاستاعى ابىز ناسىر فازىلوۆ, فيلولوگيا عىلىمدارىنىڭ دوكتورى, پروفەسسور قازاقباي يۋلدوشەۆ, وسى شاراعا قازاقستاننان ات ارىتىپ ارنايى كەلگەن جازۋشى ءسابيت دوسانوۆ, اقىن ميرپۋلات ميرزا جانە باسقالار مەحمون يسلامقۇلوۆتىڭ پروزالىق, درامالىق شىعارمالارى, كول-كوسىر كورنەكتى اۋدارمالارى ادەبي قازىنانى بايىتا تۇسكەن اسا باعالى ەڭبەك ەكەندىگىن قاداپ ايتتى. قازاق اقىنى قاسىمحان بەگمانوۆ پەن وزبەك اقىنى لولا جۋنيس ارناۋ ولەڭدەرىن وقىدى. ادەبي كەشتىڭ ەكىنشى بولىمىندە جازۋشىنىڭ جارى ديلفۋزا اعىنان جارىلا اقتارىلا ايتقان اقجارما اق تىلەك پەن وزبەكستاننىڭ ونەر جۇلدىزدارى شىرقاعان اسەم اندەر ادەبي كەشكە ءار قيىردان جينالعان حالىقتىڭ كوڭىلىن كوككە كوتەردى. وزبەكستان مەن قازاقستاننىڭ مادەنيەتى مەن ادەبيەتىنە ايانباي ادال قىزمەت ەتىپ جۇرگەن كورنەكتى جازۋشىنىڭ قۇرمەتىنە ۇيىمداستىرىلعان جيىن دوستىقتىڭ تۋىن بيىك كوتەرگەن كوركەم كەش بولدى.
«ەگەمەن-اقپارات»