توقسانىنشى جىلداردىڭ باس كەزىندەگى قازاق ەلىنىڭ وتە مۇشكىل جاعدايىنىڭ كۋاگەرى بولعاندىقتان وتانىمنىڭ بۇگىنگى جەتكەن بيىگى, ءتىل-كوزدەن امان بولسىن, «تاۋبە» دەيمىن. تاۋەلسىزدىكتىڭ العاشقى جىلدارىندا ازىق-ت ۇلىك دۇكەندەرىنىڭ ءىشى تىپ-تيپىل بولىپ, بوس قالعانىن كوردىك. نان تۇسەتىن ۋاقىتتى كۇتكەندى دە باستان وتكىزدىك. ءتىپتى تۇز تابا الماي, كورشىلەردەن قارىزعا سۇراپ العان كۇندەر دە بولدى دەپ, قازىر ايتساق, جاستارىمىز ەرتەگى ايتىپ وتىرعانداي تاڭعالادى. مەنىڭ قاتارلاستارىم بىلەدى, بۇل – شىندىق.
تۇڭعىش پرەزيدەنتىمىز باسشى بولدى, ەل-حالىق قوسشى بولدى. بۇگىنگىدەي وتانىمىز جايناعان, جارقىراعان زامانعا جەتتىك. 1991 جىلدان 2011 جىلعا جەتكەندە تۇتاس ءبىر عاسىردى ارتقا تاستاعانداي بولدىق. كۇنى كەشە عانا, نەبارى 20 جىل بۇرىن قيراندىنىڭ ۇستىندە قالىپ, نە بولارى بەلگىسىز كۇي كەشكەن قازاق ەلى 2012 جىلى ەلباسى جاريالاعان «قازاقستان-2050» ستراتەگياسىن باسشىلىققا الىپ, الەمدە دامىعان ەلدىڭ قاتارىنا جەتۋگە باعىت الدى. جىل باسىندا تۇڭعىش پرەزيدەنتىمىز الەمدەگى دامىعان 30 ەلدىڭ قاتارىنا قوسىلۋ ءۇشىن وتانىمىزدى ءۇشىنشى, ياعني ساياسي رەفورما مەن ەكونوميكالىق جاڭعىرۋدىڭ جاڭا كەزەڭىنە باستادى. بەلگىلى ساياساتكەر مارگارەت تەتچەر «ەكونوميكا دەگەن – قۇرال, ماقسات – جاندى وزگەرتۋ» دەپ جازعانىنداي, جاڭا كەزەڭنىڭ مىندەتتەرىنە جەتۋ ءۇشىن ءدۇيىم جۇرتتىڭ نازارىن اۋدارعان ماقالاسىندا ەلباسى قازاقستاندىق قوعام مەن مەملەكەت قۇراۋشى حالىقتىڭ رۋحاني جاڭعىرۋعا تىكەلەي تاۋەلدى ەكەنىن تالداپ ايتىپ, بولاشاققا باعدار بولاتىن بىرنەشە باعىتتى كورسەتىپ بەردى. قازاق حالقىنىڭ ۇلتتىق رۋحاني وزەگىنە اينالعان قۇندىلىقتاردىڭ وزىعىن ساقتاي وتىرىپ, دامىتىپ, بۇگىنگى زامان تالابىمەن ۇيلەسپەيتىن ورىنسىز ىسىراپشىلدىق پەن استامشىلىققا, داڭعويلىق پەن كەردەڭدىككە ۇرىنباۋعا شاقىردى.
ەلباسى دۇنيەجۇزىلىك دامۋدىڭ كەشەگى, بۇگىنگى بەتالىسىنىڭ وزەگىنە اينالعان جاڭعىرۋ ۇلگىلەرىن سول قالپىندا قازاققا تاڭۋ ۇلتتىق تابيعاتتان اداسۋعا اپاراتىنىن دا ەسكەرتەدى. قازاق حالقىنىڭ كەشەدەن بۇگىنگە جەتكەن تاريحى, تەرەڭ ۇلتتىق رۋحاني وزىق سالت-داستۇرلەرى, شىنايى پاتريوتتىق ۇستانىمى ەلىمىزدىڭ بولاشاققا سەنىممەن نىق قادام باسۋىنا مىقتى تىرەك بولا الادى. وسى ورايدا ەلباسىنىڭ ارقايسىمىزدىڭ جۇرەك تۇكپىرىمىزدەگى تۋعان جەر تۋرالى وي-سەزىمدى تامىرشىداي تاپ باسىپ, از سوزبەن كوپ ويدى تارقاتا ايتقانى قانداي كەرەمەت! ادامدىقتىڭ اسىل ارناسى «تۋعان جەر» باعدارلاماسى قازاق بالاسىنىڭ قان تامىرىن بۇلقىنتارى انىق. بۇل – بارشامىزدىڭ تۋعان جەرگە دەگەن سۇيىسپەنشىلىك, ريزاشىلىق سەزىمدەرىمىزدى تۇمشالاماي, جارقىراتا كورسەتۋگە جۇمىلدىراتىن ىزگىلىكتىڭ, يگىلىكتىڭ باعدارلاماسى. وتانشىلدىق, پاتريوتتىق سەزىمنىڭ, ۇلتتىق مۇددە جولىندا ۇيىسۋدىڭ قاينار باستاۋى ىسپەتتى. تۋعان جەر قاشاندا, الەمنىڭ قاي پۇشپاعىندا جۇرسەك تە, جۇرەك تۇكپىرىندە, كوڭىل تورىندە ماگنيتتەي وزىنە تارتىپ تۇرادى.
«تۋعان جەر» باعدارلاماسىنا تيەك بولعان جاقسى باستامالاردىڭ, يگىلىكتى ىستەردىڭ ءتالىمدى نىشاندارى شاشىراڭقى بولسا دا ەل ىشىندە بارشىلىق. مىسالى, مەنىڭ تۋعان جەرىم تارباعاتاي اۋدانىندا (شىعىس قازاقستان وبلىسى) كاسىپكەر باۋىرلارىمنىڭ قارجىلاي دەمەۋشىلىگىمەن بىرنەشە جىلدان بەرى قازاقشا كۇرەستەن ىرعىزباي اۋليە دوسقانا ۇلى بابامىزدىڭ اتىنداعى رەسپۋبليكالىق جارىس وتكىزىلەدى. قازاق سپورتىنىڭ تۋىن, جاستاردىڭ رۋحىن كوتەرەتىن بۇل جارىس اۋدان ورتالىعىندا جالعاسا بەرمەك. سونداي-اق, الماتى قالاسىنداعى «مەرەي» باسپاسىنان «تاريحقا تولى – تارباعاتاي» عىلىمي-تانىمدىق جيناعى جارىق كوردى. بۇل ەلباسى ايتىپ وتىرعانداي, ورتا مەكتەپتە تۋعان جەردىڭ تاريحىن وقىتۋ ءۇشىن تارباعاتايلىق مۇعالىمدەرگە كومەكشى وقۋلىق قۇرالى بولا الادى.
كاسىپكەر باۋىرلارىمىز بۇل ءۇردىستى جالعاستىرىپ, جىلىنا ءبىر رەت «تاريحقا تولى – تارباعاتاي» الماناعىن شىعارۋدى جوسپارلاپ وتىر. اۋدان ورتالىعى اقسۋات اۋىلىندا جاڭا كوشەلەرگە ومىردەن وزسا دا, وشپەيتىن ىزدەرى قالعان, تاۋەلسىزدىك جىلدارىندا مەملەكەتىمىزدىڭ دامۋىنا ەلەۋلى ۇلەس قوسقان تۋعان ولكە تۇلەكتەرىنىڭ ەسىمدەرى بەرىلە باستادى. اۋداندىق اكىمدىك پەن ءماسليحات بىرلەسىپ ۇلگىلى ۇرپاعىمەن مەرەيى ءوسىپ, قۋانىشقا كەنەلىپ وتىرعان انالارعا «تارباعاتايدىڭ التىن اناسى», اۋداننىڭ وركەندەۋىنە بەلسەندى اتسالىسقان زەينەتكەرلەرگە «اۋداننىڭ ەكونوميكالىق جانە الەۋمەتتىك دامۋىنا قوسقان ۇلەسى ءۇشىن» ءتوس بەلگىلەرىن تاعايىندادى. ۇلتتىق رۋحاني تۇتاستىقتى ناسيحاتتايتىن ەسكەرتكىشتەر ورناتۋدا دا يگى ىزدەنىستەر كورىنە باستادى. حالقىمىزدىڭ ۇلتتىق بىرەگەيلىگىنىڭ مىزعىماس نەگىزىن قۇرايتىن, العاش رەت اۋقىمدى جوباعا اينالعان «تۋعان جەر» باعدارلاماسى الداعى ۋاقىتتا ەلىمىز بويىنشا اسا ماڭىزدى ىستەردىڭ جيناقىلىقپەن, جۇيەلىلىكپەن جۇرگىزىلۋىنە كەڭ جول اشادى. تۋعان جەرگە دەگەن سۇيىسپەنشىلىكتىڭ تاراۋ-تاراۋ ارناسى تەڭىزگە اينالىپ, ەلباسى ايتىپ وتىرعانداي, جالپىۇلتتىق ءپاتريوتيزمنىڭ ناعىز وزەگى بولارى حاق.
رۋحاني جاڭعىرۋدىڭ تىرەگى – تۋعان جەرىمىز.
سايراش ابىشقىزى, ءباسپاسوز ارداگەرى, قازاقستاننىڭ ەڭبەك سىڭىرگەن قايراتكەرى