جەڭىس قاسىمبەك مينيسترلىكتىڭ اتقارعان جۇمىس ناتيجەلەرىن بايانداپ, بيىلعى جىلدىڭ سوڭىنا دەيىن جۇزەگە اسىرىلاتىن جوبالارعا جانە الداعى جوسپارلار مەن مىندەتتەرگە توقتالدى.
ەسەپتىك جيىن ايماقتاردىڭ قاتىسۋىمەن بەينەكونفەرەنتسيا رەجيمىندە ءوتتى. مينيستر ءوز بايانداماسىندا 2017 جىلدىڭ 4 ايىنىڭ قورىتىندىسى بويىنشا وندىرىستىك ونەركاسىپ كولەمى 7,1%-عا وسكەنىن ايتتى. ونىڭ ىشىندە تاۋ-كەن ءوندىرۋ ونەركاسىبى (+7,8%), وڭدەۋ ونەركاسىبى (+6,8%), ءتۇستى مەتاللۋرگيانىڭ ءوسىمى ەسەبىنەن (+7,9%), قارا مەتاللۋرگيا (+9,3%) جانە فارماتسەۆتيكا (+49,7%) ءوسىپ وتىر.
2016 جىلى يندۋستريالاندىرۋ كارتاسى اياسىندا قۇنى 878 ملرد. تەڭگە بولاتىن 130 جوبا ىسكە قوسىلىپ, 10 مىڭ تۇراقتى جۇمىس ورنى اشىلدى. كارتا جوبالارى وتكەن جىلى 2,2 ترلن. تەڭگەنىڭ ءونىمىن ءوندىردى. ونىڭ 1,4 ترلن. تەڭگەسى وڭدەۋ ونەركاسىبىنە تيەسىلى. بيىل جالپى سوماسى 700 ملرد. تەڭگە بولاتىن 100-دەن استام جوبا جۇزەگە اسىرىلادى. بۇل جوبالار ارقىلى تاعى دا 10 مىڭ تۇراقتى جۇمىس ورنى اشىلادى.
بيىل يندۋستريا 4.0 ەلەمەنتتەرىن ەنگىزۋ اياسىندا جۇيەلى شارالار پاكەتىن جانە ونەركاسىپتى تسيفرلاندىرۋدا مەملەكەتتىك قولداۋ قۇرالدارىن ازىرلەۋ بويىنشا (زاڭنامالىق وزگەرىستەر, ستاندارتتاۋ جانە تاعى باسقالار) جۇمىستار جۇرگىزىلەدى.
2016 جىلدىڭ قورىتىندىلارى بويىنشا تىكەلەي شەتەلدىك ينۆەستيتسيا (تشي) 40% ءوسىپ, 20,6 ملرد. اقش دوللارىن قۇرادى (2015 ج. – 14,7 ملرد. دولل.). بىرلەسكەن جۇمىستاردىڭ ناتيجەسىندە بيىل اقپان ايىندا ەىدۇ كەڭەسى قازاقستاننىڭ ەىدۇ حالىقارالىق ينۆەستيتسيالار جانە كوپۇلتتى كاسىپورىندار جونىندەگى دەكلاراتسياسىنا قوسىلۋىن, سونداي-اق, ەىدۇ ينۆەستيتسيا جونىندەگى كوميتەتىنە «قاۋىمداستىرىلعان مۇشە» رەتىندە كىرۋىن ماقۇلدادى.
يننوۆاتسيا سالاسىندا 2016 جىلى جالپى سوماسى 1,9 ملرد. تەڭگەگە يننوۆاتسيالىق گرانتتار بەرۋ تۋرالى 66 كەلىسىمگە قول قويىلدى. حالىقارالىق تەحنولوگيالار ترانسفەرى ورتالىعىنىڭ ىقپالىمەن قازاقستانعا شەتەلدىك تەحنولوگيالاردى ترانسفەرلەۋ بويىنشا 15 جوبانى جۇزەگە اسىرۋ قولعا الىندى. ىرىكتەۋ ناتيجەسىندە 4 جوباعا جالپى سوماسى 800 ملن. تەڭگەنىڭ يننوۆاتسيالىق گرانتى بەرىلدى. 2017 جىلى مەملەكەت باسشىسىنىڭ جولداۋىن جۇزەگە اسىرۋ اياسىندا اتالعان ورتالىقتىڭ 2 پيلوتتىق جوباسىن جۇزەگە اسىرۋ جوسپارلانعان.
تەحنيكالىق رەتتەۋ جانە مەترولوگيا سالاسىندا ەاەو-نىڭ 40 تەحنيكالىق رەگلامەنتى بەكىتىلدى, ونىڭ 35-ءى كۇشىنە ەندى. ستاندارتتاۋ جونىندەگى جوسپارعا سايكەس, 747 ۇلتتىق ستاندارت ازىرلەندى. قازاقستان ورتالىق ازيا اۋماعى ەلدەرى ىشىندە ءبىرىنشى بولىپ 58 ولشەۋ مالىمەتتەرىنىڭ (سالماق, قاتتىلىق, تەمپەراتۋرا, ۋاقىت پەن جيىلىك, ۇزىندىق, رن ولشەمى) حالىقارالىق ستاندارتتارعا سايكەستىگىن دالەلدەدى.
مينيسترلىك 2016 جىلى «جەر قويناۋى جانە جەر قويناۋىن پايدالانۋ تۋرالى» قر كودەكسىنىڭ جوباسىن ازىرلەدى. قازىرگى ۋاقىتتا جوبا جۇمىس توبىنىڭ قاراۋىندا جانە بيىلعى جىلدىڭ سوڭىنا قاراي قابىلداۋ جوسپارلانىپ وتىر. كودەكستىڭ قابىلدانۋى گەولوگيالىق بارلاۋدىڭ ينۆەستيتسيالىق تارتىمدىلىعىن ارتتىرىپ, وتاندىق يۋنيورلىق كومپانيالاردى دامىتۋعا جانە قوسىمشا ينۆەستيتسيا تارتۋعا تىڭ سەرپىن بەرەدى, سونىمەن بىرگە ەلدەگى الەۋمەتتىك-ەكونوميكالىق احۋالعا وڭ ىقپال ەتەدى.
2016 جىلى كولىك سالاسىندا قىزمەت كورسەتۋ كولەمى 3,8%-عا ءوستى. لوگيستيكا تيىمدىلىگىنىڭ حالىقارالىق رەيتينگىندە قازاقستان 88 ورىننان 77 ورىنعا كوتەرىلدى (تمد-دا ۇزدىك بولدى). قىتاي-ەۋروپا-قىتاي باعىتىندا ءترانزيتتى كونتەينەرلىك تاسىمال 2 ەسە ءوسىپ, 104,5 مىڭ كونتەينەردى قۇرادى (2015 جىلى 47,3 مىڭ).
2017 جىلى كونتەينەرلەر سانىن 320 مىڭ بىرلىككە دەيىن, ونىڭ ىشىندە قىتاي-ەۋروپا-قىتاي باعىتى بويىنشا 165 مىڭ كونتەينەرگە ارتتىرۋ كوزدەلىپ وتىر (قازاقستان اۋماعى ارقىلى 11 باعىت بويىنشا شامامەن 100 كونتەينەرلىك پويىز وتەدى).
ترانزيتتىك اۆياجولاۋشىلار سانى 2016 جىلى 250 مىڭنان 478 مىڭعا دەيىن جەتتى. 2017 جىلى ولاردىڭ سانى 600 مىڭعا جەتەدى دەپ جوسپارلانعان. نەگىزگى جولاۋشىلار لەگىن ازيادان قازاقستان ارقىلى ەۋروپاعا جانە كەرى باعىتتا قاتىنايتىندار قۇرايدى.
2016 جىلى «نۇرلى جول» باعدارلاماسى اياسىندا رەسپۋبليكالىق ماڭىزى بار 920 شاقىرىم اۆتوكولىك جولدارىنداعى جوندەۋ جۇمىستارى اياقتالدى, سونداي-اق, ونىڭ 767 شاقىرىمى پايدالانۋعا بەرىلدى. جوبانى جۇزەگە اسىرۋ ءۇشىن 75 مىڭ ادام جۇمىلدىرىلدى. 2017 جىلى بولىنگەن قارجى ەسەبىنەن 7 وتپەلى جوبالاردىڭ جۇمىسى جالعاسىپ (استانا-قاراعاندى, ورتالىق-شىعىس, بەينەۋ-اقتاۋ, ورتالىق-باتىس, قاپشاعاي-تالدىقورعان, استانا–پەتروپاۆل جانە ورال-كامەنكا), جىل سوڭىندا سونىڭ 602 شاقىرىمىنداعى جۇمىستار اياقتالادى دەپ جوسپارلانىپ وتىر.
سونداي-اق, جالپى ۇزىندىعى 3,2 مىڭ شاقىرىمدى قۇرايتىن 15 جاڭا جوبانىڭ قۇرىلىسى باستالادى. جالپى العاندا, بيىل 4,4 مىڭ شاقىرىم جولعا جۇمىس جۇرگىزىلىپ, 100 مىڭ ادام جۇمىلدىرىلادى.
2016 جىلى جالپى تۇرعىن ءۇي قۇرىلىس الاڭىنىڭ فيزيكالىق كولەم يندەكسى 118%-دى قۇرادى. 10,5 ملن.شارشى مەتر تۇرعىن ءۇي پايدالانۋعا بەرىلدى. بۇل شامامەن 90 مىڭ باسپانا. بۇل سالا بويىنشا ينۆەستيتسيا كولەمى 2015 جىلى 740 ملرد. تەڭگە بولسا, 2016 جىلى 830 ملرد. تەڭگەگە جەتتى. جۇرگىزىلگەن رەفورمالار ناتيجەسىندە كاسىپكەرلەر ءۇشىن قۇرىلىس جۇرگىزۋگە رۇقسات الۋ مەرزىمى 3 ايدان 1 ايعا دەيىن قىسقاردى. اتالعان كورسەتكىشتەر بويىنشا 2 جىلدا قازاقستان بۇكىلالەمدىك بانك رەيتينگىسىندە 152 ورىننان 22 ورىنعا كوتەرىلدى.
«نۇرلى جەر» تۇرعىن ءۇي قۇرىلىسىنىڭ بىرىڭعاي باعدارلاماسى ازىرلەنىپ, ونىڭ اياسىندا 1,5 ملن. تۇرعىن ءۇي سالىناتىن بولادى. ال, 2017 جىلى 100 مىڭ تۇرعىن ءۇي سالۋ جوسپارلانىپ وتىر.