XX عاسىردىڭ باسىندا قازاق دالاسىندا قارقارالى پەتيتسياسى قابىلدانعان بولاتىن. ونىڭ تۇپكىلىكتى ماقساتى پاتشالىق رەسەيدىڭ وتارشىلدىق جۇيەسىنە قارسى تۇرۋ ەدى, –دەدى مۇحتاربەك كارىموۆ, –وسى پەتيتسيانىڭ باسىندا ءاليحان بوكەيحانوۆتاي دارا تۇلعا تۇردى. ۇلت-ازاتتىق قوزعالىستىڭ جاڭا مازمۇنعا يە بولۋىنىڭ تاعى ءبىر كورىنىسى قازاقتاردىڭ رەسەيدىڭ مەملەكەتتىك دۋماسىنا قاتىسۋىن ايتۋعا بولادى. سەمەي وبلىسى قازاقتارىنىڭ اتىنان ءا.بوكەيحانوۆ I مەملەكەتتىك دۋماعا دەپۋتات بولىپ سايلانعانى بارشاعا ءماشھۇر. سول ساتتەردە ول ءوزىنىڭ ساياسي كورەگەندىلىگىن كورسەتتى.
بۇدان سوڭ شاكارىم اتىنداعى مەملەكەتتىك ۋنيۆەرسيتەتتىڭ قازاق ءتىلى جانە ادەبيەتى كافەدراسىنىڭ پروفەسسورى, فيلولوگيا عىلىمدارىنىڭ دوكتورى اراپ ەسپەنبەتوۆ «رۋحاني تۋىستىق» تاقىرىبىنا وراي, ءاليحان مەن سۇلتانماحمۇت جايلى ايتتى. سونداي-اق, كونفەرەنتسيادا «الاشورداشىلار كوتەرگەن ءتىل ماسەلەلەرى» باعىتىمەن س.امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىنىڭ دوتسەنتى, فيلولوگيا عىلىمدارىنىڭ كانديداتى بەردىبەك بياروۆ, ء«تىل - حالىق رۋحىنىڭ جادى» ماسەلەسى بويىنشا قازاق يننوۆاتسيالىق گۋمانيتارلىق-زاڭ ۋنيۆەرسيتەتى گۋمانيتارلىق فاكۋلتەتىنىڭ دەكانى, فيلولوگيا عىلىمدارىنىڭ دوكتورى, پروفەسسور شىنار سەيىتوۆالار بايانداما جاسادى.كونفەرەنتسيا اياسىندا ارنايى كورمە دە جۇرتشىلىق نازارىنا ۇسىنىلدى. وسى جايلاردىڭ بارلىعى كورمەدە دەرەكتەر ارقىلى باياندالدى.
راۋشان نۇعمانبەكوۆا
سەمەي
سۋرەتتەردى تۇسىرگەن اۆتور