پرەزيدەنت اكىمشىلىگى مەن پرەمەر-مينيستر كەڭسەسىنىڭ, مادەنيەت جانە سپورت مينيسترلىگىنىڭ, سىرتقى ىستەر مينيسترلىگىنىڭ, اقپارات جانە كوممۋنيكاتسيالار مينيسترلىگىنىڭ, يۋنەسكو جانە يسەسكو ىستەرى جونىندەگى ۇلتتىق كوميسسيانىڭ, قازاقستان رەسپۋبليكاسىنداعى بىرىككەن ۇلتتار ۇيىمىنىڭ (بۇۇ) ايماقتىق وكىلدىگىنىڭ, «اق وردا» رەسپۋبليكالىق قوزعالىسىنىڭ قۇرمەتتى توراعاسى قايرات ساتىبالدى ۇلىنىڭ قولداۋ كورسەتۋىمەن ۇلتتىق كىتاپحانا عيماراتىندا باستالعان بيەننالەگە ادەبيەت بويىنشا نوبەل جانە باسقا دا سىيلىقتار لاۋرەاتتارى, بەلگىلى جازۋشىلار, الەمنىڭ 20-دان استام ەلىنەن عىلىم جانە مادەنيەت قايراتكەرلەرى, 40-تان استام شەت ەل قوناقتارى كەلدى. ەكونوميكالىق ءوزارا ىقپالداستىقتى نىعايتۋمەن قاتار, ادەبيەتشىلەردىڭ شىعارماشىلىق الەۋەتىن پايدالانا وتىرىپ, قوعامنىڭ رۋحاني كەڭىستىگىن كەڭەيتە ءتۇسۋ قاجەتتىلىگىن كورسەتۋدى ماقسات تۇتقان حالىقارالىق ادەبي بيەننالە ەكسپو-2017 كورمەسىنە ارنالعان مادەني ءىس-شارالار توپتاماسى اياسىندا وتكىزىلۋدە. اتالمىش شارا قازاقستاندى ۇلتتىق مادەنيەتى مەن مەنتاليتەتى سان الۋان حالىقتاردىڭ ءبىر-بىرىمەن تاتۋ تۇراتىن ءارى دوستىق پەن رۋحاني تۇتاستىققا ۇلاسقان سىندارلى بايلانىستار ورناتا الاتىن قوعام ۇلگىسى رەتىندە تانىتا تۇسپەك. 12-14 ماۋسىم ارالىعىندا وتەتىن, «ورتالىق ازيا – اراب الەمى: تاريح پەن مادەنيەتتىڭ ءوزارا ىقپالداستىعى» حالىقارالىق عىلىمي-تاجىريبەلىك كونفەرەنتسياسى, بيبليو-ءتۇن, «قوعامنىڭ رۋحاني جاڭعىرۋىنداعى كىتاپحانالاردىڭ ءرولى», «ۇلتتىق اۆتورلاردى اعىلشىن تىلىنە اۋدارۋ» اتتى دوڭگەلەك ۇستەلدەر, «ماعان كىتاپ وقىپ بەرشى» حالىقارالىق اكتسياسى, بەيرەسمي اڭگىمەلەسۋ, كىتاپ-ەكسپوزيتسيالىق جانە فوتوكورمەلەر, ارنايى ەكسكۋرسيالىق باعدارلامالار, الەمگە تانىمال جازۋشىلارمەن كەزدەسۋلەر سياقتى بىرنەشە باعدارلامانى قامتيتىن بيەننالە قورىتىندىسى بويىنشا الەم مادەنيەتى قايراتكەرلەرىنە ۇندەۋ جاسالىناتىن بولادى.
ميرا بايبەك, «ەگەمەن قازاقستان»
الماتى