پارلامەنت سەناتىنىڭ توراعاسى قاسىم-جومارت توقاەۆ شانحاي ىنتىماقتاستىق ۇيىمىنىڭ سامميتىنە قاتىسۋ ءۇشىن استاناعا كەلگەن بىرىككەن ۇلتتار ۇيىمىنىڭ باس حاتشىسى انتونيۋ گۋتەرريشپەن جۇمىس بابىندا كەزدەستى.
اڭگىمە بارىسىندا قازاقستان مەن بۇۇ ىنتىماقتاستىعىنىڭ ماسەلەلەرى تالقىلاندى. ق. توقاەۆ ءبىزدىڭ ەلىمىز بۇۇ-نى بالاماسىز ءارى امبەباپ ۇيىم رەتىندە قاراستىراتىنىن ايتتى. «قازاقستاننىڭ بۇۇ قاۋىپسىزدىك كەڭەسىنىڭ جۇمىسىنا بەلسەنە اتسالىسۋى ەلىمىزدىڭ سىرتقى ساياساتىنىڭ باسىم باعىتى بولىپ تابىلادى. ءبىز سونداي-اق بۇۇ-نى رەفورمالاۋ جونىندەگى باس حاتشىنىڭ كۇش-جىگەرىن قولدايمىز», - دەدى سەنات توراعاسى.
ا. گۋتەرريش پرەزيدەنت ن. نازارباەۆتىڭ بىتىمگەرلىك سالاسىنداعى, اتاپ ايتقاندا, سيرياداعى شيەلەنىستى رەتتەۋگە باعىتتالعان قىزمەتىن جوعارى باعالادى. باس حاتشىنىڭ پىكىرىنشە, «ەكسپو-2017» حالىقارالىق كورمەسى قازاقستاننىڭ ەكونوميكالىق الەۋەتى مەن حالىقارالىق بەدەلى جوعارىلاي تۇسكەنىنىڭ ناقتى كورىنىسى بولىپ تابىلادى.