بانكتىڭ قازىرگى بيزنەس ۇلگىسى تەحنولوگيالىق قىزمەتتەردى دامىتۋ ارقىلى پايىزسىز تابىس كولەمىن ارتتىرۋعا, سونداي-اق, جوعارى مارجينالدىلىقتى ساقتاي وتىرىپ, تولەم كارتالار نارىعىنداعى قىزمەتىن كەڭەيتۋگە باعىتتالعان.
«استانا بانكى» اق-نىڭ قاراپايىم اكتسيالارى ماۋسىمنىڭ سوڭىندا ساۋدالانا باستايدى, تيكەرى – ABBN. IPO-نىڭ ينديكاتيۆتىك باعاسى – ءبىر اكتسيا ءۇشىن 1 150 تەڭگە. IPO-عا ورنالاستىرىلاتىن اكتسيالاردىڭ سانى – 2,1 ملن. دانا, ورنالاستىرىلىم كولەمى – 2,5 ملرد. تەڭگە.
بۇل كۇندەرى «استانا بانكىنىڭ» قىزمەتى بەلسەندى ەكەنىن ايتۋعا بولادى. سوڭعى ءۇش جىلدا بانك ۇستانعان ستراتەگياسى اياسىندا تۇراقتى دامۋدى كورسەتىپ, بارلىق باستى ەلەمەنتتەرىنىڭ جۇمىسىن جونگە سالدى. قازىرگى تاڭدا بانك كارتالارىن 300 مىڭنان اسا كليەنت قولدانادى. بانكتىڭ قورى اي سايىن 10-12 پايىزعا ءوسىپ وتىر. جىل سوڭىنا قاراي قولدانىلاتىن كارتالار سانى 500 مىڭعا جەتەدى دەپ كۇتىلىپ وتىر.
«استانا بانكى» 2019 جىلى قازاقستاندا موبيلدىك بانك قولدانۋشىلارىنىڭ سانى جاعىنان كوشباسشىعا اينالۋدى كوزدەۋدە. وعان قوسا ترانزاكتسيالىق بانكينگتى جان-جاقتى دامىتىپ, شاعىن جانە ورتا بيزنەستى نەسيەلەۋگە كەڭىنەن قولداۋ كورسەتۋدە.
«استانا بانكى» باسقارما توراعاسى ەسكەندىر مايلىباەۆتىڭ ايتۋىنشا, ينۆەستورلاردان تارتىلعان قارجى ارى قاراي بانكتىڭ ونىمدەر ءتىزىمىن, IT-ينفراقۇرىلىمىن دامىتۋعا جانە دە كليەنتتەر قورىن ۇلعايتۋعا باعىتتالاتىن بولادى.
«فريدوم فينانس» كومپانياسى ساباعاتتىق قولداۋ كورسەتەتىن ورنالاستىرىمنىڭ اندەررايتەرى بولىپ تابىلادى, سونداي-اق, ول ماركەت-مەيكەر ءرولىن اتقارىپ, باعا بەلگىلەنىمىن قولداۋمەن اينالىساتىن بولادى.
ء«بىز بانك اكتسيونەرلەرى مەن باسشىلىعىنىڭ بيزنەس جۇرگىزۋدىڭ جاڭا ايقىندىلىق دەڭگەيىنە وتۋگە دەگەن ۇمتىلىسى مەن باعالى قاعازدارىن تارتىمدى باعا بويىنشا ءىرى ينۆەستورلارعا عانا ەمەس, سونداي-اق, جەكە تۇلعالاردىڭ كەڭ توبىنا ۇسىنۋعا دەگەن نيەتىن بارىنشا قولدايمىز. قارجى سەكتورىنداعى جالپى توقىراۋعا قاراماستان, بىرەگەي نارىقتىق ستراتەگياسى جانە بانك كورسەتكىشتەرىنىڭ ايرىقشا ءوسۋى ارقاسىندا بانك اكتسيالارىنىڭ قۇنى ايتارلىقتاي وسە الاتىندىعىن كورىپ وتىرمىز», دەيدى «فريدوم فينانس» يك باس ديرەكتورى تيمۋر تۋرلوۆ.
ءباسپاسوز ءماسليحاتى كەزىندە قازاقستان قور بيرجاسى باسقارما ءتورايىمىنىڭ ورىنباسارى ناتاليا حوروشەۆسكايا: «ينۆەستورلاردىڭ كەڭ توبى ءۇشىن «استانا بانكى» اق-نىڭ اكتسيالارىن باستاپقى ورنالاستىرۋ جالپى نارىققا دا كومپانيانىڭ وزىنە البەتتە وڭ ىقپال ەتەدى. بانكتىڭ IPO اياسىندا تابىسقا جەتۋى كومپانيانىڭ ينۆەستورلار سەنىمىنەن شىعا بىلگەندىگىن جانە كورپوراتيۆتىك باسقارۋدىڭ جوعارعى دەڭگەيىنە وتكەندىگىن بىلدىرەدى», دەدى.
ءوز كەزەگىندە KASE قور نارىعىن دامىتىپ, بيرجا اياسىندا قارجى مەن جاڭا ەميتەنتتەر تارتۋ ءۇشىن ەميتەنتتەرگە بارىنشا قولايلى جاعدايلاردى ۇسىنۋعا ۇمتىلۋدا.
ايناش ەسالي, «ەگەمەن قازاقستان»