سەمەيدە اسكەري بورىشىن اياقتاۋعا جاقىن قالعان ىشكى ىستەر مينيسترلىگىنە قاراستى 5511 اسكەري ءبولىمىنىڭ ەكى جاس ساربازى جاسۇلان شاعاتاەۆ پەن ابزال ورىنباساروۆ ەستەلىك ءۇشىن ەرتىس جاعاسىندا سۋرەتكە ءتۇسىپ الماق بولادى. الەمگە ايگىلى اسپالى كوپىر ىستانبۇلدان كەيىن سەمەيدە عانا ورنالاسقاندىقتان, وسى تۇسقا كەلىپ ەندى عانا سۋرەتكە تۇسە بەرگەن ساتتە ەكەۋى «قۇتقارىڭدار!» دەپ جانۇشىرا ايقايلاعان داۋىستى ەستيدى.
«نە ىستەۋ كەرەكتىگىن ەڭ الدىمەن ابزال ورىنباساروۆ ۇقتى, – دەپ ەسىنە الادى ەفرەيتور جاسۇلان شاعاتاەۆ. – ول ۇستىندەگى كۇرتەسىن لاقتىرا سالىپ, مۇزعا قويىپ كەتتى. مەن ونىڭ سوڭىنان جۇگىردىم. سويتسەك, ەرتىس وزەنىنىڭ ورتاسىندا ءبىر توپ جاس تۇر. بىرەۋى سۋعا تايىپ قۇلاپ, باتا باستاعان». ال جولداستارىن قۇتقارۋعا قورىققان جاستار ەستەرى شىققاندىقتان ايقايلاي بەرىپتى.
«بۇل ساتتە مەن قورقىنىش تۋرالى ويلامادىم دا, – دەيدى ابزال ورىنباساروۆ. – بار ماقساتىم سۋعا كەتكەن ادامنىڭ ءومىرىن ساقتاپ قالۋ بولدى». ولار دەرەۋ سۋعا باتىپ بارا جاتقان ازاماتقا كۇرتەلەرىن تاستاپ, ونى جاعاعا الىپ شىعادى. بۇدان سوڭ ساربازدار قاستارىنداعى كۋاگەرلەردىڭ بىرىنەن تەلەفون الىپ, «102» نومىرىنە حابارلايدى. قۇتقارىلعان جىگىت اۋرۋحاناعا بارۋدان باس تارتىپتى. ولار قىزمەت ەتەتىن اسكەري ءبولىم ءمالىم ەتكەندەي, ساربازدار جاسۇلان شاعاتاەۆ پەن ابزال ورىنباساروۆ قر ءىىم «شىعىس» وڭىرلىك قولباسشىلىعىنىڭ ارنايى سىي-قۇرمەتىنە يە بولىپتى.
راۋشان نۇعمانبەكوۆا, جۋرناليست سەمەي
سۋرەتتى تۇسىرگەن اۆتور