باتىرعا دەگەن بۇگىنگى قۇرمەت ەرتەڭ ەلى ءۇشىن اتقا قوناتىن ۇرپاققا ونەگە بولۋى ءتيىس. حالىق قاھارمانى اتانعان باتىرلارىمىزدىڭ قازىرگى قوعامدا الىپ وتىرعان ورنى مەن ناسيحاتتالۋى جانە ولارعا قورسەتىلەتىن سىي-قۇرمەت بۇگىنگى تاڭدا كوڭىل كونشىتپەيدى. باتىرلارىمىز جانقيار ەرلىكتى جەڭىلدىك, يا بولماسا وتەماقى الۋ ءۇشىن جاساعان جوق. ءتىپتى, ارامىزدا جۇرگەن از عانا قاھارماندارىمىزدىڭ وزدەرى بۇل تۋرالى اڭگىمە قوزعاعاندى نامىس سانايتىنى انىق. باتىرلىق پەن قاراپايىمدىلىق قاتار جۇرەتىنى بەلگىلى. ولاردىڭ ەرلىگىن ۇرپاققا پاش ەتىپ, لايىقتى باعاسىن بەرۋ − ەلدىگىمىزگە سىن. ەرىم دەگەن ەل بولماسا, ەلىم دەگەن ەر قايدان تۋسىن! ەلباسىمىزدىڭ ەڭ العاشقى جارلىقتارىمەن حالقىمىزدىڭ باتىر ۇلدارى, اتتارى اڭىزعا اينالعان باۋىرجان مومىش ۇلى, راقىمجان قوشقارباەۆتىڭ وسى اتاقتىڭ العاشقى يەگەرلەرى اتانعانى وسى ءسوزىمىزدىڭ دالەلى. سونىمەن قاتار, بەيبىت كۇندە ەرلىك كورسەتكەن ءبىرتالاي ازاماتتارىمىز دا وسى ماراپاتقا لايىق دەپ تانىلدى. العاشقى عارىشكەرلەرىمىز – توقتار اۋباكىروۆ پەن تالعات مۇساباەۆ, كەشەگى ايدىن ايىمبەتوۆ, اۋعان سوعىسىنىڭ باتىرى, قازىر ارامىزدا وتىرعان باقىتجان ەرتاەۆ اعالارىمىز – ءبىزدىڭ ماقتانىشتارىمىز. سول سياقتى 2011 جىلى تارازدا, تەرروريستەردەن ادامداردى قۇتقارۋ جولىندا ەرلىكپەن قازا تاپقان عازيز بايتاسوۆتى قالاي عانا قاھارمان دەمەسكە؟ جاس ۇرپاققا يدەال بولاتىن, وتان قورعاۋ, پاتريوتيزم دەگەن قاسيەتتى ۇعىمداردى پاش ەتەتىن ءدال وسى قاھارماندارىمىز ەكەنى انىق. جاسىراتىنى جوق, تىزىمدەگى وتىز ءباتىرىمىزدىڭ بىرازىنىڭ ەسىمىن بۇگىنگى ۇرپاق بىلمەيدى. مەكتەپ تۇلەكتەرىنىڭ تەست سۇراقتارىندا ءبىر كۇندىك شوۋ-بيزنەس وكىلدەرىنىڭ اتتارىنىڭ ورنىنا, سوعىستا كوزسىز ەرلىك كورسەتىپ, بەيبىت كۇندە ەڭ باستى قۇندىلىق − ادام ومىرىنە اراشا ءتۇسىپ, جاندارىن شۇبەرەككە تۇيگەن ەرلەردىڭ ەسىمى نەگە تۇرماسقا؟ ەرلىككە سۋسىنداپ وسكەن ۇرپاق تا نامىسىن قولدان بەرمەيتىن ازامات بولىپ وسپەي مە؟ ولار جايىندا وقۋلىقتاردا مۇلدەم ايتىلمايدى دەۋگە بولادى. حالىق قاھارمانى اتاعى ءتيىستى الەۋمەتتىك مارتەبەسىمەن لايىقتى بەكىتىلمەگەن. ال, كورشى مەملەكەتتە «گەروي روسسي» اتاعىنا يە بولعان قانداسىمىز سەرىك سۇلتانعابيەۆتىڭ ەرلىگىنە ەڭ جوعارى مەملەكەتتىك دەڭگەيدە قۇرمەت كورسەتىلىپ جاتقاندىعىن ءوز كوزىمىزبەن كورىپ وتىرمىز. مىسالى, باسقا دا الەۋمەتتىك كومەكتەردەن تىس, ولار 75 000 رۋبل اي سايىن جاردەماقى الادى. جاراقاتتارىنا قاراماستان, ەرلىكتىڭ سيمۆولى رەتىندە اسكەر قاتارىندا قالدىرىلىپ, اسكەري بولىمگە كوماندير بولىپ تاعايىندالدى. رەسەيدە ونداي باتىرلاردىڭ سانى 1,5 مىڭنان استام بولسا دا, ولارعا بولىنەتىن قارجىنى ەشكىم بيۋدجەتكە ارتىق جۇك دەپ سانامايدى. ال ءبىزدىڭ بەيبىت ەلدە, سوعىس قاھارماندارىنىڭ سانى ساۋساقپەن سانارلىق بولسا دا, ولارعا مەملەكەت كورسەتەتىن كومەكتەر بيۋدجەتكە قىمبات تۇسەدى دەپ قورقىپ وتىرمىز. زاڭنامادا بەلگىلەنگەن حالىق قاھارمانىنا بەرىلەتىن جەڭىلدىكتەردىڭ ىشىندە 20 شارشى مەتر قوسىمشا باسپانا مەن تەگىن قابىر تاسىن عانا اتاپ وتۋگە بولادى. مۇنداي كوزقاراس ءبىزدىڭ جاۋىنگەرلەرىمىزدى قانداي ەرلىك جاساۋعا يتەرمەلەيدى؟ وتان ءۇشىن ەرلىك جاساپ مۇگەدەك بولسا, ونىڭ وتباسى قايىرىمدىلىققا عانا قاراپ وتىرا ما؟ وسىعان بايلانىستى, «اق جول» قدپ حالىق قاھارمانى يەگەرلەرىنىڭ ەرلىكتەرىن بۇگىنگى ۇرپاققا كەڭىنەن ناسيحاتتاۋ ماقساتىندا كەلەسى شارالاردى جۇزەگە اسىرۋ كەرەك دەپ سانايدى. «حالىق قاھارمانى» اتاعى يەلەرىنە ۇكىمەت قاۋلىسىمەن لايىقتى مارتەبە بەرۋ; استانا جانە الماتى قالالارىندا, وبلىس ورتالىقتارىندا «حالىق قاھارماندارى» اللەياسىن اشۋ جانە ەلدى مەكەندەردەگى الەۋمەتتىك وبەكتىلەر مەن كوشەلەرگە ولاردىڭ اتتارىن بەرۋ; باتىرلاردىڭ ءومىربايانىن, ەرلىك جولدارىن جەكە جيناق ەتىپ شىعارىپ, مەكتەپ باعدارلاماسىنا ەنگىزۋ جانە دە ەرلىك ساباعىن داستۇرگە اينالدىرۋ.
بەرىك دۇيسەمبينوۆ, ءماجىلىس دەپۋتاتى