مادەنيەت جانە سپورت ءمينيسترى ارىستانبەك مۇحامەدي ۇلىنىڭ شاقىرۋىمەن الەۋمەتتىك جاعىنان از قامتىلعان وتباسى بالالارى «Kinopark 7 IMAX 3D» كينوتەاترىندا «قاۋىرسىندى ۇشتىك» انيماتسيالىق ءفيلمىن تەگىن تاماشالادى. حالىقارالىق بالالاردى قورعاۋ كۇنىنە وراي ۇيىمداستىرىلعان شاراعا 50-گە تارتا جەتكىنشەك قاتىستى.
بالالار كينودا ريچارد تورعاي, ولگا ۇكى مەن كيكي توتىقۇسى تۋرالى ءمۋلتفيلمىن كورىپ قانا قويماي, تاتتىلەردەن تۇراتىن توسىن سىيعا يە بولدى. كورسەتىلىمنەن جاقسى اسەر الىپ شىققان بالعىن كورەرمەندەر قايىرىمدىلىق, دوستىق پەن تاتۋلىق تۋرالى فيلمدەردى تاماشالاۋدى جاقسى كورەتىندىكتەرىن ايتتى. فيلمنەن كەيىن بالالار ۇلتتىق مۋزەيدە بولىپ, تۋعان ەل تاريحى مەن مادەنيەتىنە ەكسكۋرسيا جاسادى. سونىمەن قاتار, مادەنيەت جانە سپورت مينيسترلىگى, رەجيسسەر تالعات تەمەنوۆتىڭ «بيبول» اتتى كوركەم ءفيلمىنىڭ تۇساۋكەسەرىن وتكىزدى. فيلم جەلىسى بيبول ەسىمدى ەرەكشە بالا مەن مۋزىكانت قاسىمحان قاريا تۋرالى اسەرلى وقيعامەن ورنەكتەلگەن.
«ەگەمەن-اقپارات»