ەل تاۋەلسىزدىگىنىڭ 25 جىلدىعىنا وراي تارباعاتاي اۋدانىندا «تارباعاتاي جۇلدىزدارى» ءان فەستيۆالى ءوتتى. بارقىتبەل باۋىرىندا ءتورتىنشى مارتە وتكەن فەستيۆال بيىل العاش رەت حالىقارالىق دەڭگەيدە ۇيىمداستىرىلىپ, شەت ەلدەردەگى قانداستاردىڭ دا باسىن قوسقان ونەر بايگەسىنە اينالدى.
اتاپ ايتقاندا, رەسەي, قىتاي, مونعوليا جانە قىرعىزستان, سونداي-اق, ەلىمىزدىڭ وڭتۇستىك قازاقستان, قىزىلوردا, اقمولا, پاۆلودار, شىعىس قازاقستان وبلىستارىنان 50-دەن استام ونەرپاز سايىسقا ءتۇستى. تاۋەلسىزدىك تويىنا ارنالعان فەستيۆالدە ورىنداۋشىلار حالىق اندەرى مەن قازاقستان كومپوزيتورلارىنىڭ تۋعان جەر تاقىرىبىنداعى شىعارمالارىن شىرقادى. اسىرەسە, رەسەيدىڭ التاي ايماعى قوساعاش اۋدانىنان جانە قىتايدىڭ شۇار التاي ايماعىنان كەلگەن قانداستار «اعاجاي, التاي», «قالقا» سىندى اندەردى ناشىنە كەلتىرە ورىندادى. الاتاۋدىڭ ارعى جاعىنان كەلگەن ايىر قالپاقتى اعايىندار دا اسقان شەبەرلىك تانىتتى.
بايقاۋدىڭ ەكىنشى كەزەڭىنە وتكەن 25 ونەرپاز قازاقستان كومپوزيتورلارىنىڭ كەڭ تاراعان پاتريوتتىق اندەرىن ورىندادى. ونىڭ ىشىندە بىشكەكتەن كەلگەن «زالقار» توبىنىڭ ورىنداۋىنداعى ش.قالداياقوۆتىڭ «انا تۋرالى» ءانى تىڭدارماندى ەرەكشە باۋراي ءبىلدى. سونداي-اق, س.بايتەرەكوۆتىڭ ايگىلى «ءاليا» ءانى بايقاۋدا بىرنەشە مارتە ورىندالدى.
تارباعاتاي باۋىرىن ەكى كۇن بويى ءان-دۋمانعا بولەگەن بايقاۋ قورىتىندىسى بويىنشا فەستيۆالدىڭ گران-پري جۇلدەسىن زايساندىق ىسپەك ناۋرىزحان جەڭىپ الدى. اۋدان اكىمى دىلدابەك ورازباەۆ حالىقارالىق فەستيۆالدى وتكىزۋگە ات سالىسقان ونەر مايتالماندارى مەن كاسىپكەرلەرگە شەكسىز ريزاشىلىعىن ءبىلدىرىپ, بايقاۋ جەڭىمپازدارى مەن جۇلدەگەرلەرىن ماراپاتتادى.
دۋمان اناش,
«ەگەمەن قازاقستان»
شىعىس قازاقستان وبلىسى,
تارباعاتاي اۋدانى