قازاقستاننىڭ حالىق ءارتيسى, مەملەكەتتىك سىيلىقتىڭ يەگەرى, سكريپكاشى ايمان مۇساقوجاەۆا وتانداستارىمىزدىڭ جەمىستى ەڭبەك جولىن ناسيحاتتاۋدى كوزدەيتىن ۇلتتىق «تابىستىڭ 100 قادامى» جوباسىنىڭ كەزەكتى كەيىپكەرى.
سكريپكادا ويناۋ ءۇشىن وتە نازىك ەستۋ قابىلەتى مەن ەڭبەكتەنۋ, تاباندىلىق بولۋعا ءتيىستى. ويتكەنى بۇل اسپاپ كىنامشىل, كىرپيازدىعىمەن ەرەكشە. ايمان مەكتەپتە وقىعان كەزىنەن تاڭعى ساعات 6-دا تۇرىپ سكريپكاسىن قولىنا الىپ, رەپەتيتورياعا بارىپ, ساباق باستالعانشا دايىندالاتىن. اناسىنىڭ «ەشكىمنىڭ قولىنا قاراما, ءوز ەڭبەگىڭە سەن» دەگەن اقىلى ءالى ەسىندە. كەشكى ۋاقىتتا دايىندالىپ تۇرىپ ءوزى سەكىلدى كىشكەنە بالالاردىڭ, سىنىپتاستارىنىڭ اۋلادا اسىر سالىپ ويناپ جاتقانىن ەستىسە دە, سكريپكانىڭ قىر-سىرىن مەڭگەرۋگە ەرەسەكتەرشە دەن قوياتىن. مۋزىكاعا قۇشتارلىعى ءبارىن ۇمىتىرىپ, بەرىلە وينايتىن.
قوجابەك پەن راحيلا مۇساقوجاەۆتاردىڭ ءتورت قىزى قازداي ءتىزىلىپ ءبىر ينتەرناتتا وقىدى. ءبىر سالاعا, ىشەكتى-ىسقىلى اسپاپتاردا ويناپ ۇيرەنۋگە باردى. جاي وقىپ قويعان جوق, رايسا مەن ايمان سكريپكانى, راۋشان قىلقوبىزدى, باقىتجان ۆيولوچەل اسپاپتارىن شەبەر مەڭگەرىپ, قازىرگى كەزدە دە ءبىر وقۋ ورداسىندا - استاناداعى قازاق ۇلتتىق مۋزىكا ۋنيۆەرسيتەتىندە قىزمەت ەتۋدە.
العا قويعان ماقساتىنا بويىنداعى جىگەرىمەن, ەڭبەگىمەن جەتە بىلەتىن ايمان رەسپۋبليكالىق ك.بايسەيiتوۆا اتىنداعى دارىندى بالالاردىڭ رەسپۋبليكالىق مۋزىكا مەكتەبiندە پروفەسسور ن.پاترۋشەۆادا وقىدى. ءارى قاراي ماسكەۋدەگi پ.چايكوۆسكي اتىنداعى مەملەكەتتiك كونسەرۆاتوريادا ايگىلى پروفەسسور ۆ.كليموۆتىڭ كلاسىندا وقۋىن جالعاستىردى.
ونىڭ رەپەرتۋارىندا الەم مۋزىكاسىنىڭ جاۋھارلارىنان ي.س.باح, ي.گايدن, ۆ.ا.موتسارت, ل.بەتحوۆەن, ن.پاگانيني, ا.حاچاتۋريان, ي.برامس, پ.چايكوۆسكي, سياقتى كومپوزيتورلار تۋىندىلارى مەن كسرو حالىق ءارتيسى ە.راحماديەۆ, زامانداسى س.ەركىنبەكوۆ سەكىلدى وتاندىق سازگەرلەر شىعارمالارى ورىن العان. سونىمەن بىرگە مۋزىكانت تىڭدارماندارىنا ۇنەمى جاڭا, زاماناۋي مۋزىكالاردى وينايدى.
تۋمىسىنان قايسار مىنەزدى ايماننىڭ العاشقى جەڭىسى وسىدان 40 جىل بۇرىن بەلگرادتا وتكەن حالىقارالىق كونكۋرستا بولدى. 18 جاسار قازاق قىزى ويناعان كۇردەلى شىعارماسىمەن دە, مىقتى تەحنيكاسىمەن دە, سيرەك كەزدەسەتىن مۋزىكالىق ويجوسىعىمەن دە تىڭداۋشىلارىن تاڭ قالدىردى. وسى كەزدەن باستاپ ايمان قوجابەكقىزىنىڭ تابىستى شىعارماشىلىق جولى باستالدى. 1980-ءشى جىلدارى ول 4 حالىقارالىق كونكۋرستا جەڭىمپاز اتاندى!
سكريپكاشى جەكە ورىنداۋشىلىق شىعارماشىلىعىمەن قاتار ۇستازدىق, ۇيىمداستىرۋشىلىق, قوعامدىق ەڭبەك جولىن تەپە-تەڭ ۇستادى. 1992 جىلى مەملەكەتتiك «سوليستەر اكادەمياسى» كامەرالىق وركەسترiن قۇرىپ, كوركەمدىك جەتەكشى بولدى. باي رەپەرتۋارلى بۇل ۇجىمىنىڭ كاسىبي ورىنداۋشىلىعىن جاقىن جانە الىس شەتەلدەردەگى حاس سكريپكاشىلار جوعارى دەڭگەيدە باعالادى. سونىمەن قاتار ا.مۇساقوجاەۆا جيىرما جىلدان استام ۋاقىت چايكوۆسكي اتىنداعى (رەسەي), ابرام يامپولسكي اتىنداعى (دۋبنا), ميكەلانجەلو اببادو اتىنداعى (يتاليا) حالىقارالىق سكريپكاشىلار كونكۋرسىنىڭ قازىلار القاسىنىڭ تۇراقتى مۇشەسى.
پەداگوگيكالىق ەڭبەك جولىندا ول حالىقارالىق دەڭگەيدە دۇيسەن وردابەك سەكىلدى تالاي سكريپكاشىنى تاربيەلەدى. ولار ەلىمىزدە دە, شەتەلدەردە دە قىزمەت ەتىپ ءجۇر. «ءومىردىڭ ءبارى جەڭىستەن, تابىستان تۇرمايدى. جاراتۋشى ادامعا وزىندەگى كەمشىلىكتەرمەن جۇمىس جاساپ, جەتىلدىرە ءۇسۋ ءۇشىن جەڭىلىستەردى دە بەرەدى. ارينە سونداي كەزدە وزىڭە سىرت كوزبەن قاراپ, شەبەرلىگىڭدى ودان ءارى دامىتا تۇسەسىڭ», – دەيدى سكريپكاشى.
استاناداعى 1998 جىلى قازاق ۇلتتىق مۋزىكا اكادەمياسىنىڭ قۇرىلۋى ايمان قوجابەكقىزىنىڭ ۇلكەن ارمانى ەدى. ەلباسىنىڭ قولداۋىمەن وتاندىق ونەردىڭ دامۋىنا جول اشاتىن وقۋ ورداسى اشىلدى.
ا.مۇساقوجاەۆانىڭ ۇسىنۋىمەن قازىرگى ۋنيۆەرسيتەتتە ءۇش دەڭگەيلى ءبىلىم جۇيەسى – باستاۋىش, ورتا جانە جوعارى ءبىلىم بەرۋ جۇزەگە اسىرىلۋدا. مۇندا تۇيمەدەي بوپ كەلگەن جاس دارىندار مۋزىكالىق ءبىلىمدى بىرتىندەپ كاسىبي يگەرىپ, ءىرى ونەر تۇلعالارىنان ءدارىس الىپ, قالىپتاسقان مۋزىكانت بوپ بىتىرۋدە. تالاپتى جاستارعا ءبىلىم الۋعا بارلىق مۇمكىندىكتەر جاسالعان. سونىمەن بىرگە كاسىبي شىڭدالۋ جولىندا قازۇمۋ ماسكەۋ كونسەرۆاتورياسى, پاريج, حەلسينكي, حورۆاتيا مۋزىكالىق اكادەميالارىمەن ءوزارا تاجىريبە الماسۋ باعىتىندا ماڭىزدى كەلiسiمشارتتار جاسالۋدا.
سكريپكاشىنىڭ وسىنداي ءىرى ءبىلىم بەرۋ ورتالىعى مۋزىكانىڭ بارلىق باعىتتارىندا بەلسەندى ونەرپازداردى تاربيەلەپ, قازاقستان ونەرىنىڭ وسۋىنە دامىلسىز ۇلەسىن قوسا بەرمەك.
باقىت جولدىبايقىزى