مۇحيت ۇستىندەگى سەڭدى ەرىتۋ وڭاي شارۋا بولماعانىمەن, ادام كوكىرەگىندە جاتقان ارمان – سەڭدى ءجىبىتۋ الدەقايدا قيىن ەكەنىنە عاسىرلار بويعى تاريحىمىز كۋا. ادام ساناسىنداعى سەڭدى بۇزىپ شىعىپ, كەلەشەككە جول اشۋ اسقان قايراتپەن تاۋەكەلشىلدىكتى بويىنا دارىتقان, ەلىنە سەنىمى مول, قازاق ەلىنىڭ التىن دىڭگەگى بولا بىلگەن, حالقىن قادىرلەپ, وتانىن ارداقتاعان ن.ءا.نازارباەۆتىڭ عانا قولىنان كەلدى.
وتكەن عاسىردىڭ 90-جىلدارىنىڭ باسىنداعى وداق تاراعاننان كەيىنگى ەل جاعدايىن ءبىر ءسات ەسكە الايىقشى. سول كەزدەگى سىرەسكەن قيىندىقتاردى كورە تۇرىپ, جاۋاپكەرشىلىكتى «ارقالاپ», 17 ميلليوننان استام حالقىنا پانا بولۋىنا, بەل شەشىپ كىرىسكەن ازامات – نۇرسۇلتان ءابىش ۇلى نازارباەۆ بولدى. «ەل باستاۋ قيىن ەمەس, قوناتىن جەردەن كول تابىلادى. قول باستاۋ قيىن ەمەس, شاباتىن جەردەن ەل تابىلادى. شارشى توپتا ءسوز باستاۋدان قيىندى كورگەن جوقپىن», – دەگەن ەكەن بۇقار جىراۋ بابامىز. ەلباسىنىڭ قىل كوپىردىڭ تالايىنان تايماي وتكەنىنە كۋاگەرمىز. ۇشى-قيىرى جوق كەدەرگىلەردى جەڭۋ ءۇشىن ءار ءوڭىردىڭ, ءار شارۋانىڭ ايىرماشىلىعىن ەسكەرە وتىرىپ قيىندىقتاردى جاسىرماي, ولاردى تۇزەتۋ جولدارىنا حالىقتىڭ كوزىن جەتكىزىپ ىنتاسىن ارتتىرىپ وتىردى.
مۇنىمەن قاتار, تاۋەلسىزدىكتى باياندى ەتۋ ءۇشىن, مەملەكەتتىك شەكارانى انىقتاپ بەكىتۋ, ديپلوماتيالىق كورپۋستى قالىپتاستىرۋ, توقتاپ قالعان وندىرىستەردى ىسكە قوسۋ, حالىقتىڭ الەۋمەتتىك الەۋەتىن جاقسارتۋ, زاڭدىلىقتى ساقتاۋ, حالىقتىڭ ءوز ەلىنە دەگەن سەنىمدىلىگىن اتتىرۋ, مەكتەپتەردىڭ, باسقا وقۋ ورىندارىنىڭ ءۇزدىكسىز جۇمىس ىستەۋى, جاستارعا جاڭا تالاپقا ساي جاعدايلار جاساۋ, شەتەلدەردە وقىتۋ, پاتريوتتىق رۋحىن كوتەرۋ, شەت مەملەكەتتەردەن ينۆەستيتسيا تارتۋ سياقتى جانە ت.ب. ءماسەلەلەردىڭ بايىپتى بولۋىن قامتاماسىز ەتۋ كەرەك بولدى. بۇلار ايتۋعا عانا وڭاي ەدى.
ن.ءا.نازارباەۆپەن ءبىرىنشى رەت جۇزبە-ءجۇز كەزدەسۋىمىز 1976 جىلى ازەربايجان رەسپۋبليكاسىنىڭ استاناسى باكۋدە ءوتكەن بۇكىلوداقتىق ازيا جانە افريكا ەلدەرىمەن ىنتىماقتاستىق كوميتەتىنىڭ ەسەپ بەرۋ, سايلاۋ سەسسياسىندا بولدى. سەسسياعا دەلەگاتتار: ن.نازارباەۆ, ە.سەركەباەۆ, ە.ليزۋنوۆا, ش.مۇرتازا, ءو.ءجانىبەكوۆپەن بىرگە قاتىستىق. ازيا جانە افريكا ەلدەرىنەن كەلگەن قوناقتار بولدى. ولار ءوز ەلدەرىندەگى وتارلىق قىسپاقتاردى جەڭىپ, جەكە مەملەكەت بولىپ قالىپتاسۋدىڭ, الەۋمەتتىك قيىندىقتاردى شەشۋ جاعدايلارىنىڭ قيىندىقتارىن ايتىپ, ءبىزدىڭ ەلگە راحمەتتەرىن جەتكىزدى. ارامىزدا شەتەلدەرمەن كەزدەسۋ جينالىسىنا ءبىرىنشى بولىپ قاتىسقان پارتيا قىزمەتكەرى, تالاپتى دا تالانتتى جاس نۇرەكەڭنىڭ الدى اشىق بولاتىنىنا زور سەنىممەن تىلەكتەر ايتىستىق. نۇرسۇلتان ءابىش ۇلى نازارباەۆتىڭ قازاقستان ورتالىق پارتيا كوميتەتىنىڭ ءوندىرىس ءجونىندەگى حاتشىسى بولىپ سايلانعانىمەن قۇتتىقتاپ, جاقىندا جارىق كورگەن ءوزىمنىڭ كىتاپشامدى ۇسىندىم.
2003 جىلى استانادا ايەلدەر مەرەكەسى – 8 ناۋرىز قارساڭىندا ن.ءا.نازارباەۆ قاتىسقان ۇلكەن رەسپۋبليكالىق جينالىس ءوتتى. وعان پارلامەنت مۇشەلەرى, مينيسترلەر قاتىستى. بۇرىنعى استانا – الماتىدان ءبىر توپ دەلەگات كەلگەنبىز. كەلەشەگى زور جاس قالا استانانى قۇتتىقتاپ, ءجۇزى كوركەم, ايبىنى بيىك, ەلىمىزدىڭ ءوسىپ-وركەندەۋىنە باس بولسىن دەگەن جاقسىلىق تىلەكتەر ايتقان ەدىم. 2005 جىلى استانادا پرەزيدەنت سايلاۋى قارساڭىندا وڭىرلىك ارداگەرلەر كەڭەستەرىنىڭ جەتەكشىلەرى باس قوسقان كەزدەسۋدە نۇرسۇلتان ءابىش ۇلىنىڭ حالىققا ارناعان ويلارىن تىڭدادىق. وسى ساپار بارىسىندا ەلىمىزدىڭ ارداقتى اقساقالدارى – بايكەن ءاشىموۆ باستاعان ەل اعالارى نۇرەكەڭە سايلاۋ الدىندا باتاسىن بەردى.
ۇلى جەڭىستىڭ 65 جىلدىعىن استانادا قارسى الدىق. الماتى قالاسىنان 20 شاقتى وتان سوعىسىنىڭ ارداگەرلەرى, ىشىندە وتاعاسى شاپاعات ءالبازار ۇلىنىڭ (بەرليندى الۋ وپەراتسياسىنا قاتىسقان) سالتاناتتى ماجىلىستە ءبىرىنشى اتى اتالىپ, نۇرەكەڭنىڭ قولىنان «قۇرمەت» وردەنىن الدى.
تاۋەلسىزدىكتىڭ ءار جىلىنا كۋاگەر بولىپ, وعان ات سالىسۋ 1992 جىلدان باستالعان ەكەن. الماتى قالالىق ارداگەرلەرىنىڭ جاستار كومميسسياسىن باسقارامىن. وتان سوعىسىنا قاتىسقان, سوعىس جىلدارى تىلدا ەڭبەك ەتكەن بەدەلدى ازاماتتارمەن بىرگە مەكتەپتەردە, ورتا جانە جوعارى وقۋ ورىندارىندا جاستارمەن ءماندى كەزدەسۋلەر, دوڭگەلەك ۇستەل, كونفەرەنتسيالار وتكىزەمىز. زيالى قاۋىم وكىلدەرى وزدەرى ءجۇرىپ وتكەن ومىرلەرى تۋرالى ايتىپ, جاستارعا ءبىلىمدى مامان بولۋدى, ءۇش ءتىلدى مەڭگەرۋدى, كۇندەلىكتى ومىرگە يكەمدەلۋدى, حالىقتار اراسىنداعى تاتۋلىقتى ساقتاۋ, قازاقستاندىق پاتريوتتىق سەزىمدى ناقتى ىستەرمەن كورسەتۋدى ناسيحاتتايدى. ارداگەرلەردىڭ قوعامدىق جۇمىستارعا قاتىسقان ەڭبەكتەرى ەش كەتكەن جوق. ءبىر جارىم ميلليونداي حالقى بار, 130-داي ۇلت وكىلدەرى شوعىرلانعان, اسەم قالا الماتىدا, سونداي-اق بۇكىل ەلىمىزدە تىنىشتىق پەن تاتۋلىق سالتانات قۇردى.
مەن تاۋدى بۇزىپ, تاس جارعان ادام ەمەسپىن. وتان سوعىسى جىلدارى جەر جىرتىپ, ەگىس ەگىپ, ونى جيناپ مەملەكەتكە وتكىزۋ ماسەلەسىندە كومەكشىلەر قاتارىندا بولعانىم بار. اتقارىپ كەلە جاتقان ەڭبەگىم – جاستارىمىزدىڭ ادال بولۋىنا, ءبىلىمدى بولۋىنا, ۇلتتىق ادەت-عۇرىپ پەن, پاتريوتتىق رۋحتا تاربيەلەنۋىنە شاما كەلگەنشە كومەكتەسىپ, جاسىم 90-عا جاقىنداپ وتىرسا دا ەل بىرلىگىنە ۇلەس قوسىپ وتىرعانىما تاۋبە دەيمىن.
جەر ءجۇزى مەملەكەتتەرىنە ۇلگى كورسەتكەن, ادام كوكىرەگىندەگى سەڭدى بۇزىپ, قازاق ەلىن ماڭگىلىك جولعا باستاۋشى تۇڭعىش پرەزيدەنتىمىز – ەلباسى نۇرسۇلتان ءابىش ۇلى نازارباەۆقا اللا جار بولسىن! مەرەكە قۇتتى بولسىن, ەلىمىزگە تاۋسىلماس تابىس, زور ابىروي تىلەيمىن!
بيجامال رامازانوۆا,
الماتى قالاسىنىڭ قۇرمەتتى
ازاماتى, قالالىق ارداگەرلەر
كەڭەسىنىڭ مۇشەسى