ەل تاۋەلسىزدىگىنىڭ 25 جىلدىعى جانە قر تۇڭعىش پرەزيدەنتى كۇنىنە وراي الپينيزم جانە قۇزعا سپورتتىق ورمەلەۋ فەدەراتسياسىنىڭ ۇيىمداستىرۋىمەن الپينيستەر ىلە الاتاۋىنىڭ ايگىلى شىڭى «نۇرسۇلتان» بيىكتىگىنە كوتەرىلدى.
«27 قاراشا كۇنى 64 ادامنان تۇراتىن الپينيستەر توبى تاۋەلسىزدىكتىڭ 25 جىلدىعى مەن قر تۇڭعىش پرەزيدەنتى كۇنىنە ارناپ, «نۇرسۇلتان» شىڭىنا كوتەرىلۋگە اتتاندى. قار قالىڭ جاۋىپ, اۋا رايى -27 گرادۋسقا دەيىن تومەن بولۋىنا بايلانىستى 42 ادام عانا دىتتەگەن مەجەگە كوتەرىلە الدى. ءبىزدى قر پرەزيدەنتى اپپاراتى, الماتى اكىمدىگى, مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتى قولدادى. «نۇرسۇلتان» شىڭى بوگدانوۆيچ مۇزدىعىنىڭ باس جاعىندا ورنالاسقان. سولتۇستىگىندە قارلىتاۋ, شىعىسىندا اريستوۆ شىڭىمەن ۇلاسادى. بۇل شىڭعا 1930 جىلى 17 شىلدەدە گ.بەلوگلازوۆ باستاعان توپ شىعىپ, كىشى الماتى شىڭى دەپ اتاعان. ءدال وسى جىلدى قازاقستان ءالپينيزمىنىڭ باستاۋى دەپ ەسەپتەگەن. ال 1935 جىلى 11 شىلدەدە الماتىدا 1-كومسومولدىق الپينيادا ءوتىپ, كىشى الماتى شىڭى «كومسومول» اتاۋىنا اۋىستىرىلدى. 1997 جىلى الپينياداعا قاتىسۋشىلار تۇڭعىش پرەزيدەنتتىڭ تۋعان كۇنىنە وراي كومسومول شىڭىن «نۇرسۇلتان» شىڭى دەپ اتاۋدى ۇسىندى. «نۇرسۇلتان» شىڭىندا ءداستۇرلى الپينيادانىڭ سان ءتۇرلى جارىستارى وتكىزىلەدى. قازاقستاننىڭ تاۋەلسىزدىك الۋىمەن ەستافەتانى قازىرگى الپينيستەر جالعاستىرىپ وتىر», – دەدى الپينيزم جانە سپورتتىق قۇزعا ورمەلەۋ فەدەراتسياسىنىڭ پرەزيدەنتى ق.ۆاليەۆ.
ايتا كەتەيىك, «نۇرسۇلتان» شىڭىنىڭ بيىكتىگى 4376 مەتر.